Заал дүүрэн алга ташилтаас итгэл дүүрэн дарга сонгогдоод С.Эрдэнэ дээр очоод “ноён нуруу” нь хугардаг тогтсон жишгийг Лу.Гантөмөр эвдэх үү, үгүй юү гэдэг нь олны анхааралд үлдлээ дээ.

     Өөрөөр хэлбэл, өнгөрсөн хоёр жил гаруй хугацаанд улс төрийн хоёрдогч хүчин гэгдэх Ардчилсан намын удирдагчид хоёр тийш харж, тамга тэмдгээ булаалдсаар хүчээ тарамдаж, ард түмний өмнө ч үнэ хүндгүй болоод байв. Тэд гурван ч удаа намын даргын сунгаан явуулж аль аль нь бүтэлгүйтсээр өнөөдөртэй залгасан. Улмаар Ардчилсан намынхан нэг үзэл санаанд нэгдэж чадахгүй байгаа ч, өчигдрийн сунгаанаас энэ хагарал, тамга, тэмдэг, даргын асуудал нэг тийш цэгцрээсэй гэсэн горьдлоготой үлдлээ. Магадгүй намын даргаар сонгогдсон нэгнийг хүлээн зөвшөөрсөндөө бус, Ардчилсан намын эцэс төгсгөлгүй зодооноос залхсандаа дэмжигчид нь намын гишүүд нь, үүсгэн байгуулагчид нь, ардчилалд хайртай хэн нэгэн тамга тэмдгийн хэрүүлийг нэг тийш цэгцрээсэй гэсэн хүлээлттэй байна.

     Ардчилсан намын Үндэсний бодлогын хороо хуралдаж, “Эв нэгдлийн” гэх тодотголтой ажлын хэсэг байгуулж, намын даргаа сонгох ажлыг зохион байгууллаа. Намын даргын сунгаанд тус намын гишүүн Сангийн сайд асан С.Баярцогт, Боловсрол, шинжлэх ухааны сайд асан Лу.Гантөмөр, УИХ-ын гишүүн асан З.Нарантуяа, УИХ-ын гишүүн С.Одонтуяа нар нэр дэвших хүсэлтэй хүргүүлсэн. Улмаар ҮБХ-ны сунгааны үеэр УИХ-ын гишүүн С.Одонтуяа нэрээ татсанаар гурван нэр дэвшигчийн төлөө гишүүд саналаа өгөв.

      Санал хураалтын дүнгээр тус намын гишүүн Л.Гантөмөр олонхын санал авч, ээлжит даргаар сонгогдов.

      Намын даргын сунгаанд ялалт байгуулсан Л.Гантөмөрийг намын Их хурлаар хэлэлцүүлэн баталж, Улсын дээд шүүхэд бүртгүүлэхээр тохирлоо. Улсын дээд шүүхээс Ардчилсан намын даргын сунгаанд ялалт байгуулсан Л.Гантөмөрийг батламжлах эсэхээс шалтгаалж, Ардчилсан нам жинхэнэ даргатай байх уу, үгүй юү, намын зодоон үүгээр дуусах уу, үгүй юү гэдэг нь тодорхой болох нь ээ. Ард түмний дунд дээр хэлсэнчлэн намын даргад батламжлаасай гэсэн хүлээлт бий болсон. Гэвч Ардчилсан намын зодоон эцэс төгсгөлгүйгээр үргэлжилж мэдэхээр байна. Угтаа бол Ардчилсан намыг эрх баригч нам “өвөртөө” оруулах санаатай, тохироотой байгаа. Иймдээ ч намын даргын сунгаанд Сангийн сайд асан С.Баярцогтыг “сойж” тохироо хийсэн гэх цуу яриа бий. Ухаандаа С.Баярцогт намын даргын сунгаанд ялалт байгуулж чадвал АН-ын эрх баригч намын “халаасны нам” болгох, нууц яриа хийгдэж байсан гэх. Түүнчлэн Үндсэн хуулийн нэмэлт, өөрчлөлтөөр гишүүдийн тоог нэмэх нь МАН-ын гол зорилго болоод буй. Тиймдээ ч С.Баярцогтод намаа атгандаа оруулчихвал Ардчилсан намын парламентын суудлын тоог нэмэх тохироо хийсэн гэх нь ч бий.

       Намаа базаж, гартаа оруулсан С.Баярцогтын хувьд улс төрийн хэргүүдээ “цагаатгуулж”, намтраа шинээр эхлүүлэх тохироотой байв. Түүнчлэн гаднын улсад толгой хорогдож буй, мөр зэрэгцэн ажиллаж байсан найзынхаа нэрийг цэвэрлэх тохироотой улс төрд эргэн ирсэн гэх нь бий. Эрх баригч намынхны хувьд С.Эрдэнэд АН-ыг хариуцуулж, хагалган бутаргах гол ажлыг хийлгэсэн ч, ард түмний дунд гол дүр байх хугацаа нь дууссан учир дараагийн гол тоглогчийг зарлаж, түүгээрээ бамбай хийх зорилго байсан байж болох.

      Гэвч өнөөдрийн сунгаан эрх баригч намынхны тааллаар болсонгүй. Намын даргын сунгаанд Лу.Гантөмөр ялалт байгуулж, Ерөнхийлөгч асан Х.Баттулгын бүлэглэл рүү хазайв бололтой. Өөрөөр хэлбэл, МАН-ын захиалсан Ардчилсан намын дарга нь Лу.Гантөмөр биш учраас Улсын дээд шүүх дахиад Ардчилсан намыг бүртгэхгүй байх магадлал тун өндөр байна. Ухаандаа Ардчилсан намын эцэс төгсгөлгүй зодоон дахиад л үргэлжлэх нь. Намын даргын сунгаанд ялалт байгуулсан Л.Гантөмөр намын гишүүд, дэмжигчдэдээ ч, улс төрийн хүрээлэлд ч лидер хэмээн хүлээн зөвшөөрөгдсөн манлайлагч мөн үү, гэвэл, эргэлзээтэй. Өөрөөр хэлбэл, намдаа дайн эхлүүлсэн гол тоглогчдын дэмжлэгээр ялалт байгуулсан гэхэд хол зөрөхгүй. Өөрөөр хэлбэл Ерөнхийлөгч асан Х.Баттулга, Ц.Элбэгдорж нар гар барилцаж, дундаасаа Л.Гантөмөрийг гаргаж ирэх яриатай байсан ч байж мэднэ.

      Намын даргын сонгуульд ялалт байгуулсан Л.Гантөмөр “Манай намын хувьд "Эв нэгдэл бол ус агаар мэт амин чухал зүйл болоод байгаа. Ардчилсан нам хэрхэн шинэчлэгдэхээс Монгол Улс цаашид хөгжих эс хөгжих нь шууд хамаарах юм гэдгийг цаг хугацаа харуулж байна.  Бид эвтэй хариуцлагатай, хүчирхэг Ардчилсан нам, зах зээлд чиглэсэн хэв маягийн Ардчилсан нам, нээлттэй дижитал Ардчилсан нам болох болно” гэх амлалтыг намын даргын сунгааны үеэр амласан. Гэвч түүний амлалтдаа хүрэх эсэх нь эрх баригч намынхны гарт нэг мөсөн орчихсон гэдгийг сануулах нь зүйн хэрэг биз ээ.