Монгол Улсын дараагийн Ерөнхийлөгч хэн байх вэ. Энэ асуултын хариу ердөө гурван сарын дараа шийдэгдэх гэж байна. Ээлжит сонгуульд дөрвөн хүн нэр дэвших эрхтэй. Өөрөөр хэлбэл, УИХ-д суудалтай дөрвөн намын төлөөлөл сонгуульд нэр дэвшигчээ өрсөлдүүлнэ гэсэн үг. Гэвч гол өрсөлдөөн уламжлал ёсоор МАН АН хоёрын дунд өрнөх нь гэх таамаг иргэдийн дунд яваад эхэлжээ. Харин хэн хэний эсрэг өрсөлдөх вэ гэдэг нь хамгийн анхаарал татсан сэдэв болоод буй.
Эрх баригч намыхан ээлжит сонгуульд их ач холбогдол өгч, намын гишүүддээ тус бүрд нь даалгавар хүлээлгэсэн гэх. Уг нь МАН-ын талд төрийн аппарат бүтнээрээ ажиллаж, өрсөлдөгч нам нь дотроо хагаралтай байгаа гээд давуу тал ихтэй ч тэд цаанаасаа л нэг айдастай байх шиг.
МАН-ын генсек Б.Амарбаясгалан оны өмнө намаасаа нэр дэвших боломжтой хэд хэдэн хүнийг нэр зохож зарласан. Түүний нэрлэснээр Монгол Улсын Ерөнхийлөгчийн сонгуульд Ерөнхий сайд асан У.Хүрэлсүх, УИХ-ын дарга Г.Занданшатар, УИХ-ын гишүүн С.Батболд, ЗГХЭГ-ын дарга Ц.Нямдорж, УИХ-ын гишүүн асан Ө.Энхтүвшин нар өрсөлдөх боломжтой. Д.Амарбаясгалангийн эл мэдээллийн дараа “Ц.Нямдоржийг улс төрөөс арай гэж явуулсан буцааж авч болохгүй, Сү.Батболд оффшорчин Г.Занданшатар хэтэрхий унж дорой” гэх сэтгэгдлүүд хөвөрч, олонх нь иргэдийн таалалд нийцээгүй.
Гагцхүү тухайн үед Ерөнхий сайдын албыг хашиж байсан У.Хүрэлсүх рейтинг өндөртэй байв. Уг мэдэгдлийг “У.Хүрэлсүхийн нэр хүндийг өсгөх явуулга ч байж мэднэ” гэж хардах нэгэн ч байсан. Харин өнөөдөр эрх баригч намынхан тохиролцоонд хүрч, Ерөнхийлөгчийн сонгуульд хэнийг сойхоо эцэслэсэн бололтой.
Намын удирдлагууд сүүлийн үед ойр ойрхон нууц уулзалт зохион байгуулах болсон гэх мэдээлэл цахимд түгэх болсон. Хэд хэдэн удаагийн уулзалтад намын дарга У.Хүрэлсүх, Ерөнхий сайд Л.Оюун-Эрдэнэ, намын генсек Д.Амарбаясгалан нар голлон оролцож, саяхнаас албан тушаалаа хуваарилж дууссан гэх бор шувуу намын байраар нисэх болжээ. Угаасаа МАН-д нөлөө бүхий гол тоглогчийн үүргийг тэд гүйцэтгэж буй. Хамгийн сүүлийн уулзалтаараа У.Хүрэлсүхийг Ерөнхийлөгчийн сонгуульд сойхоор санал нэгдсэн гэнэ. Мөн энэ үеэр эрх баригч намд “Ерөнхий сайд нь намын дарга байна” гэдэг дүрмээ өөрчилж, Л.Оюун-Эрдэнийг намын даргын албан тушаалаас нь түр хойшлуулахаар болсон сурагтай. 100 жилийн ойн тэмдэглэлт өдөр буюу гуравдугаар сарын 1-нд намын Их хурлаараа намын даргаа сонгож, Ерөнхийлөгчийн сонгуульд нэр дэвшигчээ тодруулах байсан ч хурлаа хойшлуулж, Бага хурлаараа дээрх асуудлуудыг шийдвэрлэхээр болсон юм. Гэвч намын удирдлагууд нууц уулзалтаар асуудлаа нэг тийш болгож, сонгуулийн кампанит ажилтай шуурхайлах ажил руугаа ханцуй шамлан орсон гэнэ.
У.Хүрэлсүх Ерөнхийлөгчийн сонгуульд өрсөлдвөл намын даргаар одоогийн МАН-ын нарийн бичгийн дарга Д.Амарбаясгаланг томилох тохироо хийжээ. МАН-ын өнөөгийн амжилтыг Д.Амарбаясгалантай салшгүй холбоотой гэж улс төрийн хүрээнийхэн үздэг учир ийн дараагийн даргад яригдаж эхэлсэн байна. Засгийн газар солигдоход түүнийг шинэ Засгийн газарт сайдаар томилогдоно гэх таамгууд хөрөвч байсан. Харин Д.Амарбаясгалан үүнийг нь үгүйсгэж, сайд болох амбицгүй гэдгээ илэрхийлсэн. Тэрбээр “МАН-ын Ерөнхий нарийн бичгийн даргын хувьд намын шинэчлэлийг өндөр түвшинд аваачиж, ард түмэн улс төрийн намын шинэчлэлийг алга ташиж хүлээж авах хүртэл Ерөнхий нарийн бичгийн даргын үүргээ гүйцэтгэнэ” гэсэн удаатай.
Энэ нь дээд албан тушаалаас татгалзсан анхны тохиолдол нь биш юм. Өнгөрсөн намар хотын даргад өрсөлдөгчдийн нэр тодроход түүний нэр нэлээд дээгүүрт нэрлэгдэж байсан. Гэвч тухайн үед Д.Амарбаясгалан "МАН-д эхлүүлсэн шинэчлэлээ үргэлжлүүлэх шаардлага бий. Улс төрийн нам ард түмнийхээ дунд өндөр нэр хүнтэй, өндөр зарчимтай, шударга ажилладаг болохын төлөө бид эхлүүлсэн ажлаа дуусгана. Тиймээс би намын ерөнхий нарийн бичгийн даргаараа үргэлжлүүлж ажиллана" гэх тайлбарыг өгч байв. Удаа дараа албан тушаалаас татгалзсан тэрбээр намдаа Ерөнхийлөгчийн суудал авчрах том амлалт өгсөн бололтой.
У.Хүрэлсүх Ерөнхийлөгчийн сонгуульд өрсөлдөж, түүнийг ажлыг Д.Амарбаясгалан хүлээж авах уу |
|