Дэлхийн дахинд нүүрлээд байгаа эрчим хүчний хомстолтой холбоотойгоор зэсийн нийлүүлэлт, нөөц багасаж, үнэ нь нэмэгдэж байгаа.

Тэгвэл өнгөрсөн хоногт Лондонгийн металлын бирж дээр зэсийн ханш дөрвөн хувиар хаагдаж, тонн тутмынх нь үнэ 10,538 ам.долларт хүрсэн байна. Мөн эдийн засагчдын хэлж буйгаар дэлхийн зэсийн нөөц түүхэн доод хэмжээндээ хүрээд байгаа юм.

Сүүлчийн гурван сарын дунджаар зэсийн үнэ гурав орчим хувиар өсөж, 10,281 ам.доллар болсон бол, таван сарын дундаж нь 10,747.50 ам.долларт хүрчээ.

Эрчим хүчний хомстолоос үүдэлтэй зэсийн нийлүүлтийн асуудалд олон улсын томоохон эдийн засагчид “Рио Тинто” группын үйл ажиллагаа явуулж байгаа Оюутолгойн зэсийн уурхайн өргөтгөлийн ажил Монгол Улсад удааширч, зардал нь өсөх хандлагатай байгаа талаар онцолжээ. Мөн үүнтэй холбоотойгоор “Оюутолгой” ХХК-ийн дийлэнх хувьцааг эзэмшигч “Рио Тинто” группын мэдэлд байдаг “Turquoise Hill Resources” компанийн хувьцаа өнгөрсөн долоо хоногт 15 хувиар унасан байна.

Эх сурвалж: Mining Journal