Зүүн Европт өрнөж байгаа Орос, Украины мөргөлдөөнтэй холбоотойгоор ам.доллартой харьцах рублийн ханш олон хоногийн турш унав. ОХУ-ын Төв банкнаас рублийн ханш уналтын эсрэг хариу арга хэмжээ авахаар арилжааг нь зогсоогоод байсан ч, Москвагийн бирж дээр эргэн арилжаалагдаж эхэлснээр рубль “хог дээр” гарлаа.

          Дэлхийн валютын зах зээлд арилжаа нь маш муу түвшинд хүрээд байгаа рублийн ханш 40 орчим хувиар буурч, нэг ам.доллартой 84 рубль тэнцэж байв. Улмаар Москвагийн биржийг дампуурахаас сэргийлж, ОХУ-ын албаныхан өөрсдөө буюу Төв банкнаас олон сая рубль худалдаж авчээ.

-ОХУ-Д ЕСДҮГЭЭР САР ХҮРТЭЛ ГАДНЫН ВАЛЮТ “АРИЛЖААЛАХГҮЙ”-

ОХУ-ын Төв банкнаас өнгөрсөн долоо хоногт арилжааны банкнууд дахь гадаад валютын данс эзэмшигчид зөвхөн 10 мянга хүртэлх (дансан дахь мөнгөн тэмдэгтээс үл хамааран) ам.доллар авахыг зөвшөөрчээ. Мөн шинээр гадаад валютын данс нээхийг зөвшөөрсөн ч, зөвхөн рубль авах гэнэ.

Төв банкнаас гаргасан уг шийдвэр 2020 оны есдүгээр сарын 9-нийг дуустал хүчинтэй байх аж.

-АНУ ДАХЬ ОРОСЫН ТӨВ БАНКНЫ ХӨРӨНГИЙГ БИТҮҮМЖИЛСЭН НЬ РУБЛИЙН ХАНШИД НӨЛӨӨЛЖ БАЙНА-

Хэд хоногийн турш рублийн арилжааг зогсоогоод байсан Төв банкнаас эргэн арилжааг эхлүүлэхэд Оросын мөнгөн тэмдэгт, бонд, хувьцаанууд бүгд унажээ. Арилжааг нь зогсоосны дараа тогтворжоод байсан рубль дахин 30 хувиар буурч, Лондон, Нью-Йоркийн биржид арилжаалагддаг орос компаниудын хувьцааны индекс 45 хувиар буурсан байна.

           Олон улсын валютын зах зээлд хөрвөх чадваргүй болж байгаа рублийн ханшийг дагаж, автобензиний үнэ ч буурав. ОХУ-ын түүхийн эдийн бирж дээр АИ-92 автобензиний үнэ 24 хувиар буурч, 36 мянган рубль, АИ-95 автобензиний үнэ 22 хувиар буурч, 40,180 рубль болсон байна. Үүсээд байгаа нөхцөл байдалтай холбоотойгоор ОХУ-ын Төв банкнаас “Санхүүгийн зах зээлийн нөхцөл байдлыг тогтворжуулахын тулд валютын зах зээлд интервенц хийхээр шийдсэн” гэж мэдэгдсэн.

Гэсэн ч ОХУ цэргүүдээ Украин руу оруулснаас хойш барууны орнуудаас АНУ дахь ОХУ-ын Төв банкны хөрөнгийг битүүмжилсэн нь рублийн ханшид нөлөөлөхөд хүндрэл учруулж байгааг шинжээчид онцолж байна.

-ОХУ-Д ИМПОРТЫН БАРААНЫ ҮНЭ ӨСӨЖ, ЭКСПОРТЫН ӨГӨӨЖ БУУРАВ-

Рублийн огцом уналтад ОХУ-ын эдийн засагт маш том сөрөг нөлөө үзүүлж, Оросоос гадаад өрөө төлөхөд алдагдал хүлээх, импортын барааны үнэ нэмэгдэх, экспортын өгөөж буурахад хүрчээ. ОХУ-ыг 600 тэрбум ам.доллар(450 тэрбум фунт стерлинг)-ын гадаад валют, их хэмжээний алтны нөөцтэй гэдэг. Шинжээчдийн үзэж байгаагаар Москвагаас рублийн ханшийг дэмжихэд нөөц хөрөнгөөсөө ашиглах боломжтой байгаа ч, одоог болтол тийм шийдвэрт хүрээгүй байгаа нь өөр нэгэн “эгзэг”-тэй мөч хүлээж байгаа гэх “Хардлагыг төрүүлж байна” гэж анхааруулж байгаа юм.

Эх сурвалж: New York Times, The Guardian