Эзнээ олоогүй шагнал толгой цусддаг жишээ сүүлийн үед урлагийнхан дунд газар авлаа. Өнгөрсөн амралтын өдрүүдэд тоглолтоо хийсэн бяцхан дуучин Б.Бат-Энэрэлд Соёлын тэргүүний ажилтан цол тэмдэг олгосон нь цахим орчны дуулианы гол “бай” болов.  Балчир наснаасаа хэвлүүхэн яриа, хэрсүү зантай хүү дуу хуураараа олны хайрыг татаж, МУАЖ С.Батсүхтэй хамтран хуучны дуунуудыг сэргээн дуулснаар олны дунд эчнээ танигдсан. Ийн олны хайрыг татсан бяцхан хүү Б.Бат-Энэрэлд буруу байсангүй энэ удаад.

              Өөрөөр хэлбэл, Соёлын сайдын шийдвэр энэ удаад нүдээ олсонгүй олны талцуулав. Ингээд томчуудын хийрхэл дөнгөж, 13 настай хүүг хэл амны “бай” болгочихлоо. Засгийн газрыг төлөөлж, Соёлын яамнаас олгодог Соёлын тэргүүний ажилтан гэх төрийн шагналд Соёлын сайд цензур тавьсангүй олны дургүйцлийг төрүүллээ. Дөнгөж 13 настай балчир хүүхдэд Соёлын тэргүүний ажилтан гэх төрийн шагнал өгчихсөн. Угтаа бол төрийн дээд одон медальд тодорхойлох журам, шийдвэр гээд цагаан дээр хараар биччихсэн дүрэм, журмаа мөрдсөн үү гэх асуулт олны дунд хөвөрч байна.

       Тэгвэл тус Соёлын тэргүүний ажилтан хэмээх цол тэмдгийг олгохдоо “Шагналд нэр Соёл, урлагийн салбарт 10-аас доошгүй жил тогтвортой үйл ажиллагаа явуулж байгаа аж ахуйн нэгж, байгууллага шагналд нэр дэвшүүлж болох бөгөөд  дээрх /журмын 3.3-т заасан/ баярын өдрөөс 30-аас доошгүй хоногийн өмнө баримтаа бүрдүүлэн харьяалах аймаг, нийслэлийн соёл, урлагийн газраар дамжуулан цаасан болон цахим хэлбэрээр явуулна. Шагналыг шийдвэрлэхдээ яамны шагналын асуудал хариуцсан албан хаагч энэ журмын шаардлагад нийцсэн баримтыг шагналын асуудал хариуцсан зөвлөлөөр хэлэлцүүлнэ. Шагналын зөвлөлийн олонхийн санал авсан иргэнд сайдын шийдвэрээр шагналыг олгож, мэдээллийг яамны цахим хуудаст байршуулан, шагналыг аймаг, нийслэлийн соёл, урлагийн газар, соёлын асуудал хариуцсан төрийн захиргааны байгууллага, эсхүл тодорхойлсон байгууллагын эрх бүхий албан тушаалтанд хүлээлгэн өгнө” гэх журам цагаан дээр хараар биччихсэн, өнөөдрийг хүртэл дагаж мөрдөгдөж байна.

      Хэдийгээр дуучин Б.Бат-Энэрэлийн хувьд олны дунд хэрсүү яриа хэвлүүлэх авъяасаараа танигдсан ч “Соёлын тэргүүний ажилтан” цол тэмдэг авах хүртлээ нас тогтож, намба суугаагүй юм. Гэтэл Соёлын сайд Ч.Номин Соёлын яаманд шагналд тодорхойлуулахаар хүргүүлсэн бичиг болгон дээр гарын үсэг зурчихсан уу, соёлын үйл ажиллагаагаа бяцхан хүүгээр дамжуулж хүргэх гэсэн үү ямартай ч 13 настай хүүг цол тэмдэгээр мялаагаад энгэрт нь СТА гэсэн тэмдэг хадгалууулчихлаа.

         Ингэснээр соёлын тэргүүний ажилтан цол тэмдэгээр шагнуулсан, түүгээрээ бахархаж, бахдаж явдаг ахмад уран бүтээлчдын хөдөлмөрийг үнэгүйдүүлчихлээ. Насаараа урлагт зүтгэж, үр хүүхдээ ч өсгөхөд дэм болж чадахгүй өөрийгөө буруутгасан ч урлагийн зам хатуу гэх ганцхан үгээр өөрийгөө хуурч зүтгэсэн, зүтгэснийхээ хариу Соёлын тэргүүний ажилтан гэх тэмдэгээр цайруулж яваа мянга мянган уран бүтээлчдийн хөдөлмөр ийн өдрөөс өдөрт үнэгүйдэж байгаа.

Цаашлаад энэ цол тэмдэгээр энгэрээ мялаачих юмсан гэж битүүхэн хүлээж, хүндэлж явдаг соёл урлагт сэтгэл зүрхээ зориулж яваа олон уран бүтээлчдийн хөдөлмөрийг бас үгүй хийчихлээ, тэд. Насаараа урлаг зүтгэж, урлагт бүхнээ зориулсан буурай Соёлын тэргүүий ажилтан гэх тэмдэгээрээ гоёчихоод, түүнийгээ төрийн шагнал хэмээн дээдэлж явахад тодорхойлолт өгсөн хүн бүрд өгчсөнд нь хэчнээн гомдож суугаа бол. Үнэндээ төрийн шагналыг танилтай нь авдаг болсон олны шүүмжлэл биелэлээ олсон нь энэ байлаа.

       Харин хариуд нь бяцхан дуучин Б.Бат-Энэрэл “Миний бие гурван удаагийн тайлан тоглолт хоёр цомог 100-аад хандив тусламжийн тоглолтод оролцсон. Анхны бие даасан тоглолтынхоо орлогоо хавдартай хүүхдэд 100 хувь хандивласан болон нийслэл, дүүргээс зохион байгуулж байдаг бүхий л тоглолтонд цаг зав, сэтгэл зүрхээ зориулж чадахаараа оролцож ирсэн.  Багштайгаа хамтарсан олон тоглолт хийж, олон аймаг, сум, Солонгос, Америк улсуудаар тоглолт хийсэн. Улсаа төлөөлж Хятад, Орос улсад зохион байгуулагдсан фестивалуудад уригдан оролцсон зэргийг  минь үнэлэн МУСТА цол тэмдгээр шагнаж байгаа бол Соёлын яамандаа талархлаа. Хүүхэд учраас энэ олон хүний хэл ам дагуулсан цол тэмдэг надад хүнддэх  байх аа. Өөр хэрэгтэй хүнд нь өгнө үү. Надад Соёлын яамнаас 2021 онд гардуулсан Соёлын яамны жуух бичиг байхад л болно оо” хэмээн цахим орчинд мэдэгдээд амжив.

       Угтаа бол шагнал нүдээ олсонгүй. Соёлын сайд “шалгалтандаа” бүдэрснээс ялгаагүй боллоо. Төрийн шагналтай холбоотой тэр дундаа Соёлын тэргүүний ажилтан цол тэмдэгтэй холбоотой маргаан олны дунд байсаар ирсэн. Нэг ёсондоо төрийн шагнал эзнээ олохгүй байгаа нь үнэ цэнийг үгүйсгэж байна. Тэр байтугай монголчуудын дунд Соёлын тэргүүний ажилтан гэх цол тэмдгийг үнэгүйдүүлж байгааг шүүмжилсэн ёж үгс хүртэл газар авчихсан байх.

       Яг үнэндээ Соёлын сайд хийрхэлд бяцхан хүү л хэлмэгдчихлээ дээ.