Уран гулталтын хүнд элементүүдийг ар араас нь маш чадварлаг гүйцэтгэж, дөрвөлсөн үрсэлт гүйцэтгэсэн Камила өвлийн олимпын наадмын цэнгэлдэхийг гэрэлтүүлж, үзэгч олондоо аз жаргал бэлэглэв. Өдгөө дөнгөж 15 настай охиныг Бээжингийн мөсөн талбайд гялалзахыг харсан хүн бүр гайхширч байлаа...

          ОХУ-ын Олимпын хорооноос “Бээжин-2022” өвлийн олимпын наадамд оролцсон 15 настай Камила Валиева энэ удаагийн өвлийн олимпын “тод од”-уудын нэг байв. Гэхдээ “тод од” гэдэг нэр зохимжгүй ч байж болох юм. Учир нь, 15 настай Камила анхны өвлийн олимпын наадамдаа оролцож байгаа юм. 15-хан насандаа Бээжингийн цэнгэлдэхийг доргиож, өвлийн олимпын түүхэнд уран гулгалтын төрлийн дөрвөлсөн үсрэлтийг гүйцэтгэсэн анхны уран гулгагч болсон түүнийг олон улсын үзэгч, дэмжигчид нь “Уран гулгалтын сахиусан тэнгэр” хэмээн өргөмжилж байна.

-ТҮҮНД ЭЭЖ НЬ “УРАН ГУЛГАЛТАА ОРХИ” ГЭЖ БАЙЖЭЭ-

          Камила гурван настайгаасаа уран гулгалтаар хичээллэж эхэлжээ. Гэхдээ таван нас хүрэх хүртлээ балет, бүжиг, гимнастикаар хичээллэсээр таван наснаасаа уран гулгалтдаа илүү гүн дурласан аж. Түүнийг зургаан настай байхад гэр бүлийнхэн нь Казаниас Москва руу нүүж, Камила “Москвич” дугуйланд уран гулгалтын бэлтгэл хийж эхэлсэн байна. Гэсэн ч зургаан настай Камилад бусдаасаа илт ялгарах ахиц, дэвшил илрээгүйн улмаас ээж нь хүртэл уран гулгалтаа орхихыг ятгаж байсан гэнэ. Харин Камила Валиева ээжийнхээ зөвлөгөөг дагалгүй өмнө нь хичээллэж байсан дугуйлангаасаа гарч, өөр газар, шинэ дугуйлангаас бүхнийг эхлэхээр шийдсэн нь өнөөгийн дэлхийн дахины мэдэх Камилаг бүтээсэн юм.

-УРАН ГУЛГАЛТЫН “САХИУСАН ТЭНГЭР” 15 НАСТАЙ КАМИЛА ВАЛИЕВА-

          “Москвич” дугуйлангаас гарч, өөр дугуйланд уран гулгалтаар хичээллэсэн Камила маш хурдан хугацаанд сайжирчээ. Үеийнхнээсээ онцгойрч, Оросын нэр, алдартай дасгалжуулагчдын ч хараанд өртөөд амжиж. Өсвөр наснаасаа л тодорсон Камилаг оросын уран гулгалтын нэрт дасгалжуулагч Этери Тутберидзе удирдан тив, дэлхийн өсвөрийн тэмцээнд бэлдэж, оролцуулж эхэлсэн байна.

          Камила Валиева үеийнхнээсээ онцгойрч, оролцсон ихэнх улс, тив, дэлхийн аваргад түрүүлсэн байдаг. Тэрбээр 2020 онд өсвөрийн уран гулгалтын дэлхийн аварга болсон юм.

-НАСАНД ХҮРЭГЧДИЙН АНХНЫ ТЭМЦЭЭНДЭЭ ДЭЛХИЙН ХОЁР ДЭЭД АМЖИЛТ ТОГТООСОН НЬ-

          Камила Валиева өнгөрсөн 2021 оноос анх удаагаа насанд хүрэгчдийн уран гулгалтын тэмцээнд оролцож эхэлсэн. Түүний анхны насанд хүрэгчдийн тэмцээн нь Финландын цом байсан бөгөөд Камила анхны тэмцээндээ, нэг өдрийн дотор дэлхийн хоёр дээд амжилт тогтоож шуугиан тарьж байлаа.

-ДЭЛХИЙН УРАН ГУЛГАЛТЫН ИРЭЭДҮЙ-

          “Бээжин-2022” өвлийн олимпын наадамд ОХУ-ын Олимпын хороог төлөөлөн оролцсон Камила дэлхийг гайхшрууллаа. Өвлийн олимпын наадмын уран гулгалтын чөлөөт үзүүлбэрийн төрөлд дөрвөлсөн үсрэлт хийж, өвлийн олимпын наадамд анх удаа эмэгтэй уран гулгагч дөрвөлсөн үсрэлт хийсэн түүхийг бүтээсэн юм. Мөн үүгээр ч дутахгүй дутууны үзүүлбэрт шүүгчид 90.18 оноо өгч, Камила ОХУ-ын Олимпын хорооны багтаа 10 оноо авчирч, баг нь нийт дүнгээрээ “Бээжин-2022” өвлийн олимпын наадмын алтан медалийг хүртсэн.

          Дэлхин дахинд баяр баясал бэлэглэсэн уран гулгагч Камила Валиевагийн “Бээжин-2022” наадмын тэмцээнүүд дуусах болоогүй. Тэрбээр хоёрдугаар сарын 15-нд өвлийн олимпын уран гулгалтын эмэгтэйчүүдийн ганцаарчилсан төрөлд оролцоно.

Мөн уншигч танд сонирхуулах үүднээс “Уран гулгалтын сахиусан тэнгэр” Камила Валиевагийн тухай цөөн хэдэн сонирхолтой баримтыг хүргэж.

Камила Валиева 149 см өндөртэй, ганц бие.

Өдгөө дөнгөж 15 настай ч Камила Валиева хамгийн баян уран гулгагчдын нэг. Камила Валиевагийн хөрөнгө 1.5 сая ам.доллартой тэнцэх гэнэ.