ЗАСГИЙН ГАЗРЫН 100 ХОНОГ БА Л.ОЮУН-ЭРДЭНИЙН ОНЦЛОХ 25 ЭШЛЭЛ

Б. Цогтбаяр:
Улс төр- Тэд юу хийв

2021-05-10, 1180

Монгол Улсын 32 дахь Ерөнхий сайдаар Л.Оюун-Эрдэнэ томилогдож, танхимаа бүрдүүлж, тангаргаа өргөөд 100 хоножээ. Тэр өнөөдөр 100 хоногт хийсэн ажлуудаа ард түмэнд тайлагнаж, 30 сэтгүүлчийн 30 асуултад хариулах гэнэ. Өөрөөр хэлбэл, Л.Оюун-Эрдэнийн Засгийн газар өнөөдөр ард түмнээр дүнгээ тавиулах нь.

Тэгвэл уншигч таныг Засгийн газрын 100 хоногт дүнгээ тавихад тусалж, Ерөнхий сайд Л.Оюун-Эрдэнийн өнгөрсөн 100 хоногт хэлсэн онцлох 25 эшлэлийг түүвэрлэн хүргэж байна.

НЭГДҮГЭЭР САРЫН 27. У.ХҮРЭЛСҮХ ЯВЖ, Л.ОЮУН-ЭРДЭНЭ ИРЛЭЭ

УИХ-ын чуулганы нэгдсэн хуралдаанд оролцсон гишүүдийн 87,9 хувийн саналаар Л.Оюун-Эрдэнийг Монгол Улсын Ерөнхий сайдаар томиллов. Ерөнхий сайд асан У.Хүрэлсүх 32 дахь Ерөнхий сайдад тамгыг нь гардуулж ажлын амжилт хүсэн ерөөв.

У.Хүрэлсүх “Түүхэн эгзэгтэй цаг үед улс орноо зөв удирдан, ард түмнийхээ эв нэгдлийг сахин хамгаалж, хоёргүй сэтгэлээр зүтгэнэ гэдэгт огт эргэлзэхгүй байна”

Ерөнхий сайд Л.Оюун-Эрдэнэ “Таны тэргүүлж байсан Засгийн газрын бодлогыг үргэлжлүүлж, газрын тос боловсруулах үйлдвэр барих зэрэг томоохон бүтээн байгуулалтыг дуусгана. Монгол Улсаа хөгжүүлэхийн төлөө үүрэг, хариуцлагаа дээд зэргээр ухамсарлан ажиллана”

НЭГДҮГЭЭР САРЫН 29. Л.ОЮУН-ЭРДЭНИЙН 100 ХОНОГИЙН АМЛАЛТ БА ҮНДЭСТНЭЭРЭЭ ТУРАХ УРИАЛГА

Шинэ Ерөнхий сайд Л.Оюун-Эрдэнэ УИХ-ын чуулганы нэгдсэн хуралдаанд оролцож үг хэлэв.

“Хүн амаа вакцинжуулах нь бидний нэн тэргүүний зорилт байх болно. Цар тахлын голомтод ажиллаж буй ажилтан, албан хаагчид, эрсдэлтэй бүлгийнхэн, цаашлаад нийт иргэдээ Дэлхийн эрүүл мэндийн байгууллага болон олон улсад зөвшөөрсөн вакцинд үе шаттайгаар хамруулах ажлыг Засгийн газар өөрийн эхний 100 хоногт багтаан зохион байгуулахын тулд бүхий л нөөц боломжоо дайчлан ажиллана”

“Буяны тарга гэдэг уламжлалт ойлголтоо засаж, хайртай хүмүүсээ хорхгоор дайлахаа больж, жингийн илүүдэлтэй тэмцэх үндэсний соёлыг хамтдаа бий болгоцгооё”

НЭГДҮГЭЭР САРЫН 30. ЕРӨНХИЙ САЙД Л.ОЮУН-ЭРДЭНЭ ЭРҮҮЛ МЭНДИЙН САЙДААР ТОМИЛОГДСОН С.ЭНХБОЛДЫГ САЛБАРЫНХАНД НЬ “АМИНЧХАН” ДААТГАВ

“Танай салбар дээр гарсан алдаанаас болж бүхэл бүтэн Засгийн газар огцорсныг хэзээ ч битгий мартаарай. Тийм учраас та бүхэн С.Энхболд сайдыгаа бүх талаар дэмжиж, үүрэг даалгавар өгсөн даруйд нь цаг алдалгүй биелүүлэх үүрэгтэй шүү. Зөвхөн яамныхан биш, эрүүл мэндийн нийт салбарын ажилтан, албан хаагчид, ялангуяа эмнэлгийн том том удирдлагуудад хандаж энэ үгийг хэлж байна”

ХОЁРДУГААР САРЫН 1. ЕРӨНХИЙ САЙД Л.ОЮУН-ЭРДЭНЭ ОБЕГ-Т ОЧИЖ, “ЗАГНАВ”

“Би өнөөдөр сайхан зүйл ярьж, та бүхнийг магтах гэж ирээгүй. Өнгөрсөн хугацаандаа дүгнэлт хийх ёстой гэдгийг хэлэх гэж ирсэн юм. Ажлын арга барил, хандлага, удирдлагын менежмент дээрээ томоохон өөрчлөлт хийх зайлшгүй шаардлага байна гэж үзэж байна. Нэгдүгээрт, вакцин оруулж ирэх ёстой. Вакцинжуулалтыг яаж зохион байгуулах төлөвлөгөө байна уу. Хоёрдугаарт, өвөлжилт хүндэрнэ. Үүнд бэлэн байна уу. Гуравдугаарт, сая газар хөдлөлт боллоо. Яагаад үүнийг Засгийн газарт мэдэгдсэнгүй вэ. Өглөө би өөрөө утасдсан шүү, генерал руу. Хүчний байгууллагынхан ямар ч мэдээлэлгүй сууж байсан шүү”

ХОЁРДУГААР САРЫН 2. БАРИЛГЫН САЛБАРЫНХАНТАЙ УУЛЗАЖ, ХАВТГАЙРСАН ХАЛАМЖИЙГ ШҮҮМЖЛЭВ

“Та байртай юу, та хэдэн жил хөдөлмөрлөөд байр авах вэ. Энэ асуултуудад манай иргэдийн 60 орчим хувь нь бүдэрч байна. Чинээлэг дундаж давхарга бүрдүүлэхийн тулд юуны өмнө иргэдээ орон сууцтай, боловсролтой, эрүүл мэндийн хүртээмжтэй, чанартай үйлчилгээнд хамрагдаж чаддаг болгох ёстой”

“Хэдүүлээ одоо давс мэт шорвог зүйл рүү анхааръя. Хэт их халамжийн улс боллоо, үүнийгээ бид дахиж яръя. Ажил хийхгүйгээр амьдардаг үндэстэн боллоо, энийгээ одоо ярилцъя. Өглөө эрт босдог, ажилдаа яардаг, өндөр цалинтай үндэстэн болж, залуучуудаа, соёлоо өөрчлөх зайлшгүй шаардлага байна”

ХОЁРДУГААР САРЫН 10. ЕРӨНХИЙ САЙД Л.ОЮУН-ЭРДЭНИЙН АНХНЫ ХӨЛ ХОРИО

Засгийн газрын ээлжит хуралдаан хоёрдугаар сарын 10-ны өдөр болж, 2021 оны хоёрдугаар сарын 11-ний өдрийн 06:00 цагаас хоёрдугаар сарын 23-ны өдрийн 06:00 цаг хүртэл нийслэлд Гамшгаас хамгаалах бүх нийтийн бэлэн байдлын зэрэгт хэсэгчлэн шилжих шийдвэр гаргав. Энэ хугацаанд нийслэлээс гарах, орох зорчигч тээврийн хөдөлгөөнийг хязгаарлаж, иргэдийн хөдөлгөөнийг 90 хүртэл хувь бууруулж, “Нэг хаалга-Нэг шинжилгээ”-ний хүрээнд хоногт 35-40 мянган хүнийг шинжилгээнд хамруулах чиглэлийг Ерөнхий сайд Л.Оюун-Эрдэнэ УОК-т өгөв.

“Өмнө нь хязгаарлалт тогтоох үед гарч байсан алдаа дутагдлаа давтахгүй, иргэдийг чирэгдүүлж, бухимдуулахгүй байхыг холбогдох төрийн байгууллагын удирдлагууд онцгойлон анхаар”

“Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-г танилцуулав.

“Энэ төлөвлөгөө бүх хүнд таалагдахгүй, таалагдах ч боломжгүй. Засгийн газрын шинэ бодлогын амин сүнс бол халамж биш ажлын байр байх болно. Хамгийн сайн халамж бол баталгаатай, сайн цалинтай ажлын байр гэдэг ерөнхий философийн дагуу бид цааш явах шаардлагатай. Ажлын байрыг хамгаалах, шинээр, олноор бий болгох нь энэхүү төлөвлөгөөний зонхилох хэсэг байх болно. Улсын эдийн засаг иргэн, аж ахуйн нэгжийн орлогоос бүрддэгийг та бүхэн мэднэ. Тийм ч учраас цар тахалд нэрвэгдэж, сульдсан бизнесийн цусны эргэлтийг сэргээж, царцсан эдийн засагтаа дэм үзүүлэх нь энэхүү хөтөлбөрийн гол амин сүнс байх болно”

ХОЁРДУГААР САРЫН 12. ХӨЛ ХОРИГДСОН ЦАГААН САР

Ерөнхий сайд Л.Оюун-Эрдэнэ ард түмэнд сар шинийн мэндчилгээ дэвшүүлэв.

"Шинийн нэгний өглөө үүргээ гүйцэтгэж буй, өргөсөн тангарагтаа үнэнч төрийн албан хаагчид, нийт олныхоо төлөө нэг зорилгын доор нэгдэж, гэр гэртээ шинэлж байгаа ард иргэддээ гүн талархал илэрхийлье. Энэ арга хэмжээний дараа нийт иргэдээ вакцинжуулах ажлыг нэн даруй эхэлнэ. Вакцинжуулалтыг шуурхай зохион байгуулснаар цар тахлаас улбаалсан эдийн засаг, нийгмийн хүндрэлийг богино хугацаанд даван туулах болно. Шинийн нэгний өглөө шинэ бодлого, шинэ хандлага, шинэ улс төрийн соёлоор шинэ Засгийн газар ажиллах болно гэдгээ нийт ард түмэндээ илэрхийлье. Монгол Улсын Засгийн газар эс үйлдэл хийхгүй ээ. Мөнх хөх тэнгэр биднийг өнөд ивээх болтугай”

ЦЕГ-т ажиллав.

“Цагдаа нар иргэдтэй харьцах харилцаандаа анхаарах хэрэгтэй. Энэ удаагийн хөл хорио юугаараа онцлох вэ гэдгийг цагдаагийн алба хаагч нарт тайлбарлаж, ойлгуулах хэрэгтэй байна. Энэ удаагийн хөл хорионы онцлог бол 410 мянган өрхийг шинжилгээнд хамруулж, энэ амжилттай болбол Улаанбаатар хотын ногоон бүс болгож нээх зорилготой. Энэ зорилгыг маш сайн тайлбарлахгүй бол зүгээр нэг хөл хорио гэж бодоод бухимдаад байж болзошгүй”

ЭМЯ-нд ажиллав.

“Бид 410 мянган өрхөөс шинжилгээ авч байгаа нь Улаанбаатар хотод халдварын нөхцөл ямар байна вэ гэдгийг тандаж байгаа юм. Үүнийхээ дараа дараагийн тактик руугаа шинжилнэ. Нэг үгээр бид довтолж тоглож байна. Шинжилгээнд идэвхтэй хамрагдаж байгаа иргэдэд талархал илэрхийлье. Энэ сарын 23-нд хөл хориог цуцалсны дараа бизнесийн салбаруудаа нээж, вакцинжуулалт хийж эхлэхээр төлөвлөж байна”

ХОЁРДУГААР САРЫН 16. ОРУУЛЖ ИРСЭН ВАКЦИНЫХАА ХАМГИЙН АНХНЫ ТУНГ ӨӨРТӨӨ ХИЙЛГЭХ “ЗАХИАЛГА” ӨГӨВ

ХӨСҮТ-ийн мэргэжилтнүүдтэй уулзаж, вакцин хүлээн авах, хадгалах бэлтгэл ажил хэрхэн хангагдаж буйтай танилцаж, оруулж ирсэн вакциныхаа анхны тунг өөртөө хийлгэнэ гэж мэдэгдэв.

“Энгийн амьдралдаа шилжихийн тулд вакцинжуулалтыг бусад улс орнуудаас түрүүлж, тэргүүн эгнээнд зохион байгуулахаас өөр гарц байхгүй. Монгол хүн өвддөггүй гэж бид нэг хэсэг ярьж байсан. Энэ худлаа болж таарсан. Энэ зогсолт болчихсон хүндрэлээс бид вакцинаар л гарна. Өнөөдрөөс вакцин татаж авах ажлыг эхлүүлнэ. Эрсдэлт бүлгийн иргэд болон халуун голомтод ажиллаж байгаа эмч, цагдаа, онцгой байдлын алба хаагчдыг эхэнд хамруулна. Ерөнхий сайдын хувьд би хамгийн эхний тунг хийлгэнэ. Хоёрдугаар эмнэлэг, төрийн тусгай гээд их олон хүн Ерөнхий сайдын эрүүл мэндийн хянаж байдаг ийм системтэй юм байна. Би саяхан үүнийг ойлгосон. Тийм учраас Ерөнхий сайд миний бие эхний тунг тариулж, нийт иргэдээ уриална”

ХОЁРДУГААР САРЫН 23. МОНГОЛЫН АНХНЫ ВАКЦИНТАЙ ХҮН

Ерөнхий сайд Л.Оюун-Эрдэнэ Монголд ирсэн анхны вакцин буюу “Астра зенека” вакцины эхний тунг тариулж, орон даяар вакцинжуулалт эхэлж байгааг зарлалаа.

“Элэг нэгт монгол ахан дүүс ээ. Шинэ Засгийн газар бүрдэж ажилдаа ороод 25 хонож байна. Өнгөрсөн хугацаанд манай Засгийн газар олон улсын шилдэг туршлагад үндэслэсэн, өнөөгийн нийгэм, эдийн засгийн нөхцөл байдалд тохирсон, шуурхай, шийдэмгий, шинэ бодлого дэвшүүлж амжилттай ажиллалаа. Бүх нийтийн бэлэн байдлын зэргийг өнөөдрөөс цуцалж байна. Улаан түвшнээс Шар түвшинд шилжиж, нийт иргэн, аж ахуйн нэгж, байгууллагын 95 хувь нь амьдралын энгийн горимд орж байна. Тулж ирсэн сорилтын өмнө үндэстнээрээ нэгдэн зогсож чаддагийн бас нэгэн тод жишээг хамтдаа бүтээж чадлаа. Хөл хорионы үед төр, засгийнхаа шийдвэрийг хүндэтгэж, бас ойлгож хүлээн авч, тэвчиж байсан ард иргэд, нийслэлчүүддээ талархал илэрхийлье. Мөн өргөсөн тангарагтаа үнэнч зүтгэсэн төрийн бүх байгууллагын ажилтан, алба хаагчдадаа чин сэтгэлээсээ баярлалаа”

ХОЁРДУГААР САРЫН 25. ХЭЦҮҮ БАЙНА УУ, БИД ХИЧЭЭЖ БАЙГАА

Аялал жуулчлалын салбарынхантай уулзав.

“Хамгийн хүнд байгаа салбар бол аялал жуулчлалын салбар. Зөвхөн Монголд биш дэлхийд энэ салбар амаргүй сорилттой нүүр тулсан байгаа. Өнөөдөр Монгол Улсын нийгэм эдийн засаг ч гэсэн тийм ч амар биш байгаа. 70 мянган ажлын байр шууд байхгүй болсон. Энэ дотор аялал жуулчлалын салбар шууд багтаж байгаа. 130 мянган ажлын байр эрсдэлд орсон байна. Энэ дотор ч аялал жуулчлалын салбар багтаж байгаа. Засгийн газар хийж чадах бүх зүйлээ хийхийг хичээж байгаа. Бидний нөөц ч хязгаарлагдмал байна”

ХОЁРДУГААР САРЫН 27. НАДАД ИТГЭЭРЭЙ, НАРАНТУУЛЫНХААН

Нарантуул захын худалдаа эрхлэгчидтэй уулзав

“Та бүхэн маань намайг хараад уурлаж, загнах ёстой. Гэхдээ “бид болгоно оо” гээд байж байгаад маш их баяртай байна. Төр засаг бүх зүйлийг хийж чадахгүй нь бодит үнэн. Та бүхэн маань халдвар хамгааллын дэглэмээ сайн бариад, Засгийн газартаа итгээд явж чадвал бид вакцинжуулалтаа хурдлуулна. Вакцинжуулалт хурдан байвал орон нутаг нээгдэнэ. Тэгэхээр аяндаа Нарантуул захаас татан авалтууд хийгдэнэ. Эрэлт их болно гэсэн үг. Энэ үед нөхцөл байдал сайжирна. Тэр болтол 2-3 сарын хугацаа байна. Бид өдөр шөнөгүй ажиллана, итгээрэй”

ГУРАВДУГААР САРЫН 6. ТАВДУГААР САРЫН 1-НД ХИЛЭЭ НЭЭНЭ

“Чингис хаан” олон улсын нисэх буудлын үйл ажиллагаатай танилцав.

"Монгол Улс тавдугаар сарын 1-нээс агаарын хилээ нээхээр төлөвлөж байгаа. Иймд долдугаар сарын 1-нд шинэ нисэх онгоцны буудлыг ашиглалтад оруулахаар байгаа юм. Энэ асуудлыг Япон Улсын талтай ярилцсан. Төв аймгийн Сэргэлэн суманд байрлах "Чингис Хаан" олон улсын нисэх буудлын үйл ажиллагааг эхлүүлэх бэлтгэл 85 хувьтай хангагдсан байна. Үлдсэн бэлтгэл ажлыг яаралтай хангах хэрэгтэй. Албаны хүмүүсийн тайлбарласнаар "Буянт-Ухаа" олон улсын нисэх буудлыг 24 цагийн дотор шинэ нисэх онгоцны буудал руу нүүлгэх боломжтой бөгөөд нислэгийн хуваарь алдагдахгүй"

ГУРАВДУГААР САРЫН 8. ЕРӨНХИЙ САЙД Л.ОЮУН-ЭРДЭНИЙН ЭМЭГТЭЙЧҮҮДИЙН БАЯРЫН СЕНСААЦИ

401 дүгээр хаалттай хорих ангийн эмнэлэгт очиж, С.Зоригийн амь насыг хөнөөсөн хэргээр ял эдэлж буй Т.Чимгээтэй уулзав.

“Бид энэ эмэгтэйд хүчээр хэрэг хүлээлгэсэн байвал яах вэ гэдэг асуудал бий. Хорих ангид байгаа хүн Т.Чимгээ рүү мессеж илгээн дарамталсан тохиолдол гарсныг өмнө нь УИХ-аар ярьсан. Мөн хашаанд нь хүний цогцос аваачиж булсан, уух зүйлд нь мансууруулах бодис хийсэн, нүцгэн зургийг нь авч гэр бүлийн хүнд нь явуулсан асуудал байсан. Эл хэргийг сэргээн шалгуулж өгөхийг хүсэж, надад өргөдөл гаргаж өгсөн. Тиймээс Засгийн газраар хэлэлцэж, энэ асуудлыг нууцаас гаргах асуудлыг хэлэлцэнэ. Шүүх ямар шийдвэр гаргасан нь бус, гагцхүү шүүн таслах үйл ажиллагааны явц хуулийн дагуу байсан эсэх нь чухал. Эрүүдэн шүүсэнтэй холбоотой хэрэг Төв аймгийн шүүх, Давж заалдах шатны шүүх дамжин Улсын дээд шүүхээс буцаад байна. Шүүхийн байгууллага яагаад зарим хэргийг богино хугацаанд шийддэг, заримыг нь сунжруулдаг асуудлыг ч Үндэсний аюулгүй байдлын зөвлөлийн хурлаар хэлэлцүүлнэ. Хэрвээ Т.Чимгээ нарыг эрүүдэн шүүсэн нь тогтоогдвол Эрүүгийн хэрэг хянан шийдвэрлэх тухай хуулийн 41.1-д заасны дагуу шинээр илэрсэн нөхцөл байдлын улмаас өмнө нь оноосон хэргийг хүчингүйд тооцож, шинээр мөрдөн шалгах хууль, эрхзүйн үндэслэл бүрдэнэ”

ГУРАВДУГААР САРЫН 18. ТА НАР ХИЧЭЭХГҮЙ БОЛ ХӨЛ ХОРИНО

Вакцинжуулалтын ажлыг зохион байгуулж буй ажлын хэсгийнхэнтэй уулзлаа.

“Бизнес эрхлэгчдийн итгэл дөнгөж сэргэж, эдийн засгийн үзүүлэлтүүд сайжирч байгаа энэ үед Засгийн газраас хатуу хөл хорио тогтоох сонирхол байхгүй ч нөхцөл байдал хүндэрч байна. Тиймээс иргэн бүр, аж ахуй нэгж бүр хариуцлагатай, хувийн сахилга бат, халдвар хамгааллын дэглэмээ баримталж хичээж ажиллахыг уриалъя. Ирэх 14 хоногт УОК, НОК болон бусад холбогдох байгууллагуудаас гаргасан халдвар хамгааллын дүрэм, журмуудаа сайтар мөрдөж хөл хорио тогтоохгүй байхын төлөө ажиллах хэрэгтэй. Эс бөгөөс 2021 оны 04 дүгээр сарын 05-19 -ны өдрүүдэд гамшгаас хамгаалах эрсдэлийн “улаан түвшин”-д шилжүүлэхээс өөр аргагүйг нөхцөл байдал шаардаж байна”

ГУРАВДУГААР САРЫН 30. ВАКЦИНТАЙ ХӨЛ ХОРИОНЫ СУРАГ

ХСҮТ, ХӨСҮТ-д ажиллав.

“Засгийн газрын хувьд эдийн засгаа аль болох нээлттэй байлгах бодлого баримталж ирсэн. Гэхдээ эрдэмтэн, судлаачдынхаа үгийг сонсоно. Шинжлэх ухааны дээр гишгэсэн улстөрч байж болохгүй. Засгийн газрын хувьд хэрэв хөл хорио тавих бол тодорхой үр дүнтэй арга хэмжээг авах ёстой гэж үзэж байгаа. Өмнөх хөл хорионы үе “Нэг хаалга - нэг шинжилгээ” хөтөлбөрийг зохион байгуулснаар бид эдийн засгаа нээх боломж бүрдсэн. Тэгвэл энэ удаад хөл хорио тавих бол дархлаажуулалтын ажлыг эрчимжүүлэх шаардлагатай. Хэрэв энэ удаад хөл хорио тогтооно гэж үзвэл бид дөрөвдүгээр сардаа багтаж нэг сая иргэнээ вакцинжуулах зорилт тавьж байж үр дүнтэй болно”

ДӨРӨВДҮГЭЭР САРЫН 4. “КОВИДГҮЙ ЗУНЫ ТӨЛӨӨ” УРИАЛГА ГАРГАВ

“Засгийн газраас 4,5 дугаар сарыг дархлаажуулалтын сар болгон үндэсний хэмжээнд зарлаж байна. Өнөөдрөөс дархлаажуулалтын хүчин чадлыг хоёр дахин нэмэгдүүлж байна. Та бүхний оролцоо өндөр байж чадвал тавдугаар сарын 1 гэхэд нийслэлийн насанд хүрсэн бүх иргэнийг, зургаадугаар сарын 1 гэхэд хөдөө орон нутгийн насанд хүрсэн бүх иргэдийг тус бүр эхний тунд хамруулж, долдугаар сарын 1 гэхэд нийт иргэдээ хос тунд хамруулах томоохон зорилтыг дэвшүүлэн ажиллаж байна. Дархлаажуулалтад идэвхтэй хамрагдаж, ковидгүй зуныг хамтдаа угтацгаая”

ДӨРӨВДҮГЭЭР САРЫН 8. 300 МЯНГА

Засгийн газраас дөрөвдүгээр сарын 10-наас дөрөвдүгээр сарын 25-ны хугацаанд хөл хорио тогтоож, иргэн бүрд 300 мянган төгрөг тараах шийдвэр гаргав.

“Цар тахлын даван туулахын тулд Засгийн газар бүхэн өөр өөрийн арга барилаар тэмцэж байна. Цар тахлыг даван туулах цорын ганц арга зам бол вакцинжуулалт. Энэ утгаараа 4 болон 5 сарыг дархлаажуулалтын сар болгож зарласан. Гэхдээ халдварын тархалтыг зогсоох, вакцины эхний тунд хамрагдаад байгаа иргэдээ хамгаалж, хоёр дахь тундаа хамрагдахаасаа өмнө халдвар авхуулахгүй байх зорилгоор хөл хорио тогтоох нь зүйтэй гэж үзлээ. Яг энэ аргаар Израйль улс цар тахалтай тэмцэж байгаа. Хөл хорио тогтоохын төлөө Засгийн газар бүхий л нөөц боломжоо шавхаж, хувийн хэвшлээ дэмжихийн төлөө ажилласан. Энэ хөл хорио сүүлийнх байгаасай гэж чин сэтгэлээсээ хүсэж байна. Дархлаажуулалт үр дүнтэй болж чадвал энэ хөл хорио коронавирусийн хувьд сүүлчийн хорио байх боломжтой. Мэдээж вирус мутацид ороод, вакцинаас үл хамаарсан нөхцөл байдлууд үүсвэл түүнийг амлах боломжгүй”

ДӨРӨВДҮГЭЭР САРЫН 24. УЛСТӨРЧИД ӨӨРСДӨӨ ВАКЦИН ҮЙЛДВЭРЛЭЖ ЧАДАХГҮЙ БАЙЖ...

Вакцинжуулалтын цэгүүдэд ажиллав.

“Засгийн газрын тэргүүний хувьд нэг зүйлийг дахин дахин хүсэж байна. Вакцинжуулалттай холбоотой, цар тахалтай холбоотой, Ерөнхийлөгчийн сонгууль дөхөж байгаатай холбоотой улс төрийн мэдэгдлүүд их саад болж байна. Вакциныг сайн, муу гэж дүгнэж байна. Энэ асуудал бол вакцин үйлдвэрлэгч биш манай орны хувьд том эрсдэл болоод байна. Дахиад хэлэхэд улс төрчид маань өөрсдөө вакцин үйлдвэрлэж чадахгүйгээс хойш улс төрийнхөө хэлэлцүүлгийг вакцинтай битгий холбооч ээ. Ерөнхийлөгчийн сонгууль угтсан улс төржилтөө вакцинжуулалт болон Засгийн газрын үйл ажиллагаа тасалдах хүртэл битгий явуулаач ээ гэж чин сэтгэлээсээ хүсье”

ТАВДУГААР САРЫН 2. ВАКЦИН ХОЙШЛУУЛСАН УЛСТӨРЧДИЙГ ЗАРЛАНА

Цар тахлын эсрэг вакциныг орон нутаг руу ачуулах үеэр улстөрчдийг шүүмжлэв.

Улстөрчид та нар нэмэр болохгүй бол гай битгий бол гэж би хэлж байгаа. Вакцины татан авалт хойшилсонд зарим улс төрчийн хариуцлагагүй байдал нөлөөлсөн. Үүнийг цар тахлын хажуугаар улстөржихгүйн тулд асар их тэвчээр гаргаж байна. Би тэвчээд, дуугүй яваад байх зан харилцаатай хүн биш ч гэсэн цар тахлын хажуугаар халаалт үүсгэхгүйн тулд хичээн ажлаа л хийж байна. Шаардлагатай гэж үзвэл тэр гишүүдийг би зарлана гэж бодож байгаа. Иргэдийн амь нас, эрүүл мэндтэй холбоотой ийм цаг үед энд тэнд буруу мэдээлэл өгч, албаар зохион байгуулж байгаа нь эх орноосоо урваж байгаа үйлдэл. Нэр бүхий улс төрийн алиа салбадайнуудад хатуухан анхааруулъя, цах тахлын нөхцөл байдал гайгүй болохоор хэлэх ёстой газар нь хэлнэ”

ЗАСГИЙН ГАЗРЫН 100 ХОНОГ БА Л.ОЮУН-ЭРДЭНИЙН ОНЦЛОХ 25 ЭШЛЭЛ

Шинэ мэдээ

Нийтлэлчид