-ЕРӨНХИЙЛӨГЧ ХАРИУЦЛАГЫН СЭЛМЭЭРЭЭ ЕРӨНХИЙ САЙД, ШАДАР САЙД, ХХААХҮ-ИЙН САЙД, МХЕГ-ЫН ДАРГА ТЭРГҮҮТНҮҮДЭД ХАРИУЦЛАГА ТООЦОХЫГ ЭХЛЭЭД ХАРЪЯ-

        Өнгөрсөн арав гаруй хоногт Эмээлт зах дээр үйл ажиллагаа явуулдаг үйлдвэрүүдийн агуулах дахь мах, махан бүтээгдэхүүний бодит дүр төрх, чанар, стандарт, дүр төрхийг монголчууд нүдээрээ харлаа. Химийн бодис, элдэв амтлагч, өнгө, үнэр дарагчинд махаа угааж, шингээж хонуулдаг, хонуулдаггүй тухай дуулиан дэгдээд даруй 14 хоносон ч төр, засгийн зүгээс дорвитой шийдэл, арга хэмжээ аваагүй байна. Авсан нь, худалдааны мах химийн бодисгүй, эрүүл, өмхийрч муудаагүй эсэхийг төрийг төлөөлж МХЕГ-ын Хүнсний аюулгүй байдал, хөдөө аж ахуйн хяналтын газрын дарга Т.Балжинням, олныг төлөөлж Зариг.мн мэдээллийн сайтын эрхлэгч Н.Өнөрцэцэг, махны үйлдвэрүүдийг төлөөлж нэгэн хятад эр Эмээлт зах дахь нэгэн үйлдвэрийн үүдэнд, гудамжинд, ил задгай зогсож байгаад мах чанаж идэж, шөлийг нь ууж чанар стандарт, эрүүл аюулгүй байдлыг нь “шалгаж” үзүүллээ. Өөрөөр химийн бодистой, бодисгүй гэгдэж буй махны асуудалд гавьсан, хийсэн, авсан арга хэмжээ, хариуцлага тооцсон албан тушаалтан битгий хэл үйлдвэрийн дарга цэрэг, үүдний манаач ч алга. Хэн нэгэнд заавал хариуцлага тооцох нь чухал биш ч, үндэсний аюулгүй байдал, Монгол Улсын нийт хүн амын тэн хагасаас илүү нь амьдардаг Улаанбаатар хотын иргэдийг мах, махан бүтээгдэхүүнээр хангадаг гол захынх нь зарим эзэд химийн бодистой ч байж болзошгүй усанд бүх төрлийн махаа хадгалж, муудаж, өмхийрөхөөс сэргийлдэг нь баримтаар илчлэгдчихээд байхад хэн ч юу ч хийхгүй суусаар байгаа нь харамсалтай. ХХААХҮ-ийн сайд З.Мэндсайхан, МХЕГ-ын дарга цаашлаад Шадар сайд, Ерөнхий сайд нар монгол хүний хүнсний гол бүтээгдэхүүн болох махны чанар, аюулгүй байдлын асуудалд дорвитой арга хэмжээ авч чадахгүй байгаа юм бол Монгол Улсын Ерөнхийлөгч У.Хүрэлсүх та эдгээр албатууддаа арга хэмжээ авч өгнө үү.

               Өдгөөгөөс таван жил буюу 2017 оны аравдугаар сарын 4-ний өдөр Монгол Улсын Засгийн газрын тэргүүний тамгыг гардаж авахдаа “Би айхгүй байна. Амь насаа алдахаас ч айхгүй байна. Ганцхан ард түмний минь итгэл найдвар алдрах вий гэхээс би айж байна. ...Шударга ёсны төлөө би тун удахгүй хариуцлагын сэлэм далайна...” хэмээж байсан билээ. Тэгвэл хуйндаа таван жил “гацсан” хариуцлагын сэлэм чинь яг одоо л хэрэгтэй байна, эрхэм Ерөнхийлөгч өө. Монгол хүн бүрийн эрүүл мэндтэй холбоотой асуудлаас өөр хариуцлагаа чангатгах, хариуцлага нэхэх юу хэрэгтэй вэ.

        Сар хүрэхгүй хугацааны өмнө Ерөнхийлөгч У.Хүрэлсүх та Чуулганы индэр дээрээс “Мөнх тэнгэрийн хүчин дор Монгол Улс мандан бадрах болтугай” гэж байгаад хүнсний аюулгүй байдлыг сахин хамгаалах талаар хэлсэн, уриалсан үгс чинь халуунаараа байна.

        Тухайлбал, ...“Хүнсний аюулгүй байдлыг хангах, хүнсний бүтээгдэхүүнээр дотоодын хэрэгцээгээ бүрэн хангаж, мал аж ахуй, газар тариалангаа эрчимжүүлэн хөгжүүлж, бүс нутагтаа органик хүнс экспортлогч орон болох” зорилтыг хэрэгжүүлэхэд Та бүхний анхаарлыг хандуулахаар Монгол Улсын Ерөнхийлөгч Улсын Их Хурлын чуулганд оролцож байна. Монгол төрийн бодлогын цөмд монгол хүн, монгол өрх байж ирсэн, цаашид ч байх учиртай. Монгол Улсын үндэсний аюулгүй байдал нь монгол хүн бүрийн аюулгүй байдалтай шууд холбоотой. Хүнээ хамгаалъя, хүнээ хөгжүүлье гэвэл хүнсээ сайжруулах ёстой. Хүнс эрүүл байвал монгол хүн эрүүл байна. Монгол хүн эрүүл байвал Монгол үндэстэн хүчирхэг байна.Тиймээс Монгол Улсын хүнсний аюулгүй байдал, хүнсний хангамж, иргэдийн эрүүл зөв амьдрал, хүний бие махбодын хэрэгцээ шаардлагад нийцсэн хүнсний бүтээгдэхүүнээр хүн амыг жигд, тогтвортой, хүртээмжтэй хангах нь онцгой чухал байна” хэмээж байв.

          Ийн хэлж, амлаж, уриалж байсан хүнсний аюулгүй байдлыг сахин хамгаалах ажлаа таван жилийн өмнө монголчуудад хэлж байсан хариуцлагын сэлэмтэйгээ хослуулан, монгол хүний, монгол үндэстний эрүүл, мэнд, амь насанд заналхийлж байж болзошгүй мах, махан бүтээгдэхүүн цаашлаад хүнсний эрүүл, аюулгүй байдлыг хамгаалахад чиглэсэн дорвитой арга хэмжээ авч өгнө үү. Тэгэхгүй бол Засгийн газар, мэргэжлийн байгууллагуудыг чинь удирдаж буй хэдэн албат чинь “Тэр обьектын эзнийг олж чадахгүй байна, энэ мах өмхийрсөн өмхийрөөгүйг би чанаж идэж үзүүлье, шинжилье. Ер нь Улаанбаатар руу орж ирж байгаа бүх махны чанарт тавих хяналтыг чангаруулсан, одоо улам чангаруулна. Чиний хүн юм биш үү, тэрнийхээ үйлдвэрийг гялс цэгцлээч ээ, Удахгүй очиж шалгана шүү, өмхий самхайгаа цэвэрлээрэй” гэцгээгээд улс битгий хэл дэлхийн доог тохуу болоод сууцгааж байна.

         Нэмж сануулахад нэгэн цагт “Би ард түмэндээ худлаа хэлж чадахгүй гэж хэлсэн. Түүнийхээ дагуу үнэнээ хэлж байна” хэмээн чуулганы индэр дээр О.Баасанхүү гишүүнтэй мэтгэлцэж суусан чинь хэвлэлийн шар хуудаснаа байна. Энэ үг тань хэвээрээ бол ард, иргэдийг эрүүл, аюулгүй хүнсээр хангах асуудалд улсын Ерөнхийлөгч шиг зангарагтай, Үндэсний аюулгүй байдлын зөвлөлийн тэргүүн шиг хариуцлагатай, Зэвсэгт хүчний командлагч шиг зарчимч, шударга, чанга хатуу хандаж өгнө үү. Үгүй бол, цөөхөн монголчууд гол хүнсээрээ дамжсан элдэв хоронд хордож дуусах вий.