• Өнөөдөр 2026-08-31

НҮДЭЭ АНИАД НАМАЙГ ДАГААД ДУУЛ...

2025-05-22,   1279

 "Үүрд наран гэрэлтэнэ зүрхэнд

Хүсэл тэмүүлэл сэтгэлээс зүрхэнд

Бороо гунигтай шиврэвч зүрхэнд

Булгилан догдлох хайр зүрхэнд
 
Зүрхэнд аз жаргал дэргэд минь дуулна
 
Амьдрал гэдгийг би туулж бас уярана..." гэх үгтэй  A-cool-ийн "Зүрхэнд" дууг хүмүүс мэднэ байх.
Үүнийг зүрхэнд нь үргэлж нар гэрэлтэж, хүсэл тэмүүлэл, хайр, аз жаргал цөм сэтгэлд нь дүрэлзэн бадарч байдаг уран бүтээлч шүлгийг нь бичиж, аялгууг нь хийснийг ч андахгүй болов уу. Тэр бас,
"Намрын өнгийг уусгах сэтгэлийн бороо
 
Найз минь дурсамжийг минь сануулан ирээч
 
Эргэлдэн шуурах салхинд орь залуу насаа хийсгэж

Олон аавын хөвгүүд мөр зэрэгцсэн он жавууд..." гэж бичиж, дуулсан.
 
Одоо дахиад ганцхан дууных нь хэсгээс хүргэе. Тэгэхэд л уншигч та хэн болохыг нь баттай таана.
"Нандин нандин хүслээ тээсээр
 
Нартын гэрэл гэгээг хайрласан
 
Өгсөж уруудах амьдралын нугачаан дунд ээж минь
 
Энхрий үр наддаа аз жаргалаа дуулсаар..." гэх "Нандин хүсэл" бол түүний зохиосон уран бүтээлийн нэг.

      Тийм ээ, тэр бол "Guys” хамтлагийн А.Төгсбаяр. Бидний сайн мэдэх ийм л уянгалаг атлаа нэгийг бодогдуулж, хоёрыг тунгаалгасан үгтэй дуунууд түүнээс төрсөн байдаг. Часхийсэн гоё дуу бүтээчихээд, чимээгүйхэн хүмүүст хүргэчихдэг уран бүтээлчийн дуунуудыг нэхэж сонсоход гарцаагүй содон, “Энэ чинь л миний аялгуунууд шүү дээ" гэх онцгойрол мэдрэгддэг. Нэг ёсондоо амьдралд ойр аялгуунууд түүнээс эгшиглэж, тэр өөрөө гитараа бариад, нүдээ аньж байгаад л бүтээлээ сонсгочихдог даруухан.
 
 
Үүгээрээ тэр үзэгчдэдээ "Нүдээ аниад намайг дагаад дуул..." гэдгээ илэрхийлж, дууг нь сонсох хэн бүхэн амьдрал, хайр, хүсэл мөрөөдөл, итгэл, үнэнч нөхөрлөлийн тухай нүдээ анин чагнадаг. Ингэж сонсох, тийн дуулах 80 гаруй дуу энэ уран бүтээлч зохиосон байдгаас 30 орчим нь хит болж хэдийнэ хүмүүсийн сэтгэл зүрхэнд эгшиглэдэг байна. Эдгээрийн анхдагч нь "Guys” хамтлагийн алдарт "Эмзэгхэн хайр” дуу.
"Би, би дурсаж хүлээнэ
Бороон дуслуудад дурсаж хүлээнэ
Би, би хүлээнэ
Бүлээн салхинд гандаж хүлээнэ….”гээд мэдэхгүй хүн үгүй эмзэгхэн хайрын дуу.
 
Итгэл найдвар, хүлээлтийн тухай ч давхар мэдрэгддэг. СУИС-д орохоосоо өмнө тэр хитүүдээсээ зохиосны нэг нь энэ. А.Төгсбаяр уран бүтээлчийн нэг онцлог бол олон сайхан киноны дүрүүдтэй. Тоглосон кинонууддаа дуу бүтээж, тэдгээр нь хүмүүст илүү ойр байдаг. Тэдгээрээс "Нарны жим" киноны Балуугийн дүрд үзэгчид их хайртай. Хөгжилтэй, хөөргөн тэгсэн атлаа ажилдаа шаргуу шилдэг нь гээд содон дүр байсан. Эл киноны дуу одоо ч хит болж буй. Ингэж дуунаас дууны хооронд туурвиж явсаар нэг мэдэх нь ээ 20 гаруй жил өнгөрч, өнгөрсөн жил уран бүтээлүүдээ нэг дор тайзнаа хүргэж тоглолтоо хийсэн. Тэр үдэш бидний мэддэг мөртлөө хэн үг, аяыг нь злхиосныг нь төдийлөн мэддэггүй олон дуу түүнийх гэдгийг мэдэж, сайхан дуунуудыг нь жарган сонсож, дурсамж дүүрэн мартагдашгүй мөчийг өнгөрүүлсэн болов уу.
      "Зүгээр л уучил", "Хүмүүс ээ", "Одтой байгаарай", “Чи миний" гээд олон сайхан дуу бий. Киноны дуунуудаас нь гэвэл, "Сайн уу амьдрал минь", "Хэцүү анги", "Ах дүүс", "Эрэмдэг", "Эцсийн хүсэл" зэргээр хөвөрнө. Хамгийн сонирхолтой нь тэр бүр наймдугаар ангиасаа эхлэн дуу зохиосон гэдэг. Түүнээс хойш үргэлж дуу хөгжимтэй хамт байж, сайхан үгс, аялгуугаар өөрийгөө хөглөгч тэр олон сайхан дууны эзэн болж, өдгөө ч уран бүтээлээ хүргэсээр байна. Сүүлд хийсэн дуунуудынх нь нэг болох "Тэндээс сонсоно" дууг уншигч та сонсоогүй бол яг одоо тавиад сонсоорой.
 
А.Төгсбаяр гэж ямар уран бүтээлч вэ гэдгийг хэлж өгөх бас нэгэн тод дуу. “Guys” энэ сарын 31-нд "Сургууль минь баяртай" тоглолтоо хийхээр товлосон. Тэр үдэш А.Төгсбаярын дуунуудыг дахин нэг сонсоорой.

НҮДЭЭ АНИАД НАМАЙГ ДАГААД ДУУЛ...
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.