У.ХҮРЭЛСҮХ ГАМШГИЙН УЛБАР ШАР ТҮВШНИЙ ҮЕД ТУСГААР ТОГТНОЛЫН ОРДОНД ХЭДЭН ЗУУН ТӨРИЙН АЛБАН ХААГЧ ЦУГЛУУЛЖ, МЕДАЛЬ, ӨӨРИЙН ДҮР БҮХИЙ МАРК ТЭРГҮҮТ БЭЛЭГЛЭСНИЙГ ХУУЛИЙН БАЙГУУЛЛАГА ШАЛГАХ ШААРДЛАГАГҮЙ ГЭЖ ҮЗСЭН ГЭВ ҮҮ

     Эрх баригч намынханд ЦАР ТАХЛААС УРЬДЧИЛАН СЭРГИЙЛЭХ, ТЭМЦЭХ, НИЙГЭМ, ЭДИЙН ЗАСАГТ ҮЗҮҮЛЭХ СӨРӨГ НӨЛӨӨЛЛИЙГ БУУРУУЛАХ ТУХАЙ хууль үйлчлэдэггүй юү, эсвэл тэд хууль, дүрэм, журмыг уландаа гишгэдэг хэрэг үү. Өнгөрсөн жилээс хойш улс орон даяар хэд хэдэн удаа хөл хорио тогтоож, энгийн иргэдээ хатуу дэглэмд оруулчихаад өөрсдөө дураараа дургиж байгаа нь олныг бухимдуулж буй.   

       10-хан настай охиныг ээжтэй нь уулзуулалгүй хорьсоор нас барсных нь дараа ар гэрийнхэнд нь шарилыг нь ч зүй ёсоор өгөөгүй хэрнээ Шадар сайдын эхнэр халдварын өндөр эрсдэлтэй, улаан бүс рүү орж “Бохир заваан байна” гээд гараад явчихсан байхад яаж ч чаддаггүй, ямар ч хариуцлага тооцох мэдэлгүй Засгийн газрын “амьгүй албат”-уудаас юугаа ч хүлээх билээ дээ.

          Ёстой л “Хэн бидэнд үг хэлдэг юм” гэсэн шиг дураараа дургиж байгаа. Тэр тусмаа МАН-ын гэх тодотголтой бүхэн коронавирусийн халдвар нийтэд тархсан энэ хүнд хэцүү цагт юм бүхэнд эзэн сууж, хууль, дүрэм, журмыг үл тоож байгаа гэхэд хилсдэхгүй. Үүний ганцхан тод илрэл нь өнгөрсөн долоо хоногт МАН-ынхан 100 жилийнхээ ойн албаны бус хурлыг төрийн албаныхан дунд нууцхан хийж, Тусгаар тогтнолын ордон олны хөлд дарагдсан явдал юм. Ингэхдээ хуралд оролцохоор очсон хүмүүсээс түргэвчилсэн оношлуураар шинжилгээ авсан аж.  Жирийн иргэдийг шинжилгээ өгөх гээд очихоор нь “Оношлуур дууссан” гээд буцаадаг атлаа ах намын хуралд оролцох хэчнээн зуун төрийн албан хаагчаас шинжилгээ авч байгаа нь үргүй зардал биш гэж үү.

         Тухайн үед намын дарга У.Хүрэлсүх гишүүд дэмжигчдийг олноор нь цуглуулж, цаг орчим хугацаанд лекц уншсан гэнэ. Үүнийг нь оролцогчид нь “Асуудал, шийдэл гарц гаргалгаагүй, ач холбогдолгүй номын дуу сонссон хурал болсон” хэмээн шүүмжилж байгаа дуулдана. Угтаа бол У.Хүрэлсүх Цар тахлын эсрэг хуулийг зөрчин байж өөрийнхөө Ерөнхийлөгчийн сонгуульд нэр дэвших сурталчилгаагаа явуулсан сурагтай. Учир нь, хуралд очсон хүн бүрт, төрийн байгууллагын удирдлагуудад намын дарга нь өөрийнхөө дүр бүхий марк, 100 жилийн ойн тэмдэг, мөрийн хөтөлбөр, Ерөнхий сайдаар ажиллаж байхдаа хийсэн ажлын танилцуулга зэргийг багтаасан бэлэг тараасан байна.

            Хөл хорионы үед хурал цуглаан, олон нийтийг хамарсан арга хэмжээ зохион байгуулахыг хориглоно гэх хуулийн заалт, Ерөнхий сайдын үг, тушаал, шийдвэр Монголд хангалттай олон бий.  Гэвч МАН, ялангуяа У.Хүрэлсүхэд ямар ч дүрэм, журам, хууль үйлчилдэггүй нь энэ бололтой. Угтаа бол бүтэн жилийн хугацаанд аль ч шатны байгууллага, ард иргэд төр засгийн шийдвэрийг үг дуугүй мөрдөж, өнөөдрийг хүрсэн. Хурал, цуглаан зохион байгуулах нь битгий хэл хүүхдүүдээ ч гадаа тоглуулахгүй тэсэж өдий хүрсэн. Бүр хайртай, дотны хүмүүсээ бурхан болоход буяны үйлэнд нь ч оролцож чадахгүйгээр хууль, журмыг чинь сахисан хүн хэчнээн олон байгаа гээч. Гэтэл өндөржүүлсэн бэлэн байдалд шилжиж, бүх нийтээрээ гамшгийн улбар шар түвшинд шилжсэн үед МАН-ынхан хуралдаж, өчнөөн зуун хүн цуглуулж, тэмдэг, марк гардуулж байхад тэднийг илрүүлэх, шалгах хууль хяналтын байгууллага олдсонгүй.

      Ядарч, туйлдсан, шударга бус үйлдэлтэй нь тэмцсэн, эсэргүүцлээ илэрхийлсэн иргэдээ хүчний байгууллагаар дарлуулж, байцааж, шалгадаг хэрнээ МАН-ын дарга У.Хүрэлсүхийн санаачилсан баяр ёслолын арга хэмжээ, нэг танхимд хэдэн зуун хүн суугаад хуралдах, индэр дээрээс очиж үнсэлдэж, гар барилцан тэмдэг, бэлэг сэлт өгч, авалцсан явдал таныхаар шударга ёс, үнэнд хэр нийцэх вэ, Ерөнхий сайд Л.Оюун-Эрдэнэ ээ.