-МОНГОЛЫН НЭР НӨЛӨӨ БҮХИЙ ПРОКУРОР ТҮҮНИЙ ХИЙСЭН ХЭРГИЙГ ХААЦАЙЛДАГ ГЭВ ҮҮ-

Эрх мэдэл, албан тушаалаа урвуулан ашиглаж, улсад их хэмжээний хохирол учруулсан гэх “Эрдэнэс Силвер Ресурс” ХХК-ийн гүйцэтгэх захирал Т.Мөнхбаярын үйлдсэн нэгэн хэргийг уншигч та бүхэнд хүргэж байна.

            Тухайлбал, Т.Мөнхбаяр нь 2018 онд тухайн үеийн Засгийн газрын Хэрэг эрхлэх газрын дарга Г.Занданшатар, Ерөнхийлөгч Х.Баттулга нарын “даалгавар”-аар Дундговь аймгийн Гурвансайхан сумын нутаг дахь Салхитын мөнгөний ордыг ашиглах тусгай зөвшөөрлийг БНХАУ-ын иргэдээс “булаах” ажиллагааг удирдсан. Улмаар Г.Занданшатар, Х.Баттулга нар “Салхитын мөнгөний ордыг 2043, 2047 онд хүртэл ашиглах тусгай зөвшөөрлийг төрийн мэдэлд шилжүүлж авлаа” хэмээн “шоудаж” байлаа.

            Улмаар 2018 оны тавдугаар сард “Эрдэнэс Силвер Ресурс” ХХК-ийг байгуулж, Салхитын мөнгөний ордод хайгуул хийх эрх, ашиглах тусгай зөвшөөрлийг тус компанид өгч, захирлаар нь Т.Мөнхбаярыг томилсон байдаг. Ингээд Салхитын мөнгөний ордыг эдийн засгийн эргэлтэд оруулснаар тэтгэврийн зээлтэй ахмадуудын тэтгэврийн зээлийг нэг удаа чөлөөлж байв. Тухайн үед “Монгол Улс түүхэндээ анх удаа байгалийн баялгийн үр өгөөжийг ард иргэдэд шууд хэлбэрээр хүртээсэн сайн жишиг боллоо” гэж Г.Занданшатар, Х.Баттулга нар ард түмнээр алга ташуулсан.

            Салхитын мөнгөний ордын тусгай зөвшөөрлийг цуцалж, төрийн мэдэлд шилжүүлэн, ахмадуудын тэтгэврийн зээлийг тэглэсэн “гавьяа”-г Т.Мөнхбаяр  мөн хүртэж, 2021 оны тавдугаар сард Монгол Улсын Хөдөлмөрийн баатар болсон. Тэгвэл олны нүдэнд харийнхны мэдэлд байсан орд газрыг төрд авах ажилд хүчин зүтгэж, байгалийн баялгын үр өгөөжийг ард иргэдэд хүртээсэн “Ардын баатар” болж харагдсан Т.Мөнхбаяр үнэн хэрэгтээ “Салхитын мөнгөний ордын өгөөжөөр ахмадуудын тэтгэврийн зээлийг чөлөөлөх” нэрээр хувьдаа асар их хэмжээний мөнгө завшсан байж болзошгүй байна. Тодруулбал, Т.Мөнхбаяр нь “Эрдэнэс Силвер Ресурс” ХХК-ийн захирлын эрх мэдэл, албан тушаалаа урвуулан ашиглаж, төрийн дансанд шилжүүлэх ёстой байсан тэтгэврийн мөнгөнөөс хүү идэж, мөнгө босгосон байж болзошгүйг талаар эх сурвалж мэдээллээ. Өөрөөр хэлбэл, “Эрдэнэс Силвер Ресурс” ХХК-ийн гүйцэтгэх захирал Т.Мөнхбаяр нь Худалдаа хөгжлийн банктай хуйвалдаж, ахмадын тэтгэврийн мөнгийг тус банканд хадгалж, хадгаламжийн хүүгээр нь хөрөнгөжиж байсан аж.

            Эх сурвалжийн бидэнд ирүүлсэн мэдээллээр, 2021 оны хоёрдугаар сарын 8-нд “Эрдэнэс Силвер Ресурс” ХХК-ийн гүйцэтгэх захирал Т.Мөнхбаяр 37 сая ам.доллар буюу 105 тэрбум төгрөгийг Монголбанканд тушааж, тэтгэврийн зээлгүй ахмадуудад нэг сая төгрөг олгох ажил эхлүүлэх гэж байгаа талаараа мэдэгдэж, мөнгийг Сангийн яаманд шилжүүлсэн. Тэгвэл тус мөнгийг тухайн үеэс нэг жилийн өмнө төрийн дансанд шилжүүлэх ёстой байсан аж. Харин Т.Мөнхбаяр төрийн дансанд жилийн өмнө шилжүүлэх ёстой байсан 37 сая ам.долларыг Худалдаа хөгжлийн банканд хадгалж, хадгаламжийн хүүг өөртөө завшиж, хөрөнгөжсөн байж болзошгүй байна.

Ерөнхийлөгч асан Х.Баттулга, одоогийн УИХ-ын дарга Г.Занданшатар нарын “даалгавар”-аар Салхитын мөнгөний ордыг төрийн мэдэлд шилжүүлэн ард түмэнд хишгийг нь хүртээсэн “Ардын баатар” болж “мандаж” явсан Т.Мөнхбаяр ийнхүү тус ордны өгөөжөөс түмэнд хүрэх байсан мөнгөний хүүнээс “идэж”, “Хүүхэд нохойн доог” болж байгаа аж.

Т.МӨНХБАЯР гэж ХЭН БЭ

Т.Мөнхбаярыг “Эрдэнэс Силвер Ресурс” ХХК-ийн гүйцэтгэх захирал болохоос нь өмнө хүмүүс “Империал Гоул Майнинг”-ийн Т.Мөнхбаяр гэдгээр илүүтэй мэддэг байлаа. Учир нь “Империал Гоул Майнинг” ХХК нь Монголын уул, уурхайн салбарын “муу нэрт”. 2019 оны наймдугаар сарын 4-5-нд шилжих шөнө Баянхонгор аймгийн Галуут суманд байрлах “Империал Гоул Майнинг” ХХК-ийн уурхайд осол гарч, хоёр хүний амь эрсэдсэн. Осол гарахаас өмнө Мэргэжлийн хяналтын байгууллагаас “Империал Гоул Майнинг” компанийн уурхайд шалгалт хийж, 12 ноцтой зөрчил илрүүлэн үйл ажиллагааг нь зогсоон лацадсан байдаг. Харин тус компани хууль бусаар үйл ажиллагаагаа үргэлжлүүлж байсны улмаас осол гарч, хоёр ажилтан нь амиа алдаж байлаа.

            Өдгөө “Эрдэнэс Силвер Ресурс”-ийн Т.Мөнхбаяр Ерөнхийлөгч асан Х.Баттулгын хүн гэгддэг. Тэгвэл Ерөнхийлөгч асан Х.Баттулга хууль бусаар үйл ажиллагаа явуулж, хоёр хүний амь эрсдүүлж, муу нэрт болсон “Империал Гоул Майнинг”-ийн Т.Мөнхбаярыг Салхитын мөнгөний ордод хайгуул хийх, олборлох зөвшөөрөлтэй “Эрдэнэс Силвер Ресурс”-ийн захирлаар томилсон нь үүнийг баталсан хэрэг болсон юм.

Мөн “Эрдэнэс Силвер Ресурс”-ийн Т.Мөнхбаяр өмнө нь Т.Мөрбаяр гэдэг нэртэй байсан ч тодорхойгүй шалтгааны улмаас нэрээ солиулсан гэх мэдээлэл бий.

Т.Мөнхбаяр нь “Империалкастел” ХХК, “Агнистын алтан орд” ХХК, “Агнистын зэсэн орд” ХХК, “Бунханшанд” ХКК-ийг эзэмшиж, “Ньюбизнес” ХХК-д хувь эзэмшдэг. Харин “Империал Гоул Майнинг” ХХК, “Монголиан Гоулд Резерв” ХХК-д бүртгэлтэй байсан ч, нэрээ хасуулжээ.

            Мөн тэрбээр  “Монголын нууц тарни” ТББ, “Монголын нохойн холбоо” ТББ, “Монголын немц овчарка сонирхогчдын холбоо” ТББ, “Монголын пониболлын холбоо” ТББ-ыг үүсгэн байгуулж, 2013-2016 онд Монголын боксын холбооны дэд ерөнхийлөгчөөр ажиллаж, дараа нь тус холбооны ерөнхийлөгч болж байв.

Т.МӨНХБАЯР 7.5 ТЭРБУМЫН ТӨГРӨГИЙН ОРОН СУУЦ, БАРИЛГА, 2.3 ТЭРБУМ ТӨГРӨГӨӨР ҮНЭЛЭГДЭХ МАЛТАЙ

“Эрдэнэс Силвер Ресурс” ХХК-ийн гүйцэтгэх захирал Т.Мөнхбаяр 2020 онд АТГ-т мэдүүлсэн хөрөнгө, орлогын мэдүүлэгтээ нийт 98 сая төгрөгийн орлоготой гэж мэдүүлжээ.

            Тэрбээр 7.5 тэрбум гаруй төгрөгийн орон сууц, барилга, байгууламж, 630 сая төгрөгөөр үнэлэгдэх “Mercedes Benz - S400” болон “Lexus 570” автомашинтай бөгөөд 2.3 тэрбум гаруй төгрөгөөр үнэлэгдэх 38 үхэр, 36 адуу, хурдан удмын 108 адуу, зургаан нохойтой гэсэн байна.

            Мөн тус мэдүүлэгт дурдсанаар Т.Мөнхбаяр нь 100 сая төгрөгөөр үнэлэгдэх 1035 метр квадрат газар, 870 төгрөгийн үнэт эдлэл, дотоодын банк, санхүүгийн байгууллагад байрлах 68 сая төгрөгийн хадгаламж, таван тэрбум төгрөгийн авлагатай гэжээ.

Эх сурвалж: Өдрийн сонин