Эв нэгдэл, лидергүй АРДЧИЛЛЫНХАН намаасаа ашиг хонжоо хайхгүй болсон цагтаа л дахин сэргэнэ

Б. Бадралмаа:
Улс төр- Тэрслүү үг

2021-06-11, 952

Ардчилсан нам мөхлийнхөө цэгт хүрч, 30 жилийн өмнөх цаг хугацаандаа эргэн очлоо. Гишүүд дэмжигчид төдийгүй, ардчилалд хайртай ард түмний дунд “Улс төрд хоёрдогч хүчний үүргийг гүйцэтгэж байсан энэ нам дахин сэхэх болов уу” гэх эргэлзээ ч аль хэдийн бий болсон байна. Яг өнөөдрийн нөхцөл байдлаас харахад тэдэнд эвлэрэх, нэгдэх орон зай тун бага харагдаж буй.

Нам доторх дайсагнал, “хонзон” тэднийг улс төрийн сөрөг хүчин гэдэг том орон зайгаас арчин хаялаа. Хэсэгтэй л Ардчилсан намаас ард түмэн улс төрийн шинэ өнгө аяс, сөрөг хүчний бодлого хүлээгээд нэмэргүй нь болов.

“Намын дотоод маргаанаа шийдэхгүй бол Ардчилсан намыг улс төрийн тоглоомоос бүр мөсөн гарах нь” гэж, олон хүн мөн чиг их сануулсандаа. Харамсалтай, буруу өссөн хүүхэд бухын хүзүүнээс хатуу гэгчийн үлгэрээр тэд орж, намынхаа нэр хүндийг шороотой хутгаж орхих нь тэр.

Сүүлийн хэдэн жил Ардчилсан намд ардчиллын үнэт зүйлээ хамгаалж, намынхаа нэр хүндийг бодсон нэг ч хүн байсангүй. Гагцхүү эрх мэдлийн төлөө нам дотроо дайсагналцаж, өөрсдийнхөө амин хувийн ашгаа бодсоор өнөөдөр улс төрийн тоглоомоос намаа гаргаж орхив.

Өнгөрсөн 30 жилийн хугацаанд Ардчилсан нам хүчтэй өрсөлдөгч байснаас захын хүний элэг доог болж байсан түүх үгүй гэдгийг олон хүн нотолно. Харин өнөөдөр энэ том улс төрийн хүчнийг амтай болгон муулж, ардчилалд хайртай нэг нь дэмий л халаглаж сууна. Гэтэл өнөөдрийн ийм байдалд хүргэсэн нь хэн нэгний буруу огтоос биш. Тэд өөр өөрсдийгөө л түлхэн унагаасан. Сүүлийн хоёр сонгууль дараалан ялагдаж, лидер гэгдэх томоохон нэр нөлөө бүхий улстөрчдөө “аавын хаалга” татуулчихсан нь эрх баригчдын олз болсон. Харин үлдсэн хэд нь хөнжил дотроо хөлөө жийлцэж, учраа олохгүй байсаар жижиг намын эгнээн шилжлээ. Олны дунд нэр хүнтэйд тооцогдох Л.Гантөмөр, Ж.Тэмүжин, зэрэг цөөн хэдэн улстөрчид нь намын хэрүүлээсээ залхаад чихээ бөглөөд зусландаа амар жимэр суух болсон нь ч өнөөдрийн ялагдалд буруутай гээд хэлчихэд хол зөрөхгүй. Манай фракцын хүн намыг удирдаагүй бол юу хийх вэ дээ гэсэн хүнийрхүү хандлага намыг нь юу ч үгүй сүйрүүлж орхив. Хэрэв ээ тэд С.Эрдэнэд хатуухан шаардлагат тавьж, намынхаа төлөө нэг удаа ч гэсэн хуруугаа хөдлөгдсөн бол өдийд олны дунд нэр нүүртэй байх байлаа.

Одоо тэд улс төрийн давцанд гарч, гол дүрд тоглох эрхгүй болсноор ойрын хэдэн жилдээ л нам гүмхэн эрх баригчдын үгийг үг дуугүй дагахаас өөр гарцгүй болжээ. Угтаа бол Ардчилсан намынхны хагарал МАН-д ашигтайгаар эргэж, нэг нам төрийн эрхийг бүхэлд нь гартаа оруулахад том түлхэц боллоо. Цаашдаа Ардчилсан намд зангаргатай, лидер улстөрч үгүйлэгдэж буйн том жишээ энэ болов.

Хуучин лидер гэгдэх улстөрчид нь хэт амиа бодож, ужгирсан тогтолцоо үүрлэсний гайг Ардчилсан намын залуу үе төдийгөө монголын ардчилалд хайртай хүн бүхэн амслаа. Үе үеийн намын удирдлагууд намынхаа ирээдүйн төлөө ажиллаагүйн тод жишээ өнгөрсөн гурван удаагийн сонгуулиар тодорхой харагдаж байна. Энд ардчиллыг үүсгэн байгуулагчдын гавьяа, хөдөлмөрийг огтоос үгүйсгэх гэсэнгүй. Гагцхүү тэдний өнөөгийн нөхцөл байдал нь шинэ залуу боловсон хүчнийг үгүйлж, эрс шинэчлэл хийх болсныг сануулах гэсэн юм. Түүгээр ч зогсохгүй тэдэнд эв нэгдэл, ардчиллын төлөө гэсэн нэг зорилго үгүйлэгдэж байна. Одоо Ардчилсан намынхан намаа албан тушаал, ашиг хонжоо хайдаг талбар биш гэж бодсон цагт л дахин сэргэнэ.

Өчигдөрхөн би монголын ардчиллын төлөө гээд цээжээ дэлдэж суусан их хувьсгалчид өнөөдөр МАН-д амруугаа алгадуулж, хамраа ч цухуйлгалгүй өрөөндөө бүгж сууна. Эв нэгдэлгүй, лидергүй болсон Ардчилсан намынхан өнөөдөр юу бодож суугаа бол.

Хэрэв зээ ардчиллын төлөө тэд санаа зовдог л бол өнөөдөр өвдгөө гөвөөд босоод ирэхэд оройтоогүй. Хоёр сонгуулийн үр дүнд үнэмлэхүй ялагдал хүлээж, өөрсдөдөө үлдсэн ганцхан боломжийг ч тэд хамгаалж үлдээгүйнхээ төлөө өнөөдрөөс өөрчлөлтийг эхлүүлэх ёстой биз ээ.

Эв нэгдэл, лидергүй АРДЧИЛЛЫНХАН намаасаа ашиг хонжоо хайхгүй болсон цагтаа л дахин сэргэнэ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.