Х.Баттулгын Ерөнхийлөгчийн сонгуульд УНАХ шалтгаан нь ОФФШОР дахь компани нь боллоо

Б. Цогтбаяр:
Улс төр- Ерөнхийлөгч

2021-01-09, 1932

“Улстөрчид, тэдний хамаарал бүхий этгээдүүдийн оффшорт нуусан хөрөнгийг Монголд оруулж ирнэ. Оруулж ирээгүйд нь хариуцлага тооцно” хэмээн уулзсан хүн бүртээ амлалт өгч явсаар Ерөнхийлөгч болсон Х.Баттулга өөрөө оффшор бүсэд нууц компанитай нь ил боллоо.

2016 онд Олон улсын эрэн сурвалжлах сэтгүүлчдийн консерциум Монголын улс төр, бизнесийн нөлөө бүхий 42 иргэн оффшор бүсэд данс эзэмшиж байгааг ил болгож, “Улстөрчид авлига, хээл хахуулиар авсан мөнгөө ингэж нуудаг байх нь” хэмээн улс даяараа шуугиж байлаа. Улмаар 2017 оны Ерөнхийлөгчийн сонгуулиар Х.Баттулга “Улстөрчид, тэдний хамаарал бүхий этгээдүүдийн оффшорт нуусан 17 сая ам.долларыг Монголд оруулж ирнэ” хэмээн амлалт өгч, ард түмнээс оноо авсны хүчинд Ерөнхийлөгч болсон байдаг.

Ерөнхийлөгч Х.Баттулгын оффшор бүс дэх компани ил болов уу

Өдөр тутмын сонинуудын “Эрэн сурвалжлагч нэгдэл”-ээс Ерөнхийлөгч Х.Баттулгын оффшорт байгуулсан “Женко Холдинг Пи-Ти-И” компанийн мэдээллийг ил болголоо. Монгол Улсын хуулиар оффшор бүс гэж тодорхойлсон Сингапур улсад бүртгэлтэй “Женко Холдинг Пи-Ти-И” компанийн 50 хувийг Х.Баттулгын охин Б.Намуун, үлдсэн 50 хувийг түүний бизнесийн хамтрагч, Сингапурын хятад иргэн Билли Лимын хүү Деннис Лим нар эзэмшдэг аж. “Женко Холдинг Пи-Ти-И” гэх компанийг Монгол Улсын Ерөнхийлөгч Х.Баттулга анх оффшор бүсэд байгуулсан гэх бөгөөд өөрөө захирлаар 2007 оны долдугаар сарын 31-нийг хүртэл ажиллаад өөрийн охин Б.Намуунд шилжүүлжээ.

Түүнчлэн “Женко Холдинг Пи-Ти-И” компанийг нэг сая долларын хувь нийлүүлсэн хөрөнгөтэй байгуулжээ. “Женко Холдинг Пи-Ти-И” компани нь Ерөнхийлөгч Х.Баттулгын гадагшаа гаргасан хууль бус мөнгийг угаадаг компани байж болзошгүй хэмээн эх сурвалжууд мэдээлж байна.

Тухайлбал, Ерөнхийлөгч Х.Баттулга төмөр зам барих нэрээр зарцуулсан 440 сая ам.доллараас 55 тэрбум төгрөг гадаад руу гарсан гэдэг. Жишээ нь, ҮАБЗ-ийн Нарийн бичгийн дарга А.Гансүхтэй холбоотой гэгддэг “Монгол бетон дэр”ХХК л гэхэд 10 сая ам.доллар гадагшаа гаргасан гэх бөгөөд нэг ширхэг ч бетон дэр нийлүүлээгүй байсныг хууль хяналтынхан тогтоосон байдаг. Энэ асуудлаар 2016 онд Х.Баттулга нарт эрүүгийн хэрэг үүсгэж, яллагдагчаар татсан ч 2017 оны Ерөнхийлөгчийн сонгуультай зэрэгцэн замхарсан.

Түүнчлэн Ерөнхийлөгч Х.Баттулга өөрийн үүсгэн байгуулсан “Камекс” компаниараа дамжуулан Монголын стратегийн ордуудын нэг Төгрөг нуурын ордыг Кайманы арлын оффшор бүсэд бүртгэлтэй, хятад эзэнтэй Мин Шин Уотервокс Лимитед компанид 250 сая ам.доллараар зарсан гэх мэдээлэл гарч байсан. Тодруулбал, Х.Баттулга “Камекс”ХХК-ийг үүсгэн байгуулж, тус компанийнхаа нэр дээрээ нүүрс, зэсийн 17 лиценз авсны нэг нь Төгрөг нуурын орд байсан гэдэг. Тухайн үедээ тус компанийн 90 хувийг Х.Баттулга өөрөө эзэмшиж, Ядамсүрэнгийн Батсүх 10 хувийг нь эзэмшиж байсан. Улмаар Төгрөг нуурын ордын зарсан ул мөрөө далдлахын тулд “Камекс”ХХК-ийн дээр толгой компани болгож, “Камекс Пи-Ти-И”нэртэй Сингапурт бүртгэлтэй компанийг байгуулсан гэдэг. Тэгвэл “Камекс Пи-Ти-И” компани нь одоо ил болоод байгаа “Женко Холдинг Пи-Ти-И” компаниас оффис түрээслэж нэг дор үйл ажиллагаа явуулдаг гэдгийг эх сурвалжууд мэдээлж байна.

Ингээд харвал Ерөнхийлөгч Х.Баттулгын үүсгэн байгуулж, охин Б.Намуундаа шилжүүлсэн Сингапурт бүртгэлтэй “Женко Холдинг Пи-Ти-И” компани нь түүний төмөр замын 440 сая ам.доллар, Төгрөг нуурын ордын 250 сая ам.доллар гэх мэт мөнгүүдийг “угаадаг” байсан байж болзошгүй байгаа аж.

“Би оффшор дансгүй”, “Улс төрчдийн оффшорт нуусан мөнгийг монголд оруулж ирнэ”

Өнгөрсөн хугацаанд “Оффшор бүс” гэж хамгийн их ярьсан хүн бол Ерөнхийлөгч Х.Баттулга. Өөрөөр хэлбэл, “Оффшор бүс” хэмээх сэдвийг өмчилж авч, улс төрийн карьераа өсгөхөд ашигласан гэхэд хилсдэхгүй. Тэгвэл оффшор бүсийн тухай, тэнд мөнгөө нуусан хүмүүсийн тухай, хариуцлагын тухай Х.Баттулга өнгөрсөн хугацаанд юу ярьж байсныг эргэн саная.

Нэгдүгээрт, Тэрбээр Ерөнхийлөгч болмогцоо “Монгол Улсын Ерөнхийлөгч Х.Баттулга миний бие оффшор бүсэд данстай улстөрчид, төрийн албан хаагчид, тэдний хамаарал бүхий этгээдүүдэд хандан 2017 оны долдугаар сарын 24-ний өдрөөс хойш 49 хоногийн дотор оффшор дансаа хааж, тэнд байршуулсан мөнгөн хөрөнгөө Монголын банкинд оруулж ирэхийг уриалж байна” хэмээн сүр дуулиантай мэдэгдэж байсан. Түүний тогтоосон энэ хугацаанд 70 гаруй сая ам.доллар л монголд орж ирсэн гэх мэдээлэл бий. Харин бусад мөнгө нь хэзээ ирэх нь тодорхой бус байсаар байгаа.

Тэгвэл Ерөнхийлөгч Х.Баттулга өөрөө оффшор бүс буюу Сингапурт “нуусан” мөнгөнүүдээ оруулж ирэх хэрэгтэй болж байна. Хэрвээ өөрөө мөнгөө оруулаад ирчихвэл бусад ч оруулаад ирэх юм бил үү.

Хоёрдугаарт, Манай улс 2017 онд нийтийн болон хувийн ашиг сонирхлын тухай хуульд нэмэлт оруулж, төрийн албан тушаалтнуудын болон түүний хамаарал бүхий этгээдэд оффшор бүсэд өмч хөрөнгө, компанитай байхыг хатуу хориглосон. Энэ хуулийг зөрчсөн бол төрийн ямар ч албан тушаалтныг эргүүлэн татах буюу огцруулах арга хэмжээ авахаар тогтоосон байдаг. Хууль тогтоомжтой холбогдуулан Ерөнхийлөгч Х.Баттулга “Оффшор бүсээс Монголын банкууд руу татагдаагүй мөнгөн хөрөнгө, түүнийг эзэмшигчдийн асуудлыг холбогдох хуулийн дагуу илрүүлэн илчилж, зохих хариуцлага хүлээлгэх нь шударга ёсонд нийцнэ хэмээн үзэж байна” хэмээн мэдэгдэж байсан. Тэгвэл өөрийнхөө энэ мэдэгдлийг дагуу өөртөө хариуцлага тооцуулах нь жинхэнэ шударга ёсонд нийцэх үйлдэл болно.

Гуравдугаарт, 2018 оны хоёрдугаар сарын 11-нд Ерөнхийлөгч Х.Баттулга Хөвсгөл аймгийн Мөрөн сумын иргэдтэй уулзалт хийх үеэр иргэн н.Ганбаатар “Та оффшорт бүсэд данстай юу” хэмээн асуусан байдаг. Монгол Улсын Ерөнхийлөгч Х.Баттулга хариуд нь “Сая иргэн н.Ганбаатар надаас та оффшор данстай юу гэж асууж байна. Хэрвээ надад тийм данс байсан бол эрх мэдэлтэй хүмүүс гаргаад л ирэх байсан. Сонгуулийн үед тэдэнд эрх мэдэл, цаг хугацаа хангалттай байсан. Надад тийм данс байхгүй гэдгийг хэлмээр байна. Өөрөө оффшортой тэмцэж байж өөрөө оффшортой байж болохгүй биз дээ” гэж хэлж байсан. Гэтэл тэр оффшор бүс гэж тодорхойлогдсон Сингапурт компанитай, тус компанийг нь төрсөн охин нь эзэмшдэг болох нь батлагдлаа. Тиймээс ард түмэнд “Би оффшор дансгүй” гэж мэдэгдэж явснаа залруулж, худлаа ярьсандаа уучлал гуйх ёстой.

Дөрөвдүгээрт, Монгол Улсын Ерөнхийлөгч Х.Баттулга хэдхэн хоногийн өмнө буюу 2020 оны арванхоёрдугаар сарын 31-нд ард түмэнд мэндчилгээ дэвшүүлэх үеэрээ “ Сүүлийн гурван жилийн хугацаанд хууль хяналтын байгууллагын нийт албан хаагчид маань олигархуудын оффшор бүсэд нууцалсан асар их хэмжээний хууль бус хөрөнгийг нь илрүүлж, буух эзэнтэй, буцах мөртэй эзэн холбогдогчдыг нь тогтоосоор байна” хэмээн мэдэгдсэн. Гэвч тэрбээр өөрийнхөө оффшор дахь хөрөнгө буюу Сингапур улсад бүртгэлтэй “Женко Холдинг Пи-Ти-И” компанийнхаа тухай нэг ч тайлбар хэлээгүй байгаа юм.

Х.Баттулгын Ерөнхийлөгчийн сонгуульд УНАХ шалтгаан нь ОФФШОР дахь компани нь боллоо

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.