Дуучин С.Сэрчмаа, "Никитон" хамтлагийн Б.Батчулуун буюу Баачка нарын онигоо ярьсан бичлэг цахим орчинд цацагдаад буй. Тодруулбал, тэдний лайв хийх үеэрээ ярьсан онигоо нь ёс бус агуулгатай бөгөөд садар самууныг сурталчилсан, хүчирхийлэл үйлдсэн байж болзошгүй байна хэмээн олон нийт үзэж байгаа юм. Энэ талаар бид дуучин С.Сэрчмаатай холбогдож, дараах тодруулгыг авлаа.

 

-Сайн байна уу, та. Таны Никитон хамтлагийн дуучин Баачкатай хийсэн лайв цахим орчинд шүүмжлэл дагуулаад байна. Энэ талаар тайлбар өгөхгүй юү?

 

-Тухайн өдөр дуучин Б.Батчулуун ах "25 дугаар суваг" телевизээр хөтлөн явуулдаг миний нэвтрүүлэгт оролцчихоод явж байсан юм. Баачка ах машингүй явж байсан учраас би Тасганы овоо руу уруудаад, очих газарт нь хүргэх гээд явж байлаа. Ингээд бид лайв хийж, олон зүйлийн талаар ярьсан. Огт садар самуун сурталчилсан агуулгатай байгаагүй. Гэтэл цахим орчинд яг нэг хэсгийг нь тасалж аваад тэр агуулгыг нь цацчихсан байна. Би өөрөө маш хөгжилтэй, хошин хүн. Комеди группийн админ хийдэг. Гэтэл үүнийг нь хүмүүс буруугаар ашиглаж, яг тухайн хөгжилтэй болгож ярьсан зүйлийг нь таслаад хийчихсэн байна лээ. Түүнээс биш, би өөрөө эх хүн, эмэгтэй хүн байж юу гэж албаар тийм садар самуун зүйлс сурталчлах билээ дээ. Бидний яриа бол хөнгөн онигоо, хүмүүсийн дархлааг дэмжихээр хөгжилдөж байсан зүйл. Тэр өдөр маш их түгжрэлтэй хүмүүс уур бухимдалтай байсан. Тиймээс бид хүмүүсийн бухимдлыг тайлах зорилгоор хөгжилтэй зүйл ярьсан юм л даа.

 

-Тухайн бичлэгээс болж хүмүүс маш их бухимдаж байна. Тан руу олон нийтээс дайралт ирж байна уу?

 

-Баачка ахыг гэмт хэрэг хийчихсэн мэтээр үзэж, над руу маш их дайралт ирж байна. Бид огтоос садар самуун сурталчилах зорилгоор бичлэг хийгээгүй гэдгийг дахин хэлмээр байна. Би хоёр хүүхдийн ээж, хүмүүнлэгийн элч дуучин. Нийгмийн сайн сайхны төлөө өөрийн зүгээс чадах бүхнээ хийдэг. Тэр бүр ил гаргаж, олон нийтэд зарлаад байдаггүй ч сайн үйлсийн аян өрнүүлж, нийгмийн хариуцлагынхаа хүрээнд маш олон ажил хийсэн. Цахим орчин гэдэг өөрөө маш аюултай гэдгийг эндээс олж харлаа.

 

-Дуучин Б.Батчулууны тухайд нийгмийн сүлжээнд үүссэн энэ шүүмжлэлийг хэрхэн хүлээж авах бол?

 

-Баачка ах маань цахим орчинд лайв хийдэггүй. Миний лайванд анх удаа орсон юм л даа. Гэтэл нийгэмд буруу ойлголт өгөхөөр нэг хэсгийг нь таслаад оруулчихжээ. Хэрвээ бид нийгэмд буруу ойлголт төрүүлэх зүйл хийсэн бол уучлалт хүсэж байна. Баачка ах тайван хүн учраас энэ асуудалд хэн нэгнийг буруутгаж хүлээж аваагүй.  Харин түүний өмнөөс маш их санаа зовж байна. Анх удаа миний лайванд оролцож байхад нь нэр хүндэд нь халдчихлаа. Хүмүүс маш их бухимдаж, “Бидний дууг сонсохгүй” гэж эсэргүүцлээ илэрхийлж байгаа харагдаж байна. Ер нь хүчирхийллийн эсрэг дуу хоолойгоо нэгтгэж чадаж байгаа нь зөв. Гэхдээ аливааг ялгаж, салгаж ойлгоосой. Цаашлаад цахим орчинд зөв, соёлтой байхыг уриалж байна. Нийгэм цаг үе үнэхээр амаргүй, хэцүү байна. Тиймээс ийм хүнд үед дархлаагаа дэмжиж, нийтийнхээ төлөө эерэг байцаая. Ковидгүй зуны төлөө хүн бүр хичээгээсэй. Нэгнийхээ тулга тойрсон, монтажилсан ийм зүйл дээр шүүлтүүртэй хандаасай гэж хүсэж байна. 

 

-Тэр бичлэгийг хэн цацсан юм бэ?

 

-Бидний хийсэн лайваас таслаж, аваад цацчихсан байна лээ. Хэн цацсаныг нь сайн мэдэхгүй байна. Ер нь урлагийн болон олны танил хүмүүс рүү ийм дайралт их ирдэг. Би дуучин болсноос хойш олон удаа гүтгэлэг, нэр төрд халдсан дайралтад өртөж байсан.