Өрсөлдөөнгүй сонгууль буюу МАН, АН хоёрын хүч тэнцүү “үзүүлбэр”

Б. Бадралмаа:
Улс төр- Тоймчийн үг

2021-09-20, 868

Сонгууль ямар ч өрсөлдөөгүй, сонирхолгүй, сонголтгүй болдог болжээ. Жаран чавганц уралдаад нэг нь түрүүлдэг гэгчээр нэр дэвшигчдийн дунд гал гарсан өрсөлдөөн гэж байхаа болив. Бараг л сонгуульд нэр дэвшигчдийн нэр зарлагдахад хэдийнээ ялалт байгуулах хүний нэр нь тодорхой болчихсон байх.

Өнгөрсөн Ерөнхийлөгчийн сонгуулиар У.Хүрэлсүх ялалт байгуулна гэдгийг амтай болгон л ярьж байсан. Тэр ч биелэлтээ олж, Ерөнхий сайд асан У.Хүрэлсүх зургаан жил төр төлөөлөх Ерөнхийлөгч болчихсон. Энэ удаагийн нөхөн сонгуульд ч мөн хэн нь ялах вэ гэдэг нь тодорхой болчихсон гэх цуу яриа ч бий. Ерөөс сонгуульд ард түмний оролцоо, идэвх, сонголт гэж байхаа больчихсон гэсэн үг.

Хоёр тойргийн нөхөн сонгууль ирэх сарын 10-нд болохоор кампанит ажил үргэлжилж буй. Нэр дэвшигчид Сонгуулийн ерөнхий хорооноос үнэмлэхээ гардаж, сурталчилгааны ажилдаа орсон.

НӨХӨН СОНГУУЛИЙН ГОЛ ӨРСӨЛДӨӨН СОНГИНОХАЙРХАНД ӨРНӨХ ҮҮ

Үүнээс Сонгинохайрхан дүүргийн нөхөн сонгууль олны анхаарлыг нэлээд татаж байгаа. Олны дунд Э.Бат-Үүл, Э.Батшугар хоёрын дунд өрсөлдөөн гарах нь гэсэн хүлээлт бий. Хэдий Э.Бат-Үүлийг нөхөн сонгуульд нэр дэвших сургаар “хөгшин” улстөрч хэмээн цоллож, олон алга ташиж, хүлээж аваагүй ч хуучин бууны хугархай гэсэн дээ бусад нэр дэвшигчээ бодвол олноос багагүй дэмжлэг авч мэдэхээр байгаа. Ядаж л учраа мэдэхгүй залуучуудыг бодвол хууль батлах процесс хийгээд улс төрийн гал тогоог мэдэх нэгэн гэгдэж буй. Түүнчлэн нөхөн сонгуулийн сурталчилгаа эхлэхтэй зэрэгцээд жил шахам хоёр талцсан Ардчилсан намынхан нэгдэж буйгаа илэрхийлж, сонгуульд ялбал эрх баригчдаас хариуцлага нэхнэ гээд зарлачихлаа. Энэ нь ч нэр дэвшигч Э.Бат-Үүлд багагүй дэмжлэг авч ирэх бололтой.

Харин Э.Батшугарын хувьд МАН-ыг талцуулан байж дундаас нь сугарч гарсан, аавынхаа дэмжлэгээр улс төрд орохоор хэрэндээ хичээж байгаа нэгэн юм. УИХ-ын ээлжит сонгуульд тус дүүрэгт нэр дэвшиж, дөрөвдүгээрт жагссан нь түүний хувьд сонгуульд ялалт байгуулах итгэлийг нэмсэн байж болох. Гэвч Н.Энхбаяр намаа нэгтгэж, ноосоо тушааснаас хойш нэр хүнд нь унаж, иргэдээс багагүй шүүмжлэл хүртээд буй.

Нөхөн сонгууль болж байгаа хоёр тойрогт сүүлийн хоёр жил дараалж, МАН өнгөлж байгаа. Харин АН-ынхан өнгөрсөн хоёр удаагийн сонгуульд нам дотроо хагаралтай, тэмцэлтэй оролцсоныхоо шанг хүртэж, үнэмлэхүй ялагдал хүлээсэн. Цаашлаад Ерөнхийлөгчийн сонгуулиар хоёрдогч хүчний байр сууриа ХҮН-д “алдаж” гуравдагч хүчин болох дээрээ тулсан билээ. Үүний далимаар Хөдөлмөрийн үндэсний намынхан нөхөн сонгуульд нэлээд горьдлого тээн Их хуралд хоёр гишүүний суудалтай болчих юм сан гэсэн хүлээлттэйгээр нөхөн сонгуульд оролцож байна. Гэвч тус намаас нөхөн сонгуульд сойсон Б.Найдалаа нь улс төрийн бүдэг дүр юм. Чингэлтэй дүүрэгт нэр дэвшиж, өвдөг шороодсон түүний тухайд Сонгинохайрхан дүүрэгт ялах нь юу л бол гэх олны цуу яриа бий.

Иргэний Зориг-Ногоон намаас тоймч Ш.Гантулга, Эрх Чөлөөг Хэрэгжүүлэгч намаас Ш.Төмөрсүх, Үнэн ба Зөв намаас А.Отгонбаатар, Дэлхийн Монголчууд намаас Л.Цог, Ард Түмний Олонхийн Засаглал намаас А.Батдорж, Шударга Иргэдийн Нэгдсэн Эвсэл намаас Ц.Гантулга болон бие дааж Х.Бат-Ялалт нар тус тойрогт нэр дэвших юм.

МАН-ЫН НАЙДВАР ХЭНТИЙД БИЙ ЮҮ

Хэнтий аймаг энэ жил төрд одтой байгаа. Тус аймгаас Их хуралд сонгогдсон хоёр ч гишүүн нь төрийн өндөрлөг болж, төрийн бодлогыг зангидаж буй. Иймд МАН-ынхан Сонгинохайрханаас илүү Хэнтийд нэр дэвшигчдээ анхаарал хандуулж, найдвар тавьж байгаа сурагтай. Ингэхдээ тэд Хэнтий аймагт аймгийн Засаг даргаар ажиллаж буй Ц.Идэрбатыг 100 хувийн саналаар дуу нэгтээ нэр дэвшүүлсэн байдаг. Өнгөрсөн хугацаанд Ц.Идэрбат ч тойргоо хэрэндээ усалж, нэрээ сэвтээчихгүй гэсэндээ чадлаараа зүтгэсэн гэх нь бий.

Ц.Идэрбат нь 2008-2012 онд Хэнтий аймгийн Хэрлэн сумын Засаг даргын орлогч, 2016-2020 Хэрлэн сумын Засаг дарга бөгөөд Чингис хотын захирагч, 2020 оноос Хэнтий аймгийн Засаг даргаар ажилласан нутагтаа танигдсан нэгэн. Тиймдээ МАН-ынхан энэ удаагийн нөхөн сонгуульд Ц.Идэрбаттаа нэлээд найдвар тавьж байгаа сурагтай.

Харин Ардчилсан намынхан хуучин улстөрчөө сойж, Б.Гарамгайбаатарыг тус тойрогт нэр дэвшүүлсэн. 2012 оны сонгуулиар Хэнтийгээс нэр дэвшиж ялалт байгуулсан учир найдлага тавьсан нь энэ. Гэвч Хэнтийнхэн Б.Гарамгайбаатартаа ам сайнгүй гэдэг. Түүнчлэн тэрбээр Хөгжлийн банкны асуудлаар АТГ-ын үүдийг сахиж байсан удаатай. Харин энэ удаад хүчтэй өрсөлдөгч байж чадах эсэх нь ирэх сарын 10-нд тодорхой болох нь.

Ц.Идэрбат, Б.Гарамгайбаатар нараас гадна тус тойрогт хоёр горилогч бий. Тодруулбал, цахим сүлжээнд өөрийгөө Чингис хаан хэмээн нэрлэсэн иргэн М.Баасанжаргал бие даан нэр дэвшихээ мэдэгдсэн бол Ард Түмний Олонхийн Засаглал намаас Д.Чулуунбат , Шударга иргэдийн нэгдсэн эвсэл намаас Д.Баатаржав нар өрсөлдөхөөр сонгуулийн сурталчилгаагаа явуулж байна.

Өрсөлдөөнгүй сонгууль буюу МАН, АН хоёрын хүч тэнцүү “үзүүлбэр”

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2021-09-20 20:43:34

Кочин: Идэрбат нь хамаагүй дээр дээ.

Шинэ мэдээ

Нийтлэлчид