Монголын уран бүтээлийн тайз, дэлгэцийн урлаг гэрэл шиг тодхон гялалздаг уран бүтээлчдийн нэг бол бүжигчин М.Бямбаа юм. Түүний уран бүтээл нь зөвхөн хөдөлгөөн биш, харин хүний сэтгэл дэх хамгийн нарийн мэдрэмжийг гаргаж ирсэн уран сайхны амьд хэлбэр билээ. “Зогсошгүй, Инээмсэглэл, Шударга” энэ гурван үгийг амьдралынхаа зарчим болгож явдаг хүчирхэг, зогсошгүй эмэгтэй билээ.

Зогсошгүй, Инээмсэглэл, Шударга

     Бямбаа хүүхэд насандаа хөдөлгөөнтэй, чөлөөтэй, уран нугаралттай охин байжээ. Тэрхүү урлагт үнэн сэтгэлээсээ дуралсан нь түүнийг урлагийн ертөнцөд хөтөлсөн гэхэд буруудахгүй. Хөгжим бүжгийн коллежид 1999 онд элсэж ороод 2004 онд Ардын бүжигчин мэргэжлээр суралцаж төгссөн тэрбээр сонгодог бүжгийн хатуу хэмнэл, орчин үеийн модерн бүжгийн эрх чөлөө хоёрын хооронд өөрийн өвөрмөц хэв маягийг бүтээжээ. Түүний багш нар түүнийг хөдөлгөөн төдийгүй сэтгэлээрээ хөдөлгөдөг, хөдөлгөөн бүртээ уран сайхны санаа агуулдаг гэж үнэлдэг. Түүний бүжгийн хөдөлгөөн нь зөвхөн техникийн дасгал биш, харин дотоод сэтгэлийн гүн гүнзгий илэрхийлэл бөгөөд үгсээр илэрхийлэхэд хэцүү мэдрэмжүүдийг харуулах чадвартай.

     Үндэсний урлагийн их театр язгуур урлаг, өв соёл, монгол гэсэн бүх зүйлийг олон түмэнд түгээн дэлгэрүүлэх зорилготой. “Миний ертөнц” тоглолтоор монголынхоо өв соёл болсон бүжгийн урлагийнхаа бүх зүйлийг харуулж чадсан билээ. Монгол бүжиг дэлхийд ганцхан байдаг. Ахуй соёлоос үүсэлтэй язгуур бие биелгээ тайзны хэлбэрт орж, улам мэргэжлийн түвшинд сонгодог суурьтай болсон. Монгол бүжгийг монгол хүнээс өөр хийж чаддаггүй. Харин монгол хүмүүс үндэсний бүжгээ төгс хийдэг. Дэлхийд ганцхан байгаа урлаг юм. Тиймдээ ч тэрбээр монгол бүжигтэй амьдралаа холбосон гэхэд буруудахгүй.

     Тэр тайзан дээр өөрийгөө бүрэн нээж, бүжиг бүрээрээ хүний сэтгэл дэх гүн утга санааг илэрхийлдэг. Түүний бүжигчний авьяас, хөдөлгөөнд оршдог сэтгэлийн гүн ухаан, уран бүтээлчийн өвөрмөц зан чанар нь үзэгчдэд гүн гүнзгий сэтгэгдэл төрүүлдэг. Түүний бүтээлүүд Монголдоо төдийгүй олон улсын тайзнаа олны анхаарлыг татаж Монголын орчин үеийн бүжгийн урсгалыг дэлхийд таниулж буй амжилттай уран бүтээлчдийн нэг болсон. Тэр олон улсын бүжгийн фестиваль, симпозиумд оролцож, өөрийн мэдлэг, ур чадвараа бусадтай хуваалцдаг.

Бүжиг бол хатуу залуу насны урлаг

     Өнөөдөр М.Бямбаа зөвхөн бүжигчин төдийгүй чадварлаг багш болсон нь чухал. Тэрбээр олон бяцхан шавь нартай төдийгүй зөвхөн хөдөлгөөн заахаас гадна сэтгэлгээ, уран сайхны мэдрэмжийг нь хөгжүүлэхэд тусалдаг. Түүний багшлах арга барил нь оюутнуудыг өөрсдийгөө тайзан дээр хэрхэн зөв илэрхийлэх вэ гэдэгт суралцуулдаг бөгөөд энэ нь Монголын бүжгийн урлагийн ирээдүйд том хувь нэмэр оруулж байна.

     Мөн түүний бүтээсэн бүжгэн жүжгүүдээс товчхон дурьдвал Нарны домог "Алунгоо", Монголын их хатдын туульс "Сорхогтун хатан",Тамгагүй төр жүжгийн үнэг, Цуутын цагаагч гүүний "Ээж" гээд олон сайхан дүрийг бүтээсэн чадварлаг бүжигчин. Зөвхөн бүжиг гэлтгүй өөрийн багийн мөрөөдлөө биелүүлэн "Миний ертөнц", “QUEEN” хэмээх өөрийн дуулан хүргэсэн сайхан уран бүтээлтэй. Тэрбээр  “Бүжгийн ертөнц харагдаж байгаа шигээ амархан зүйл биш гэдгийг ойлгуулахыг зорьж “Миний ертөнц” гэдэг нэртэй дуугаа дуулж клип хийсэн. Бүжгийн урлаг тамирчидтай адилхан биеийн хүчний бүх зүйлийг хийж, байнгын бэлтгэлтэй байхыг шаарддаг. Бэртэл гэмтэл авч хагалгаанд орох зэрэг асуудлууд ч байдаг. Зовлон тоочих юм бол зөндөө бий. Бид нар зовлон тоочихыг хүсдэггүй. Бүжгийн урлаг хатуу залуу насны урлаг учраас богинохон хугацаанд урлагийн хүнээс гарч болох бүх зүйлийг гаргаж байдаг юм” хэмээн ярилцлагадаа дурдаж байсан юм. 

     Тэрбээр бүжиглэхээ хэзээ ч зогсоохгүй. Учир нь бүжиг бол түүний амьдрал, түүнд амьдрал өөрөө бүжиглэж буй мэт санагддаг. Тайзан дээрх бүжиг бүрт түүний уй гашуу, тэвчээр, итгэл багтдаг бөгөөд энэ нь үзэгчдийг гүн сэтгэгдэлд автуулдаг нь урлагийн нэгэн хүчирхэг, гүн ухаантай, эмзэг уран бүтээлч бөгөөд түүний бүжиг бол амьдралын шүлэг юм. Түүний хөдөлгөөн нь зөвхөн биеийн хөдөлгөөн бус, харин сэтгэлийн, дотоод мөн чанарын илэрхийлэл билээ.

ШАГНАЛ

     2006, 2012 ҮУИТеатрын оны шилдэг бүжигчин, "Өргөмжлөл", 2009 ЗГ-ын "Жуух бичиг", 2010 Нийслэлийн шилдэг залуу, Алтан медаль, 2012 Монгол Улсын Соёлын Тэргүүний Ажилтан, 2018 ЗГазрын шагнал, "Мөнгөн мод" цом <Шилдэг бүжигчин>, 2019 Хөдөлмөрийн хүндэт медаль, 2021 онд Хөдөлмөрийн гавъяаны улаан тугийн одон, 2025 Монгол Улсын Гавьяат Жүжигчин

ДЭЛГЭЦИЙН УРАН БҮТЭЭЛ

     2013 Зэрлэг цэцэгсийн хүлэмж МУСК, 2015 Шуугиан таригч МУСК, 2016 Миний эхнэр тагнуулч МУСК, 2016 Гэрлэн дохио МУСК, 2017 Манан зүсэгч МУСК, 2019 Адреналин МУСК

ТЭМЦЭЭН

     2005 Зууны манлай бүжиг дэглээч АЖ, Төрийн соёрхолт Ц.Сэвжидийн нэрэмжит бүжиг дэглээч, гоцлол, цөөхүүл бүжигчдийн уралдаан, Гурвал, цөөхүүл төрөлд I байр, 2008 ТV5 телевизийн "Мөрөөдлийн бүжиг" шоу тоглолт, 2015 Монгол бүжгийн ОУ-н анхдугаар уралдаан, "Алтан цом", 2017 Монгол бүжгийн ОУ-н 2-р уралдаан, "Хүрэл цом", 2018 UBS TV, “Perfect dance 2018“, Шүүгч, 2024 онд БНСУ -н Сөүл хотноо болсон World dance Grand Prix олон улсын тэмцээнд Гранпри шагнал

 ТОГЛОЛТ

• 2006 "Монгол Бүжгийн Гайхамшиг" аялан тоглолт /Итали/
• 2006 Эрээн хот үүсгэн байгуулагдсаны 50 жилийн ойн тоглолт /БНХАУ, Эрээн хот/
• 2007 "Чингис хаан музейн нээлт" /Унгар, Будапешт/
• 2009 "Ардын Урлагийн Наадам" /Англи, Биллитхам/
• 2010 "Монголын Соёлын Өдрүүд" /Какакстан, Астана/
• 2010 Большой театрын тайзнаа "Монголын соёлын өдрүүд" /ОХУ, Москва/
• 2010 "World Expo" /БНХАУ, Шанхай/
• 2012 "World Expo" /БНСУ, Ёосү хот/
• 2012 "Тэнгэр аялгуу" аялан тоглолт /Тайвань/
• 2014 "Дэлхийн Эдийн Засгийн Форум" /Швейцарь, Давос/
• 2014 МУ-н Ерөнхийлөгчийн айлчлалын хүндэтгэлийн тоглолт /Япон/
• 2014 "Монголын Соёлын Өдрүүд" /БНХАУ, Бээжин/
• 2015 "Авьяаслаг Азичууд" наадам /Малайз, Сингапур/
• 2015 "Hi Seoul" festival /БНСУ, Сөүл/
• 2015 Монгол, Хятад, Орос 3 улсын ЭЗ-н анхдугаар форум /БНХАУ, Хөх хот/
• 2016 "Монгол Бүжгийн Гайхамшиг" тоглолт /Итали/
• 2016 ЭСЯам үүсгэн байгуулагдсаны ойн хүндэтгэлийн тоглолт /ОХУ, Москва/
• 2019 Сувдан театрын тайзнаа "Монголын Соёлын Өдрүүд" /БНХАУ, Бээжин/
• 2021Франц улсын Юнэскод Монголын сайхан орон тоглолт
• 2023 онд Англи улсын Лондон хотод Coliuzum театр Монгол хаан жүжиг