• Өнөөдөр 2026-10-26

Н.ЭНХБАЯРТ МАН-аас өөр толгой хоргодох газар үлдээгүй юү

2021-04-14,   1285

         МАН-д “өс зангидсан” МАХН-ын дарга Н.Энхбаяр сүүлийн үед У.Хүрэлсүхтэй жигтэйхэн сайхан харилцаатай болж, тэд бие биедээ ихэд сүжрэх боллоо. Засгийн газар солигдож, Л.Оюун-Эрдэнэ Ерөнхий сайдаар томилогдоод удаагүй байхад Н.Энхбаяр түүн дээр өөрөө гүйж очиж намба алдсан. Угтаа бол  Монгол Улсын Ерөнхийлөгчөөр ажиллаж байсан, цагтаа улс төрд нөлөө бүхий эрхэм залуухан Ерөнхий сайд дээр өөрөө гүйж очиж, барьц алдсан нь олонд  таалагдаагүйг нуух юун. 
 
Гэвч Н.Энхбаярт ингэж очих хэд хэдэн шалтгаан байсан гэх. Хэдийгээр тэрбээр хоёр намын нэгдэл, үүх түүх нэрээр халхавч хийж МАН-ыханд дээр очсон ч улс төрд тэсэж үлдэх сүүлийн найдвар нь энэ байсан гэнэ. Түүний хамгийн  гол зорилго нь УИХ-ын нөхөн сонгуульд өөрийн хүү Э.Батшугарыг МАН-аас нэр дэвшүүлэх. Үүнийгээ намын тэмдэглэлт баяраар дөрөөлж, тэр тусмаа одоогийн улс төрийн гол тоглогч гэгдэх У.Хүрэлсүхэд дээр очих үедээ илэрхийлсэн гэх цуу яриа бий.
Ямар сайндаа л У.Хүрэлсүхээс оноо авахын тулд шинэ Ерөнхий сайд дээр нь биечлэн очиж уулзах билээ. 
Ингээд 100 жилийнхээ ойн баярыг МАН-тай хамт тэмдэглэж, гуравдугаар сарын 1-нд “Эх орончдын баяр”-ын өдрөөр Сүхбаатар  жанжины хөшөөнд хоёр намын томчуул цугтаа цэцэг өргөсөн нь олны анхаарал татсан. МАН-аас Ерөнхий сайд асан, намын дарга У.Хүрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ, МАН-ын генсек Д.Амарбаясгалан тэргүүтэй хүмүүс байсан бол МАХН-аас Н.Энхбаяр, намын генсек Б.Тулгат нар харагдсан. 
 

Тэд Төв талбайд хэвлэлийнхнийг нь цуглуулчихаад олны хараанд өртөх гэсэн шиг талбайг нар зөв тойроод Төрийн ордон руу орчихсон. Хэн нь ч хэвлэлд тайлбар өгөлгүй олны янзыг үзсэн аятай мушилзсан, инээсэн бие биедээ саймширсан зураг хэдэнтэй даруулснаар тэр өдрийн үйл ажиллагаа өндөрлөсөн билээ.  Харин маргааш нь МАН-ын генсек Д.Амарбаясгалан МАХН-ын дарга Н.Энхбаяр нар хоёр намын ахмад гишүүдтэй уулзаж, намаа нэгтгэх талаар ажлын хэсэг гаргасан, асуудал нааштай шийдэгдэнэ гэх мэдээг дуулгасан. 

           Намын тэмдэглэлт ой болохоос ч  өмнө “МАН, МАХН хоёр нэгдэнэ” гэх цуурхал тарсан бөгөөд “Ерөнхийлөгчийн сонгуульд С.Ганбаатарыг нэр дэвшүүлэхгүй” гэдэг бор шувууг намын дарга нь өөрөө нисгэсэн гэх. 
    Эрх баригчдыг мөнхийн дайсан мэтээр үзэж байсан Н.Энхбаярын энэ урвалтыг “Босоо Ганбаа” эсэргүүцэж, “МАН, МАХН-ын нэгдлийн би яасан ч хүлээн зөвшөөрөхгүй. Ард түмэн баялагтаа эзэн суух ёстой. Тиймээс би Ерөнхийлөгчийн сонгуульд дэвшинэ” хэмээн нэлээд бухимдаж байгаа харагдсан. Хуурай ахдаа туньж, түнжин муудсан тэд одоо ч эв зүйгээ олоогүй гэх яриа бий. Угтаа бол Н.Энхбаярт хуучин намынхаа бөөрөнд наалдахаас өөр улс төрийн тавцанд тэсэж үлдэх арга үлдээгүй бололтой.
    Уг нь намаа бодсон бол Ерөнхийлөгчийн сонгуульд намаасаа хэн нэгнийг сойж,  өөрийг нь улс төрийн давцангаас холдуулж байгаа хүмүүстэй ана мана үзмээр. Гэвч тэгсэнгүй. МАН-д бууж өглөө.
   Мэдээж Засгийн эрхийг дангаараа барьж, УИХ-д үнэмлэхүй ялалт байгуулчихсан эрх баригчдад МАХН-тай нэгдэх онцын шаардлага байхгүй. Тэр байтугай У.Хүрэлсүх өмнөх түүхээ сөхвөл Н.Энхбаярыг намдаа хүлээж авахгүй байх хангалттай хэд хэдэн шалтгаан бий. 
    10 жилийнхээ ойд ихэд ач холбогдол өгч байгаа эрх баригч намынханд нэг нам ч гээн АН-ы эсрэг зогсох нь ашигтай учир МАХН-ыг хүлээж авсан байх талдтай Нөгөө талдаа Ерөнхийлөгчийн сонгуулиар саналын тоо хуваагдахыг тооцоолж, Н.Энхбаяртай нэгдсэн байхыг үгүйсгэхгүй.

Учир нь, өнгөрсөн удаагийн Ерөнхийлөгчийн сонгуульд МАХН-аас УИХ-ын гишүүн С.Ганбаатар нэр дэвшиж, чамгүй олон санал авсан нь эрх баригчдад гашуун туршлага болон үлдсэн.  Энэ удаад тэд хүчтэй өрсөлдөгч биш ч саналынхаа тоог хуваахгүйн тулд ийн хоёр намын нэгдлийг хүлээн зөвшөөрсөн байж болох.

    Харин Ардчилсан намд МАХН ямар ч ашиггүй болохыг өнгөрсөн оны орон нутгийн сонгуулиар тэд хангалттай харсан. АН МАХН-тай эвсэж, орон нутгийн сонгуульд өрсөлдсөн ч эвслээс ялсан гишүүд нь МАН руу урваж, хэл ам дагуулснаар байдлыг улам бүр дордуулсан. Тиймээс Ардчилсан намынхан Н.Энхбаярыг хүлээж авахгүй нь тодорхой. “Лам олдохгүй бол буцахдаа зална” гэгчээр Н.Энхбаяр дайсантайгаа гар барьж, МАН-д толгой хоргодох болов.
 

Н.ЭНХБАЯРТ МАН-аас өөр толгой хоргодох газар үлдээгүй юү
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2021-04-14 10:56:25
    ЗОЧИН: МОНГОЛЧУУДЫГ ЭВТЭЙ БАЙЛГАХГҮЙ БАЙХ ЗОРИЛГОТОЙ БҮЛЭГ БАЙНАА. ЭВТЭЙ БАЙХАД МОНГОЛЧУУД Л ХОЖНО, ТАМЫН ТОГООНЫ ҮЛГЭРЭЭР БАЙВАЛ ГАДНЫХАН Л ХОЖНО. ҮҮНИЙГ ХОЛБОГДОХ БАЙГУУЛЛАГУУД ТОДРУУЛАХ ХЭРЭГТЭЙ ЮМ.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.