Торгон дээл өмсөж, тогос шиг гоёод найр наадмын хойморт хүндлүүлдэг хэрнээ хүнд хэцүү цагт хамраа ч цухуйлгахгүй алга болчихдог УИХ-ын эмэгтэй гишүүдийг хайж байна, энэ цаг үед.

      Уг нь одоогийн УИХ-д 13 эмэгтэй гишүүн төрийн үйл хэрэгт оролцож, түмэн олныхоо өмнөөс шийдвэр гаргалцаж, хууль сахиулах үүрэг хүлээчихсэн. Тэр ч бүү хэл энэ том хариуцлагыг хүлээгээд бүхэл бүтэн гурван жилийн нүүрийг үзчихсэн байна. Гэвч начир дээрээ энэ удаагийн парламентын эмэгтэй гишүүдээс “Энэ л нэг зөв зүйтэй санаачилга гаргачихсан. Ийм л хууль хэрэгтэй хуулийг санаачлан батлуулчихсан. Эмэгтэй гишүүдийн нэгдэж нийлсэн энэ санаа Монголын ирээдүйд хэрэгтэй шийдвэр байлаа” гээд шүүрээд  авчих нэг ч санаачилгатай, самбаатай гишүүн гарч ирсэнгүй, энэ гурван жилийн хугацаанд.

        Тэр байтугай эмэгтэй гишүүдийн хийсэн ажил хэлсэн үг нь ард түмний дунд доог тохуу болж,  торгоны хээг хуульчлах, томчуудаас хамгаалж шүгэл үлээхийг заахаас гавихгүй хуулиуд ярьсаар өнөөдрийг хүргэлээ. Өөрөөр хэлбэл, энэ удаагийн парламентад түмний дундаас тодорчих жаатай улстөрч эмэгтэй нэг ч тодорсонгүй гэдэгтэй санал нийлэх биз ээ, ард түмэн. Ёстой л зассан зам, гаргасан жимээрээ урагшилсаар бүрэн эрхийнхээ хугацааг дуусгах нь дээ тэд. Үнэхээр өнөөдөр Монголын улс төрд бусдыгаа манлайлж, үлгэр дуурайл болчихоор нэг ч эмэгтэй гишүүн байхгүй нь өнгөрсөн хэдхэн хоногт өрнөсөн олон үйл явдлаас тодорхой харагдаж байна.

      Тодруулбал, өнгөрсөн амралтын өдрүүдэд нийслэлд орсон аадар борооны улмаас таван хүн үерийн усанд үйж, тэр дунд нь хоёрын хоёр бяцхан зүрх зогсов.  Түүнчлэн нэг дүүргийн гурван хорооны иргэд тэр чигтэй усанд автаж, орох орон оочих аягагүй толгой өөд татах сэхэлгүй шавартай ноцолдож, усанд урссан гэрээсээ хүнд хэрэгтэй нэг аяга ч болов аваад үлдэх сэн гэсээр бүтэн хоёр өдөр амсхийх чөлөөгүй өнжлөө. Өнгөрсөн сарын хугацаанд аадар борооны улмаас үерийн гамшиг хаа сайгүй нүүрлэж, иргэд тэр дундаа бага насны хүүхдүүд амиа алдсан харамсалтай үйл явдал ээлж дараалан гарсан.

        Хэрэв зээ үнэхээр тийм сүйхээтэй эмэгтэй улстөрч байсан бол өнөөдөр энэ бүх байгалийн гамшигийг үед төр төлөөлж, хууль сахиулж байгаа хүний хувьд Засгийн газраас, хариуцсан алба хаагчдаас хариуцлага нэхээд даналзаад сууж  байлаа. Үгүй ядаж, Засгийн газраас хариуцлага нэхэж чаддаггүй юм аа гэхэд “Ард түмний амьдралд дэм болъё” гээд уриалга гаргаад, улс төржсөн шоу хийгээд ч хамаагүй ард түмний нүдэнд өртчихсөн гүйж явах байв. Үгүй ядахнаа хэдэн мянган дагагчтай фэйж хуудас, твиттер хаяг дээрээ амиа алдсан хүүхэд, эмэгтэйчүүдийн төлөө эмгэнэл ч болов гаргах байв. Гэвч хаврын чуулган хаахтай зэрэгцээд л УИХ-ын гишүүд “Хоёр яс саллаа” гэсэн шиг хэдэн тийшээ тарж, өнөөдрийг хүртэл нүдэн балай, чихэн дүлий чимээгүй алга болчихсон нь нууц биш юм.

        Ийм л хүнд үед УИХ-ын гишүүд хаана нь чухам хариуцлага алдаж, хэний буруутай үйлдлээс ийм их хэмжээний хохирол гарав. Хэн үүнд хариуцлага хүлээх вэ гэдгийг шүүгээд, хэлэлцүүлээд ард түмэндээ дэм болог гэж сонгож, төрд төлөөлж явуулсан байлтай. Хатуухан хэлэхэд ийм нөхцөл байдалд УИХ-д эмэгтэй гишүүдийг ч сонгоод нэмэр байхгүй юм байна. Юун дэлхийн жишигт нийцэх, жендерийн тэгш эрхийг хангах, улс төрд эмэгтэй гишүүдийн оролцоог нэмэгдүүлэх, эмэгтэйчүүдийн эрхийг хамгаалах.

     Уг нь ийм хүнд цаг үед “Хүүхдийн эрх, хүний эрхийг соргогоор харж, асуудлыг эмэгтэй хүний холч ухаан, эх хүний нинжин сэтгэлээр шийднэ дээ. Түүнийхээ төлөө шийдвэр гаргана даа” гэж итгэсэндээ мянга мянган эхчүүд, ээжүүд УИХ-д эмэгтэйчүүдийг төрд төлөөлөл болгож явуулдаг байлтай. Гэтэл УИХ-д суугаа 13 эмэгтэй гишүүн кнопны эрх мэдлээс хэтрэхгүй, өөрийн гэсэн үзэл санаатай нэг ч үйл хийхгүй  байсаар өдийг хүргэж байна даа.

      Ийм хүмүүсээс иргэд улс төрийн манлайлал, улстөрчийн зангараг, горьдоод, хүлээгээд ч хэрэггүй юм байна. Үнэн хэрэг дээрээ үе үеийн Сонгуулийн хуулийг хэлэлцүүлэхэд манайх эмэгтэйчүүдийн квотыг нэмэгдүүлэхийг зорьж, сонгууль болгоноор эмэгтэй гишүүдийн тоог нэмэх, жендерийн тэгш харилцааг хангах шаардлага тавьж  түүнийх нь төлөө эмэгтэйчүүд тэмцэж ирсэн. Тийм дээ ч үе үеийн сонгуулиар эмэгтэй гишүүдийн тоо нэмэгдэж, анхны парламентад гуравхан эмэгтэй гишүүн байсан бол өдгөө 13 болж өссөн байна. Түүнчлэн 2012 оны сонгуулийн үеэс жендерийн тэгш эрхийг хангах, эмэгтэйчүүдийн оролцоог нэмэгдүүлэх асуудлыг ярьж, үр дүнд нь УИХ-ын 76 гишүүний 20 хүртэлх нь эмэгтэй байх шийдвэр гаргасан бол өнгөрсөн хаврын чуулганаар хэлэлцсэн Үндсэн хуулийн өөрчлөлтөөр эмэгтэйчүүдийн квотыг 40 хүртэлх хувиар нэмэгдүүлэх шийдвэр гаргаж, 2028 оноос хэрэгжүүлэхээр болсон.

        Харамсалтай нь, тэр итгэл, тэмцэл нь эцсийн дүндээ хэнд ч хэрэггүй, ямар ч үр дүнгүй байгаа нь эндээс бэлэхнээ харагдаж байна. Өөрөөр хэлбэл, дараа дараагийн сонгуульд дээр хэлсэнчлэн кнопны эрх мэдлээс хэтрэхгүй, томчуудынхаа гар хөл болчихсон, нийт ард түмний төлөө биш юм аа гэхэд хүүхэд эмэгтэйчүүдийнхээ төлөө ч дуугарч чаддаггүй бахь байдгаараа бусдаасаа ялгарахгүй эмэгтэй гишүүд Их хуралд суувал эмэгтэйчүүдийн квот нэмэгдээд ямар хэрэггүй, үр дүнгүй гэдгийн тод жишээ энэ боллоо.

      Хэдийгээр байгалийн давагдашгүй хүчин зүйлтэй нүүр тулж, амаргүй цаг үеийг өнгөрөөж байгаа ч энэ цаг үед хэн үнээс илүү, сэтгэлийн дэм, урмыг үг хэрэгтэй байна.

    Ийм хүнд цаг үед иргэдэд тулгамдсан асуудлыг нь тэр дор нь шийдэж өгөх боломж байдаггүй юм аа гэхэд “Хүнд цагт хамт байна, тэсээд гараарай” гээд сэтгэлийн дэм ч болов өгөх эмэгтэй гишүүд үгүйлэгдэж байна даа ард түмэнд. Үнэхээр л улс орны эрх ашгийн төлөө ажиллахад хүч нь хүрдэггүй хаагдмал, боогдмол байдаг бол энэ мэт нийгмийн жижиг асуудалд ч гэсэн анхаарал хандуулж, эмэгтэйчүүддээ улс төрийн манлайлал гэдгийг харуулмаар байна. Өөрөөр хэлбэл, ард түмэн тэр дундаа эмэгтэйчүүд, ээжүүд элдэв гамшиг, эрсдэлт өвчин, зовлонгийн ийм хүнд цаг үед хамгийн түрүүнд сэтгэл нь өвдөж, тусламжийн гар, энэрлийн сэтгэлээ ард түмэнд дэлгэх учиртай хүмүүс нь эмэгтэйчүүд байна гэж УИХ-д 13 эмэгтэй гишүүнийг илгээсэн юм шүү дээ. Уг нь бол УИХ-д сонгогдсон эмэгтэй гишүүд анх ард түмэнд ямар амлалт өгч, ямар сайн сайхан зүйл ярьж одоогийн эрх мэдэлд хүрсэн билээ. Хэлсэндээ хүрдэггүй юм аа гэхэд хүнлэг баймаар байна эмэгтэй гишүүдээ.