Цар тахлын нөхцөл байдалтай холбоотойгоор түүхий эдийн ченжүүд БНХАУ руу хил дамнуулж, ноолуураа борлуулахад хүндрэлтэй байгаа учир ноолуурын үнэ тогтворгүй байгаа аж. Эргэлт.мн мэдээллийн сайт уншигч та бүхэнд “Эмээлт” зах болон орон нутгийн ченжид ноолуурын үнэ ханшийн талаар тодруулан хүргэж байна.

-“ЭМЭЭЛТ” ЗАХАД НООЛУУРЫН ҮНЭ ӨНГӨРСӨН ОНЫХООС БУУРЧЭЭ-

Өнгөрсөн жил нэг кг ноолуурын үнэ 180 мянган төгрөг болтлоо өссөн ч, эргээд үнэ нь унаад байсан “Эмээлт” захад энэ жилийн ноолуурын үнэ тодорхой гараагүй байгаа гэнэ. Одоогоор ноолуураа эрт авч эхэлсэн ченжүүд 110-120 мянган төгрөгийн ханш тогтоод байгаа аж.

          Ноолуурын ханшийн талаар “Эмээлт” захын ноолуурын ченжтэй холбогдож тодруулахад “Энэ жилийн ноолуурын ханш тодорхой гараагүй байна. Одоогоор өнгөрсөн жилийн ханшаар буюу нэг кг ноолуурыг 115 мянган төгрөгийн үнэтэй авч байгаа. Мөн хар, улаан ямааны ноолуураасаа хамаараад үнэ нь адилгүй байна” гэлээ.

-ХЭНТИЙН АЙМАГТ НООЛУУРЫН ҮНЭ ӨСЖЭЭ-

Орон нутагт нэг кг ноолуурын ханшийн талаар Хэнтий аймгийн түүхий эдийн ченжтэй холбогдож, тодруулахад “Энэ жил нэг кг ноолуурын ханш 150 мянган төгрөг байна. Одоогийн байдлаар хар, улаан ямааны ноолуур гэж ялгалгүй ижил үнээр авч байгаа“ гэв. Эргэн сануулахад, өнгөрсөн онд Хэнтий аймагт нэг кг ноолуурын үнэ 130 мянган төгрөгийн үнэтэй байсан юм.

Мөн бусад аймагт хараахан нэг кг ноолуурын ханш тогтоогүй учир “Эмээлт” зах дээрх аль эсвэл өнгөрсөн онд үнээр нь авч байгаа аж.