• Өнөөдөр 2024-03-29

СҮРЖИН ЭХЭЛЖ, ДАРЖИН ДАРАГДДАГ МАН-ЫН ЭЭЛЖИТ ТУНХАГ БУЮУ “ШУВУУ” АЖИЛЛАГАА

2023-03-08,   582

-ЖДҮ, "60 ТЭРБУМ"  ТӨГРӨГИЙН ХЭРГҮҮД НҮҮРСНИЙ ХУЛГАЙ, ХӨГЖЛИЙН БАНКНЫ ХЭРГҮҮД ШИГ СҮРЖИН ЭХЛЭЭД ДАРЖИН ДАРАГДАЖ БАЙЛАА-   

      Ерөнхий сайд Л.Оюун-Эрдэнээр ахлуулсан МАН-ынхан авлигатай тэмцэх таван “Ш” ажиллагааг хэрэгжүүлж, төрөөс төрсөн тэрбумтнуудыг “хүмүүжүүлнэ” хэмээн мэдэгдсэн. Албан тушаалтнуудын авлигын хэргийг илчилсэн шүгэл үлээгчдийг хамгаалах хууль батлуулах ажлыг “Шүгэл ажиллагаа”, Орлогоосоо давсан хэрэглээтэй төрийн албан хаагчдыг шалгах ажлыг “Шүүр ажиллагаа”, авлига, албан тушаалын гэмт хэрэг үйлдээд гадагш зугтсан этгээдүүдийг олж авчирч, хариуцлага тооцох ажлыг “Шувуу ажиллагаа”  хэмээн нэрлээд байгаа.

     Ингэхдээ тэд төрөөс хулгай хийсэн, хийж байгаа, хийхээр санаархсан хэнийг ч өршөөхгүй, хуулийн хариуцлага хүлээлгэж, авлига, албан тушаалын хэргийг нэг мөр цэгцэлнэ гэх амлалт өгчихөөд, ажилдаа ханцуй шамлан ороод буй.

     Үүнээс “шувуу” ажиллагаа буюу авлига, албан тушаалын хэрэг хийгээд гаднын улс руу зугтсан, зугтахыг завдсан этгээдүүдийг шүүрэхээ албан ёсоор зарласан. Тэгвэл Хууль зүй дотоод хэргийн сайд Х.Нямбатар өчигдөр энэ талаар гаднын улс руу оргон зайлсан 92 хүнийг эхний ээлжинд авч ирэхээр болсон гэдгээ мэдэгдлээ.

        Тэрбээр энэ талаар “Ерөнхий сайдын албан даалгаврын дагуу мөрдөн шалгах ажиллагаанаас оргон зайлсан хүмүүсийг гадаад улсаас авчирч мөрдөн шалгах ажиллагааг хэвийн тасралтгүй үргэлжлүүлэх чиглэлээр хууль хяналтын байгууллагыг ажлаа эрчимжүүлэх чиглэл өгсөн. Энэ дагуу Хууль зүй, дотоод хэргийн яамнаас прокурор, АТГ, ТЕГ, ЦЕГ-т албан бичиг хүргүүлсэн. Албан бичигт дурдсаны дагуу нийтдээ мөрдөн шалгах ажиллагаанаас оргон зайлсан 90 хүн байна. Үүнээс авлига, албан тушаалын гэмт хэрэгт холбогдон, шалгагдаж байхдаа оргон зайлсан долоон хүн бий. Өнөөдөр мөн хоёр хүн нэмэгдэх байх. Иргэн Т.Бадамжунай, Н.Удаанжаргал нар яллагдагчаар татахаас өмнө гадагшаа гарч явсан. Үүнийг оргон зайлсан гэж хэлэх бас боломжгүй. Бид АТГ-ын удирдлагуудтай уулзаж ярилцаад, дээрх хоёр хүнийг яллагдагчаар татах саналыг өнөөдөр Нийслэлийн прокурорын газар хүргүүлж байгаа.

      Яллагдагчаар татах тогтоолыг баталсан тохиолдолд эрэн сурвалжлах ажиллагааг зохион байгуулна. Нийт 92 хүнийг эрэн сурвалжилж, гаднын улсаас эргүүлэн авчрах ажлыг зохион байгуулна. Мөн Улсын Ерөнхий прокурорт бий санал хүргүүлсэн. Эдгээр хүнд авсан таслан сэргийлэх арга хэмжээ хэрэгжихгүй байна. Тодруулбал, хилээр гарах эрхийг нь хассан хэр нь гаднын урс руу зорчоод байгаа нь таслан сэргийлэх арга хэмжээтэй уялдахгүй байна.

     Тиймээс энэ хүмүүсийн гадаад паспортын хөдөлгөөнд хязгаарлалт тогтоох мөрдөгчийн саналаар арга хэмжээ авах боломж байгаа эсэх тухай бичгийн УЕП-т хүргүүлж байгаа. Түүнчлэн Монгол Улс нийт 23 улстай эрх зүйн талаар харилцан туслалцах гэрээтэй. Эдгээр улсуудаас эрх зүйн талаар харилцан туслалцаа үзүүлээч гэх хүсэлтээ явуулах гэж байна. Түүнчлэн эрэн сурвалжлагдаж байгаа хүмүүсээс 22-ыг нь улаан булантад зарлуулсан байгаа. Харин үлдсэн хүмүүсийг нь хөх булантад зарлуулсан. Оргон зайлсан хүмүүс дотор Монгол Улсын Ерөнхий Сайд асан Ч.Сайханбилэг тэргүүтэй хүмүүс бий” гэсэн.

     Т.Бадамжунай, Ч.Сайханбилэг нарыг Монголд авчирна гэж зугтсан цагаас нь хойш л үе үеийн улстөрчид ярьсаар өнөөдрийг хүртэл биелэлээ олоогүй л байна. Сүүлдээ сонгуульд нэр дэвшигчид “С.Зоригийг хэргийг илрүүлнэ” гэж улс төр хийдэг бол Т.Бадамжунай, Ч.Сайханбилэг нарыг авчирна гээд  болчихсон нь нууц биш. Засгийн газрын шүүр ажиллагаагаар ямартай ч тэднийг тохироотой авчирч байна уу, тооцоотой байна уу хамаагүй эх оронд нь аваад ирвэл сайн хэрэг. Гэхдээ авчирсан хойно хэрхэх вэ, эрх мэдэл албан тушаалаа урвуулан ашигласан уу, улсын эдийн засагт ноцтой хохирол учруулсан уу, үгүй юү  гэдгийг нь тогтоож чадах уу гэдэг нь эргэлзээтэй хэвээр байна.

      МАН-ынхан мөн ч олон хэргийг сүржин эхлүүлж, даржин дарсан даа. Өнөөдөр л Хөгжлийн банк, нүүрсний хулгайн хэрэг урьд хожид байгаагүй цоо шинэ юм шигээр гаргаж ирсэн юм шиг шуугиад байгаа болохоос энэ хэргүүд аль эрт задраад, шалгах ёстой бол шалгаж, хариуцлага хүлээлгэх нэгэнд нь хүлээлгэх хугацаа хэдийнээ өнгөрчихсөн. Түүгээр ч зогсохгүй төрөөс төрсөн тэрбумнууд, төсвийн мөнгийг үргүй зарцуулагч, эгэл жирийн энгийн номхон, бор зүрхээрээ амьдрах гэж байгаа иргэдийн боломжийг хулгайлагчид парламентад олон бий. Тухайлбал, ЖДҮ-ийг хөгжүүлэх сангаас зээл авсан УИХ-ын гишүүдийн хэргийг, төрийн эрхийг наймаалцсан 60 тэрбум төгрөгийн хэргийг яг л одоогийн нүүрсний, Хөгжлийн банкны хэрэг шиг зарлаж, нийгэм даяар шуугиж, намынхан нь ч жигшин зэвүүцэж, сүржин эхэлж байсан. Харамсалтай нь, өнөөдөр ЖДҮХС-аас зээл авсан гишүүдээ хариуцлага хүлээх нь битгий хэл ард түмний боломжийг хулгайлсныхаа төлөө уучлалт гуйсан гишүүн нэг ч байхгүй.

        Угтаа бол үе үеийн улстөрчид нэгнээ улсын дайсан мэтээр цоллож, төд удалгүй цайруулдаг, магтан саашаадаг ужиграсан тогтолцоо бий болсон нь нууц биш. Хардаж үзэхэд улс төрийн гэмт хэрэгтнийг улс оронд нь авчирна гэж ард түмнээр алга ташуулах хуучин технилоги оо ашиглаж, үнэн хэрэг дээрээ хоорондоо тохиролцчихсон, улс төрийн наймаа хийгээд суугаа юм биш биз дээ, Ерөнхий сайд аа.

         Хэрэв зээ үнэхээр л шувуу ажиллагааг эхлүүлсэн бол хэрэгжүүлсэн шиг хэрэгжүүлж, эцсийг нь үзэрэй дээ, Л.Оюун-Эрдэнэ дарга аа. 

 

 

 


СҮРЖИН ЭХЭЛЖ, ДАРЖИН ДАРАГДДАГ МАН-ЫН ЭЭЛЖИТ ТУНХАГ БУЮУ “ШУВУУ” АЖИЛЛАГАА
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2023-03-08 08:52:13
    шүгэл: нээрээ хэрэгжсэн эцсийн үр дүн ерөөсөө байхгүй. жнь: нүүрсний хулгай байнаа гээд 2017 онд л эхэлж байсан. нөгөө алдарт нүүрсний хулгайч ажнай компаний захирал д.батэрдэнийг хамсаатнуудтай нь шалгаж байна л гэсэн. сүүлд нь хэргийг нь хаасан гэсэн. одоо дахиад нэг сая тонн нүүрсний хэрэг нь сөхөгдөөд байна. түүний хэргийг хаасан прокурорыг нийтэд зарлаж түүнд ял оноосон нь тодорхойгүй ийм байхад ард түмэн итгэх үү?
  • Сэтгэгдэл үлдээсэн: 2023-03-08 08:35:18
    архан: ж.мөнхбат гэгч этгээд ирсэн үү? байгаа юу?
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188