Олон улсад хомстолд орсон газрын тосны илүүдэл үргэлжилж, суурь металлуудын үнэ нэмэгдэж байна.

Төмрийн хүдрийн үнийн өсөлт үргэлжлэв

          Европ тивд өссөн үзүүлэлттэй гарсан төмрийн хүдрийн үнийн өсөлт Сингапурын биржид үргэлжлэв. БНХАУ-ыг ирэх 2022 онд эдийн засгаа дэмжих зорилготой хөтөлбөрүүдийг нэмэгдүүлнэ гэж мэдэгдсэний дараа төмрийн хүдрийн үнэ Сингапурын биржид 7.2 хувиар өсөж, тонн нь 116.5 ам.доллар болжээ.

          Улмаар төмрийн хүдрийн үнэ сүүлийн дөрвөн долоо хоногийн турш дараалан өсөж, өнгөрсөн тавдугаар сараас хойших хамгийн удаан хугацаанд үргэлжилсэн үзүүлэлт болоод байна.

Олон улсад литийн нөөц буурч байна

          Цэнэг хураагуурын голлох түүхий эд литийн нөөц дэлхий даяар буурч, үнэ нь өсөв. Евразийн хэд хэдэн орон нийлүүлэлтийн хомстол үүссэн гэж мэдэгдсэнээс хойш огцом нэмэгдсэн литийн үнэ 222,500 юань болжээ. 2021 он гарснаас хойш олон улсад литийн үнэ 240 гаруй хувиар нэмэгдсэн юм.

          Мөн үнийн өсөлтөд литийг боловсруулахад өндөр зардалтай байгаа нь голлон нөлөөлсөн аж.

БНХАУ-ын нүүрсний гарц шинэ дээд түвшинд хүрлээ

          БНХАУ хүйтний улиралд нөөцөө бэлтгэхтэй зэрэгцэн хомстол эхэлсэн. Харин эрх баригчдын зүгээс нүүрс олборлогч компаниудыг гарцаа нэмэгдүүлэхийг шаардсанаас хойш шинэ дээд түвшин тогтоожээ.

          Өнгөрсөн арваннэгдүгээр сард БНХАУ-ын нүүрсний гарц 370.8 сая тонн болж, өнгөрсөн оны мөн үеэс 4.6 хувиар өссөн үзүүлэлттэй гарсан байна. Үүнтэй холбоотойгоор эрчим хүчний нүүрсний фьючерс үнэ 0.1 хувиар өсөж, тонн нь 717.8 юань болсон юм.

Алтны үнэ эргэн сэргэв

          Өнгөрсөн арваннэгдүгээр сараас алтны үнэ огцом уналтад орсон. Тэгвэл Европын төв банк болон Английн төв банк бонд худалдан авалтаа түр хугацаанд нэмэгдүүлэхээр шийдвэрлэсэн холбоотойгоор алтны үнэ арваннэгдүгээр сараас хойш анх удаа өсөв.

          Сингапурын биржид алтны спот үнэ 0.2 хувиар өсөж, унц нь 1802 ам.доллар болсон байна.

Зэсийн үнэ сүүлийн хоёр сарын доод түвшинд хүрэв

          Зэсийн үнэ сүүлийн хоёр сарын доод түвшиндээ хүрчээ. Суурь металлуудаас зэсийн үнэ ийн буурсан нь БНХАУ хязгаарлалтын арга хэмжээгээ чангатгасантай холбон тайлбарлаж байна.

          Лондонгийн металлын биржид зэсийн фьючерс үнэ 2.3 хувиар буурч, тонн нь 9199 ам.доллар болсон. Энэ нь аравдугаар сарын 6-наас хойших хамгийн бага дүн болж байгаа юм.

Газрын тосны зах зээлд илүүдэл үүсэж, үнэ нь гурван хоног дараалан уналаа

          Өнгөрсөн есдүгээр сард газрын тосны хомстол үүссэнээс хойш “ОПЕК”-ийн орнууд газрын тосны нөөцөө задалсан. Тэгвэл хомстолд орсон газрын тос одоо дэлхийд илүүдэж, газрын тосны уналт эхэлжээ. Нөгөөтээгүүр газрын тосны уналтыг коронавирусийн Омикрон хувилбартай холбон шинжээчид тайлбарлаж байна.

          Брент газрын тосны үнэ 0.9 хувиар өсөж, 73.7 ам.доллар болсон. Харин WTI төрлийн газрын тосны үнэ 0.5 хувиар буурч, 70.3 ам.доллар болжээ.

Байгалийн хийн үнэ буурч байна

          Зэх зээл дэх байгалийн хийн үнэ аравдугаар сараас хойш 40 гаруй хувиар унажээ. Уг үзүүлэлт нь сүүлийн гурван жилд байгаагүй удаан үргэлжилсэн уналт болоод байгаа юм. Харин судлаачид цаг агаар олон жилийн дунджаас дулаан байгаа бөгөөд эрэлт буурах төлөвтэй гэж үзэж байна.

          Нью-Йоркийн биржид байгалийн хийн үнэ нэг хувиар буурч, метр куб нь 3.7 ам.доллар болж, нэг долоо хоногийн дотор 4.1 хувиар унасан аж.