• Өнөөдөр 2026-10-26

АН манлайлж чадвал Ерөнхийлөгчийн суудлаа хамгаалаад үлдэх боломж бий

2021-04-19,   1374

       Ардчилсан нам зангарагтайхан, хүчтэй, лидер улстөрчтэй байсан бол Ерөнхийлөгчийн сонгуулийг өнгөлж, намын бүлгээ зангидаж, хүчтэй сөрөг хүчин байх боломж хандалттай байлаа. Гэвч өнөөдрийн байгаа байдлаас харахад тэдэн дунд иргэдийн хүсэж байгаа шиг манлайлал болчих нэг ч гишүүн, нэг ч улстөрч алга.
 
Төрийн эрхийг дангаараа барьж байгаа МАН-д мөн ч их сул тал байна. Эргэж буцсан, амласнаа биелүүлдэггүй, тооцоо судалгаагүй шийдвэр нь иргэдийн туйлдуулж буй. Цар тахлын үед төрийн бүх шатанд алдаа завхрал гарч, хариуцлагагүй хүмүүсийн хайхрамжгүй алдаанаас болж, халдварыг дотооддоо алдчихсан. Өнгөрсөн жилээс хойш олон удаа хөл хорио тогтоож, иргэд, аж ахуйн нэгжийнхээ үйл ажиллагааг хорьсон ч үр дүнд хүрээгүй. Цар тахлын үеийн зээл, тусламж, хандив хөрөнгийн зарцуулалтын тайлан тооцоо байхгүй. 
Хамгийн сүүлд гэхэд л Ерөнхий сайд нь “Иргэдээ вакцинжуулахаар хөл хорио тогтоож байгаа” гэж хэлээд шүлс нь хатаж амжаагүй байхад маргааш нь вакцины нөөцгүй болчихсон байсан гээд шүүмжлэх асуудлууд нүдэнд бэлхнээ ил байна. Гэтэл энэ алдааг нь хэлээд, эрх баригчдад шаардлага тавих ёстой сөрөг хүчнийхэн усанд хаясан чулуу шиг чимээ сураггүй алга болжээ. Тэр ч байтугай дотоод асуудлаа шийдэж чадахгүй олны элэг доог болж байгаа нь харамсалтай. 
Ардчилсан намынхан парламентад 11 суудалтай бүлэг байгуулах хэмжээнд хүрчихсэн атал, хачир дээрээ цөөнхийн хэсэг гэгдэх бие даагч гишүүн Н.Алтанхуяг, МАХН-ын гишүүн С.Ганбаатар нараас ч дор, эрх баригчдын аманд багтсан, унж дорой харагдах юм. Өмнөх парламентад есүүлхнээ сөрөг хүчний үүрэг гүйцэтгэж байсан ч ядаж л үүргээ гүйцэтгэж,  эрх баригч нартай бодлогын өрсөлдөөн ярьдаг, эрх баригчдад шаардлага тавьдаг байсан сан. Гэвч одоогийн бүлгийн гишүүд эрүүл согтуу нь мэдэгдэхгүй ээрч, муурсан асуултдаа өөрөө бүдэрч байгаа харагдах. Ядах нээ тэдний дунд хуулийн зүйл заалтаа зөв уншчих, хатуухан шаардлага тавих мэдлэгтэй гишүүн алга гэхэд хилсдэхгүй ээ.

Хэрэв зээ сүйхээтэй, мэдрэмжтэй, мэдлэгтэй сөрөг хүчин байсан бол эрх баригч намынхны энэ олон алдааг тосож аваад иргэдийнхээ итгэлийг хүлээх боломж тэнд хангалттай байгаа харагдах юм. Наанадаж, олон нийтийн сүлжээгээр ил болчихсон нийгмийг асуудлыг шүүрч аваад улс төр хийчихвэл намын нэр хүнд, өөрийнх нь карьер өсөөд тодроод гараад ирэхсэн. Гэтэл тийм сүйхээтэй поп гишүүн энэ удаагийн Ардчилсан намын бүлгийн гишүүд дунд даанч алга. Тэд зөвхөн сандал суудал, албан тушаалын хэрүүлтэйгээ л Ерөнхийлөгчийн сонгуультай золгох нь. Цаашлаад дараа дараагийн сонгуульд ч ийм байдалтай оролцох вий гэх болгоомжлол нийтийн дунд бий.

 Уг нь энэ удаад ардчилсан намынханд Ерөнхийлөгчийн суудлаа хамгаалаад үлдэх боломж хангалттай байгаа харагдах. Хэдийгээр иргэд өнгөрсөн 2020 оны УИХ-ын сонгуульд МАН-д үнэмлэхүй олонхын суудал өгч итгэл хүлээлгэсэн ч өнөөдөр байдал арай өөрөөр эргэснийг олоод харчих гишүүн тэдэнд дунд байгаа болов уу. Ардын намынхны эзэрхийлэл, түрэмгийлэл сүүлийн үед даймжирч, Ерөнхийлөгчийн суудлын төлөө хэт улайрч байгаа нь илэрхий байх боллоо. Угтаа бол эрх баригч намынхны юу ч болоогүй байхад хатуу хөл хорио тогтоож, хэт их сүржин зан гаргасны үр дүнг одоо хүртэж байна.  МАН-ын сүржигнэл өнөөдөр өөрсдөд нь булуу болж шиг. Иймдээ ч иргэд эрх баригч намын дарангуйлал, сүржигнэлээс залхаж байна гэж шивэр авир хийх болжээ.
 
Улмаар МАН-д итгэх иргэдийн итгэл буурч, У.Хүрэлсүх, Л.Оюун-Эрдэнэ нарын рейтинг унасан гэх судалгаа ч бий. Угтаа бол Ардчилсан намын дотоод асуудал цэгцэрчихвэл Ерөнхийлөгчийн суудлыг иргэд олонхын бүлэгт өгөх сонирхолгүй байгаа нь олон жишээ дээрээс харагдаж байна. Монголчууд өрөвч, зөөлөн сэтгэлтэй гэгддэг. Тиймдээ ядарч, зүдэрсэн, ад шоо болсон баалуулж байгаа нэгнийгээ илүү дэмждэг тогтсон уламжлал бий. Үүний нэг тод жишээ нь УИХ-ын гишүүн С.Ганбаатарыг Ерөнхийлөгчийн сонгуульд өрсөлдөхөд нь “Хөөрхий Ганбаа ямар мөнгө хөрөнгө байх биш” хэмээн дэмжиж саналаа өгсөн олон хүн бий. Яг үүний адилаар Ардчилсан намынханд ийм боломж байхыг үгүйсгэхгүй юм. Харамсалтай нь, тэдний дунд ядаж, С.Ганбаатар шиг попроод олон дундаасаа торойгоод гараад ирэх гишүүн байхгүй нь харамсалтай. Ядаж л одоогийн Ерөнхийлөгчдөө дэм болж, дараагийн сонгуульд нь замыг нь засаасай гэх хүлээлт олны дунд бий болжээ.
 

АН манлайлж чадвал Ерөнхийлөгчийн суудлаа хамгаалаад үлдэх боломж бий
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2021-04-19 22:27:37
    zochin: AH dotroo alaltsah ni chuhal bish. Ard tumen yadarch tuildaj baihad, chadaltai zaluuchuud ard tumnee omgoolon, hamgaalah tsag ni bolsoon. Neg udaa ch bolov erh medliin tsemtslee orhiod, yadarsan ard tumnee omgoolog setgeliin huch bval, yag odoo tsag ni bolsoon. Ardchilalaa hamgaalan, ard irgedee omgoolon, tsoohon mongolchuud evtei baihgui bol, coronagiin omno sohorch bn shuu. Yadatsan negnee omgoolon hamgaalj, ahmaduud, zaluuchuudaa hamgaalan, mongolchuud bugd huchtei, evtei, setgeltei baih heregtei bn.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.