Н.Номтойбаяр эвсэл байгуулж, улс төрд эргэн ирж байгаагаа саяхан зарласан. Өнгөрсөн сонгуулиар бие даан нэр дэвших эрхээ өвөртлөөд сонгуулийн кампанит ажлынхаа үеэр хэцүү нэрт рүү  ачигдсан тэрбээр энэ сонгуулиар даагаа нэхнэ. Нэхэх нэхэхдээ МАН-ын одоогийн удирдагч нарыг “Хорхойтой араандаа зууж”, нэхэл хатуутайхан үзэх гээд тун дуулиантай байгаа сурагтай Ирэх сонгуулиар дахин олонх болох гэж зүтгэж буй МАН-ынхан дунд тооцоолоогүй санал гарч ирсэн нь Н.Номтбаяр тэргүүтэй, Үндэсний эвслийнхэн байв.

       Тэд МАН-ын саналыг хуваагаад зогсохгүй МАН-ын хуучин гишүүдийг нэгтгэж, МАН-д гомдогсод Үндэсний эвсэл рүү хошуураад эхэлсэн гэх. Өөрөөр хэлбэл, намдаа гомдсон МАН-ын хууччуул Н.Номтойбаярын эвсэлд нэгдэж, нэр дэвших эрхээ  өвөртлөхөөр дугаарлаж эхэлсэн гэх яриа улс төрийн хүрээнийхэн дунд өрнөх боллоо. Түүгээр ч зогсохгүй Н.Номтойбаярын ард М.Энхболдын бүлэглэл хүчээ авч, М.Энхболд улс төрд эргэж ирэхээр бэлтгэлээ хангачихсан гэх. Дүү нартаа гомдсон М.Энхболд улс төрөөс бүр мөсөн яваагүй гэдгээ энэ сонгуулиар харуулахаар тунчиг завгүй яваа гэнэ.

       Харин өнгөрсөн сонгуулийн өмнө  дуулиан, шуугиантайгаар аавын хаалга татсан Н.Номтойбаяр гарч ирмэгцээ “Та бүгд сайн байна уу. “Улс төрийн хөл хорио”-нд 307, ажилласны шагналд 57 хоног авч хилс ялыг шоронд дуусгав. Надад итгэсэн баярлалаа. Таны зөв гэдгийг би удахгүй батална. Би та бүгдийн адил сураггүй болсон шударга ёс, шуналгүй, өсгүй, ёс зүйт улс төрөөр маш их цангаж байна” хэмээн мэдэгдэж, улс төрд дахин орж ирэхээ зарласан. Хэдийгээр хэцүү нэртээс гарч ирснээсээ хойш улс төрийн дуулиан шуугианаас хол, спорт сонирхсон шиг ээ явж байгаа тэрбээр сонгуулийн үеэр шинэ дуулианы эзэн болох бэлтгэлдээ ороод байгаа.

       Өөрөөр хэлбэл, өнгөрсөн сонгуулиас хойш чимээгүй байсан МАН дахь 32 бүлэглэл буюу М.Энхболд тэргүүтэй “60 тэрбумын” фракцынхан амь орох гээд улс төрийн уулзалтууд хийж, сэм уулзалдах болсон. М.Энхболдыг УИХ-ын даргын суудлаа хүлээлгэж эхэлснээс хойш намынхандаа гадуурхагдаж, олонх нь нэр дэвших эрхээ өвөртлөж чадаагүй. Нэг хэсэг нам дотроо сөрөг хүчин болох хүртлээ хүчтэй байсан 32 –ынхон ирэх сонгуулиар парламентад сөрөг хүчин болох том зорилготой байгаа гэх яриа улс төрийн хүрээнийхэн дунд өрнөх болов. Өмнөх сонгуулиар М.Энхболдын бүлэглэлээс олонхыг нь нэр дэвшүүлэлгүй хаалганы гадна үлдээж, Төрийн өмчит компанийн захиралд томилохыг нь томилж, ам хаасанд нь 32-ын бүлэглэлийнхэн ихэд дургүйлэхсэн гэх.

        Улс төрөөс завсарлага аваад байсан М.Энхболдын бүлэглэлийнхэн өнгөрсөн сонгуулиар буланд шахагдаж байсан бол ирэх сонгуульд АН-ын оронд сөрөг хүчин болж гарч ирэх гээд сандаргаж байгаа нь энэ аж. Хэдий Үндэсний эвсэл Монголын ногоон нам сонгуульд өрсөлдөж, хоёрдогч хүчин болдоггүй юмаа гэхэд ХҮН-ын орон зайд орж ирэх гээд МАН, АН-ын одоогийн удирдлагуудыг барьц алдуулж байгаа гэх. Өөрөөр хэлбэл, ХҮН-аас илүү санал авах магадлалтай байгаагийн дээр Н.Номтойбаярын баг МАН, АН-ын сонгуулийн саналыг хуваах магадлал өндөр байна.

        Түүнээс гадна Хөгжлийн банк, Нүүрсний хулгайд нэр холбогдож, туг тахиулсан хэсэг гишүүд Н.Номтойбаярын эвсэл рүү хошуурцгааж, найр тавьж эхэлсэн гэнэ. Өөрөөр хэлбэл, Хөгжлийн банкны хэргээр шүүхээс ял сонссон УИХ-ын гишүүн Ё.Баатарбилэг Н.Номтойбаяртай нэг танхимд ажиллаж байсан. Намынхан дундаа 32-ын бүлэглэлд багтдаг хэмээн сүүлд Хөгжлийн банкны хэргээр туг тахиулсан тэрбээр ирэх сонгуулиар Н.Номтойбаярыг бараадахаар хаяагаа манаад эхэлсэн гэдэг. Түүнчлэн УИХ-ын гишүүн асан Д.Хянхярваа тэргүүтэй өнгөрсөн сонгуулиар нэр дэвших эрхээ хасуулсан МАН-ын гишүүд ирэх сонгуулиар Үндэсний эсвэлийг бараадах бэлтгэлээ базааж эхэлсэн байна.

Н.Номтойбаярын тэргүүлсэн Үндэсний эвсэлд АН-аас С.Эрдэнэ, Д.Эрдэнэбат нар нэгдэж магадгүй гэх таамагууд ч өрнөөд эхэлсэн.

      МҮАН тэргүүтэй МҮНН зэрэг Үндэсний эвсэлд нэгээд буй намууд Н.Номтойбаяраар эвслээ удирдуулсан нь учиртай. Улс төрийн нөлөөллөөрөө дээгүүрт бичигддэг тэрбээр яалт ч үгүй Үндэсний эвслийн гол санхүүжүүлэгч болох нь. Үүнийг ч МАҮН-ыэ дарга Б.Цогтгэрэл зарлаж байлаа. Олон жилийн сонгуулиар ялагдал хүлээж, халаасны нам гэгдэж ирсэн МАҮН зэрэг УИХ-д суудалгүй намууд Үндсэн хуулийн өөрчлөлтөөр гишүүдийн тоо нэмэгдсэн даруйд парламентад суудал горилж эхэлсэн нь ч нууц биш. Тиймдээ ч цагтаа МАН-ын урдаа барьдаг залуучуудын нэг гэгдэж явсан Н.Номтойбаяр тэргүүтэй улстөрчдийг бараадаж, бөөрөнд нь наалдаж, суудал горилж эхэлсэн нь энэ бололтой.

Гэвч начир дээрээ улс төрийн жижиг намуудыг нэгтгэсэн Үндэсний эвсэлийн ард М.Энхболд тэргүүтэй нэгэн цагт МАН-ын хаан шиг явсан улстөрчид нуугдчихаад улс төрд ширүүхэн тоглолт өрнүүлэхээр бэлтгэлээ базааж байна. Ийн ирэх хаврын улс төр улам бүр сонирхолтой болох нь.