Монгол Улсын нийт эдийн засгийн 20 орчим хувийг бүрдүүлдэг уул уурхайн салбарын “гол хөдөлгүүр” нүүрсний экспортын БНХАУ руу нэвтрэх тээврийн автомашин тоо 2020 оны арванхоёрдугаар сард хамгийн доод хэмжээнд хүрсэн. Харин сүүлийн хэдэн жилд дэлхийн томоохон нүүрс нийлүүлэгч орнуудын тоонд зүй ёсоор орсон Индонез Улс экспортдоо хориг тавьсан нь Монгол Улс дахин нүүрсний экспортоо сэргээх боломжтой боллоо.

-Монгол Улсын нүүрсний экспорт 2021 онд 11.8 сая тонноор буурчээ-

          Монгол Улсын сүүлийн 10 орчим жилийн эдийн засгийг уул уурхайн салбар тодорхойлж байгаа. Тэгвэл уул уурхайн салбарын өсөлт, бууралттай шууд утгаараа холбогдох нүүрсний экспорт 2021 оны төгсгөлд 11.8 тонноор буурсан үзүүлэлттэй гарчээ.

БНХАУ-ын “SXCoal” сайтын мэдээлснээр цар тахлын нөхцөл байдалтай холбоотойгоор 2021 оны арванхоёрдугаар сард Ганцмод боомтоор нэвтрэх Монголын нүүрс тээврийн автомашины тоо хамгийн доод хэмжээндээ хүрсэн байна.

Монгол Улс 2021 оны арваннэгдүгээр сарын байдлаар 15.2 сая тонн нүүрс экспортолсон нь 2020 оны мөн үетэй харьцуулахад экспортын хэмжээ 11.8 сая тонноор буурчээ. Харин Монгол Улсын нийт эрдсийн бүтээгдэхүүний экспортын орлого 2021 онд 19.7 хувиар өссөн аж.

          Энэ талаар эдийн засагч Ж.Дэлгэрсайхан “Олон улсын зах зээлд зэсийн баяжмал, төмрийн хүдрийн үнэ өндөр байгаа нь Монгол Улсын нүүрсний экспортын дутагдлыг нөхөж байгаа” хэмээн манай сайтад байр сууриа илэрхийлсэн юм. Нөгөөтээгүүр эдийн засагчид Монгол Улсын эдийн засгийн уналт, нүүрсний экспортын бууралтыг Онцгой комисс, эрүүл мэндийн салбарынхантай холбон тайлбарлаж байна.

-Экспортын нүүрсний томоохон “тоглогч” “тоглоомноос гарч”, Монгол Улсад экспортоо сэргээх, нэмэгдүүлэх боломж бүрдэв-

          Цахилгаан станцуудынх нь нүүрсний нийлүүлэлт муу байгаатай холбоотойгоор Индонез Улс нүүрсний экспортоо зогсоож, дотоодын нийлүүлэлтээ ч хязгаарлажээ. Энэ талаар Индонезийн Эрчим хүчний яамнаас үйлчлүүлэгч орнууд руугаа илгээсэн албан захидлаас иш татан олон улсын хэвлэлүүд мэдээлж байна.

          Тэгвэл сүүлийн хэдэн жилийн турш томоохон нүүрс экспортлогч орон байсан Индонез дээрх шийдвэрийг гаргасан нь гурван оронд “маш том боломж” болохыг эдийн засагч, шинжээчид онцолж байгаа юм. Үүнд, ОХУ, Австрали, Монгол Улс багтаж байгаа бөгөөд Индонезээс нүүрс импортлогч орнууд нүүрсний хэрэгцээгээ хангахын тулд дээрх гурван орон руу хандах гэнэ.

ОЛОН УЛСЫН ЭРЧИМ ХҮЧНИЙ АГЕНТЛАГ: 2022 онд дэлхийн нүүрсний эрэлт, үнэ түүхэн дээд хэмжээндээ хүрч магадгүй

Цар тахлын үеийн уналтад орсон эдийн засгийн сэргэлтэд нүүрсний экспорт голлож, өнгөрсөн онд эрчим хүчний хэмжээ есөн хувиар өсжээ.

Үүнтэй холбоотойгоор “2022 онд дэлхийн нүүрсний эрэлт түүхэн дээд хэмжээндээ хүрч, үнэ нь ч шинэ дээд амжилт тогтоож болзошгүй” тухай Олон улсын Эрчим хүчний агентлагаас мэдэгдсэн юм.

Экспортын нүүрсний томоохон “тоглогч” Индонез Улс экспортоо зогсоосон нь нүүрсний эрэлт, үнийн өсөлттэй жилд Монгол Улсад нүүрсний экспортоо нэмэгдүүлж, эдийн засгийн өндөр өсөлт хүлээх боломжтой юм байна.