БНХАУ-ын зах зээлд Монголын коксжих нүүрсний үнэ буурсан талаар тус улсын “SXCoal” сайт мэдээллээ. Тухайлбал, Монголын угаасан коксжих нүүрсний үнэ өмнөх долоо хоногоос 30 юань унаж, тонн тутмын үнэ нь 3500 юань болсон бол, түүхий коксжих нүүрсний үнэ өмнөх сарын үнээсээ 20 юаниар буурч, тонн нь 2990 юань болсон байна.

Монголын угаасан болон түүхий коксжих нүүрсний үнэ Хятадын зах зээлд унасан ч, өнгөрсөн оны мөн үетэй харьцуулахад өндөр түвшинд байгаа аж. Гэсэн ч нүүрсний экспорт буурч байгаа нь цаашид дахин Монголын коксжих нүүрсний үнэ буурах шалтгаан болох гэнэ.

Харин БНХАУ-д нүүрсний нийлүүлэлтээрээ тэргүүлдэг Шаньси, Шэньси муж дахь уурхайн нүүрс үйлдвэрлэл огцом буурч, гацаанд орсон нь БНХАУ-д эрчим хүчний хомсдол үүсгэх шалтгаан болж байгаа юм байна. Үүнтэй холбоотойгоор Жэнжоу биржид эрчим хүчний нүүрсний фьючерсийн үнэ 8.8 хувиар өсөж, тонн тутмынх нь үнэ 254 ам.доллар болсон байна.

Эх сурвалж: BBC, SXCoal, Reuters