-ХУУЛЬ БАТАЛЖ, АРД ТҮМНИЙГ ТӨЛӨӨЛӨХ ҮҮРЭГ ХҮЛЭЭСЭН ГИШҮҮДЭД УЛС ТӨРИЙН НААД ЗАХЫН СОЁЛ АЛГА УИХ-ЫН ДАРГА АА-

          Парламентад суугаа гишүүдийн тэнэгрэл хэрээс хэтэрлээ дээ. Бүхэл бүтэн Монгол Улсын хууль тогтоох дээд байгууллагад 3.6 сая иргэнийг төлөөлж суугаа 76 гишүүн гэхэд хэлж ярьж байгаа үг хэл, хийж байгаа үйлдлүүд нь дэндүү хуумгай, бодлогогүй байна. Тэднээс өндөр боловсрол, манлайлал, хүний эрхийн мэдрэмж, төлөвлөгөө, бодлого хэрэгжилт  гэж сайхан зүйл горьдоод ч хэрэггүй, ямар ч найдвар алга. Тэгэх нь байтугай ард түмнээ төлөөлж суугаагаа мартчихаад харин ч бүүр нэгнээ хэлэхийн муухайгаар хэлж, доромжлохын муухайгаар доромжилж, ад үзэж суугаа юм биш үү, манай төрийн түшээд.

        Уг нь шинэ парламент бүрдээд бүхэл бүтэн хоёр жилийн нүүр үзэх гэж байна. Харамсалтай нь, манай гишүүд хэлэх, ярих үгээ ч мэдэхгүй, хэлэлцэж байгаа хуулийн төслөө ч уншаагүй, уншсан ч ойлгодоггүй юм уу хамар доорх хагархай гэгчээр нэг бол тэнгэрт тултал магтаад нөгөө бол аманд орсноороо доромжлоод суудаг нь даанч гомдмоор. Сонгогчдодоо таалагдаж, зурагтаар л гарч байвал болох нь тэр гэж боддог гишүүд дэндүү олон байна, манай төрд.

      Ийм байхад иргэд улс орны хөгжил цэцэглэлт, итгэл үнэмшил нийгмийн өмнө хүлээсэн үүрэг, хариуцлага, зарчим гэж горьдох ч хэрэггүй юм байна. Тэдэнд ямар ч төрийн хар хүний наад захын соёл алга даа. Төрийн гурван өндөрлөгийн нэг, энэ парламентын ангийн дарга нь хүртэл нь сошиалд “поп”-рох аргаа олж яддаг боллоо.

      Ингэхдээ нохойгоороо цаг агаар шинжүүлж, түүнийгээ албан ёсны цахим хаягтаа байрлуулсан нь иргэдийн дургүйцлийг хүргэв. Нэг ёсондоо улсынхаа хууль тогтоох дээд байгууллагыг толгойлж, УИХ гэх ангийг даргалж байгаа хариуцлагатай хүн баймаар. Гэтэл цахим хаягтаа “Өглөөний мэнд. Өглөө анхны цаснаар ууланд нохойтойгоо гарч, цагийн байдлыг шинжвээс энэ өвөл хүйтрэх төлөвтэй шүү. Өвөлжилтийн бэлтгэлээ сайн хангах нь чухал юм байна” гээд хэнэг ч үгүй нийтэлж орхисон байгаа юм. Хэдий цахим хаяг нь өөрийнх нь хувийн орон зай байж болох ч улсын нүүр царай болж буй төрийн түшээд тун зохимжгүй баймаар.

         Гэтэл манай УИХ-ын гишүүд хэлэлцэх асуудлаа ч мэдэхгүй, ямар хуралдаанд орж байгаагаа ч анзаарахгүй тэс хөндлөн асуулт асууж, хөлөө олохгүй шинэ цэрэг шиг хөглөж явна даа.

        Б.Пүрэвдорж гишүүний паян дан ганц үүгээр ч зогсохгүй. Сая чуулган эхлэхээс хэдхэн хоногийн өмнө тойрогтоо уулзалт хийж, тойргийн гишүүдээ багийн төвийн улаан буланд тойруулаад суулгачихсан, том тавагтай мах идүүлж, өөрөө дунд нь дуулж байгаа бичлэг цахим орчинд нийтлэгдсэн. Уг нь Б.Пүрэвдорж гишүүн хэдхэн жилийн өмнө “Манай хөдөөнийхөн түмпэн түмпэнгээр нь хорхог хийж, мах идэж байна. Махны замбараагүй хэрэглээг халья” гээд сүрхий мэдэгдэл хийж байсан сан. Гэтэл хэлснээсээ буцаж, өөрөө мах тараачихсан сууж байгаа нь зүйд хэр нийцэх юм болдоо.