-БОАЖ-ЫН САЙД Н.УРТНАСАНД АГААРЫН БОХИРДЛЫГ БУУРУУЛАХ ЧИГЛЭЛЭЭР БОДИТ, СУДАЛГАА ШИНЖИЛГЭЭНД ТУЛГУУРЛАСАН, МЭРГЭЖЛИЙН ЗӨВЛӨГӨӨ ӨГӨХ, ТӨЛӨВЛӨГӨӨ ГАРГАЖ, ХЭРЭГЖҮҮЛЭХ ЗӨВЛӨХ ДУТАГДАЖ БАЙНА-

            БОАЖ-ын сайд Н.Уртнасан “Утаа их гаргаж байгаа айлуудыг дроноор дурандаж, шалгалтын ажиллагаа явуулна” хэмээн мэдээлэл өглөө. Тодруулбал, тэрбээр “Орчны бохирдлыг бууруулах үндэсний хорооноос 4500 гэрээт ажилтан шахмал түлштэй холбоотой шалгалт хийж байгаа. Шалгалтын үеэр иргэдээс “Шахмал түлш нойтон байна, үйрмэг ихтэй байна” зэрэг гомдол ирж байсан. Тиймээс шуурхай ажлын хэсэг гаргаж хяналт, шалгалт дахин хийлээ. Маргааш “Таван толгой түлш” ХХК-ийн үйлдвэрт очиж шалгалт хийнэ. Мөн Улаанбаатар хотод утааны голомт болж буй газруудад дрон нисгэж, утаа их гарч буй айлуудад очиж, шахмал түлш хэрэглэж байна уу, түүхий нүүрс болон бусад зүйлс түлж байна уу гэдгийг шалгана. Учир шалтгааныг зөв олох хэрэгтэй. Утаа ихсэж буй нөхцөл шалтгааныг зөв тогтоохгүйгээр буруу ташаа мэдээлэл тараах нь зохимжгүй байна. Тийм учраас шалгалтын ажиллагааг сайжруулж, ажиллах хэрэгтэй” гэжээ.

           Н.Уртнасан сайдын болон түүний багийнхны утааны эсрэг хийж байгаа энэ үйлдэл нь үр ашиггүй, боломжгүй зүгээр л мөнгө үрсэн ажил болох вий. Учир нь, нэгдүгээрт, утаа их гаргаж байгаа айлыг дроноор олох боломж маш бага хувьтай. Одоогийн утааны нөхцөл байдал нь дрон нисгэж, зураг авах, бичлэг хийх боломжгүй болтлоо агаарын бохирдолтой байна. Хоёрдугаарт, үзэгдэх орчин хязгаарлагдмал газарт дрон нисгэх боломжгүй байдаг билээ. Хэрэв нисгэсэн тохиолдолд эвдэрч, хэмхрэх эрсдэлтэй. Гуравдугаарт, ямар нэгэн аргаар дрон нисгэлээ гэж бодоход “Бохир утаа гаргаж байгаа айлыг олно” гэж зарлачихаад хайхаар хэн бохир утаа гаргах бол. Эсвэл сайжруулсан шахмал түлш үйлдвэрлэгчдээ “барих” юм болов уу.

           Өөрөөр хэлбэл, БОАЖ-ын сайд таныг биелэлээ олохгүй, төсвийн мөнгө үрэх үр дүнгүй, хийсвэр санаа сэдэж, мунгинаж байх хооронд хэчнээн хүний амь нас, эрүүл мэнд хүхэрлэг хорт утаанд эрсдэлд орох ёстой вэ. БОАЖ-ын сайд Н.Уртнасанд агаарын бохирдлыг бууруулах чиглэлээр бодит, судалгаа шинжилгээнд тулгуурласан, мэргэжлийн зөвлөгөө өгөх, төлөвлөгөө гаргаж, хэрэгжүүлэх зөвлөх дутагдаж байна.