ХҮН-ыг орон нутгийн сонгуульд оролцуулахгүй гэх шийдвэрийг Захиргааны хэргийн шүүхээс гарсан талаар бид өчигдөр мэдээлсэн. Тэгвэл энэ талаар тус намын удирдлагууд өнөөдөр энэ талаар мэдээлэл хийлээ.

ХҮН-ын дарга Б.Найдалаа “Манай намыг нийслэлийн ИТХ-ын сонгуульд оруулахгүй байх улс төрийн захиалгат ажиллагаа явуулж байна. Өчигдөр энэ шийдвэр гарч шүүгчийн захирамжаар бидний сонгуульд оролцох эрхийг түдгэлзүүлжээ. Бид сонгуульд оролцох баримт бичгээ хууль ёсны дагуу бүрдүүлсэн. Манай нам дотроо хагаралгүй байгаа. Өнөөдрийн энэ асуудал зөвхөн манай намын сонгуульд оролцох үгүй асуудал биш юм. Монгол Улс ардчилсан улс мөн үү, цаашид сонгууль явах уу үгүй юү гэдэг асуудал үүсээд байна” гэлээ.

УИХ-ын гишүүн ХҮН-ын гишүүн Т.Доржханд “Монголд ардчилал яаж тогтох вэ. Аливаа улсад ардчиллаа бэхжүүлэх сонголтыг сонгуулиар хийдэг, Үндсэн хуульд иргэн бүр сонгох, сонгогдох эрхтэй гэж заасан байдгийг нэг шүүгч ноцтойгоор, захиалгатай зөрчиж байна. Бид энэ удаа ардчиллаа хамгаалах цаг болжээ. УИХ-ын сонгууль сонгууль мөн, орон нутгийн сонгууль дагавар хүүхэд шиг байж болохгүй. Шат шатны сонгуулиуд ардчилсан зарчмаар явах ёстой, нийслэл, орон нутгийн удирдлагаа сонгодог чухал сонгууль. Сонгох, сонгогдох эрх нь иргэдэд байх ёстой. Хэрэв ийм байдлаар явбал 2021 онд Ерөнхийлөгчийн сонгууль ч болохгүй гэдгийг анхааруулж байна. Бид энэ асуудлыг 24 цаг  шийдэх хугацаа өгье. Хэрэв биелүүлэхгүй бол бид тэмцлийн хурц шат руу шилжинэ. Маш тодорхой хэлэхэд АН МАХН, ШИНЭН-тэй нэгдэж орон нутгийн сонгуульд орж байгаа. Биднийг мөн нэгдэх санал тавихад бид хэн нэгнийг ялахын тулд хүчээр хамтарч болохгүй, үнэт зүйл зарчим дээрээ суурилж явна гэсэн хариултыг өгсөн. Харамсалтай нь, энэ хүмүүс шүүхийг ашиглаж байна гэж харж байгаа. Үүний цаана Монгол Улсын Ерөнхийлөгч байна гэж хардаж байна. Х.Баттулга Ерөнхийлөгч 2021 онд дахин Ерөнхийлөгч болно гэж бодож, бүх улс төрийн хүчнийг өөрийн тоглоомын дүрмээр явуулна гэвэл үгүй шүү. Бид хэний ч хараат бусаар шийдвэрээ гаргаад явна” гэв.