• Өнөөдөр 2026-08-31

ТҮҮНИЙ БҮТЭЭСЭН ЭСРЭГ ДҮРҮҮД...

2025-05-15,   1577

           Гэмгүй, мөрөөрөө, үнэнч, шударга хүн гэж яаж итгүүллээ дээ үзэгчдийг тэр “Мөрч” киноны Равдангийн дүрээрээ. Арав ангийн турш “Агийг хэн хөнөөв” гэж найруулагч, уран бүтээлчдээс нэхэж шаардсан үзэгчид түүнд ёстой чиг сайхан “хууртсан”. Ингэж сайн “нууж” чадсан гэхээр МУСТА, жүжигчин Б.Батмэндийн дүрээ бүтээх ур чадвар, авьяас билэг үзэгчдэд тэр чинээгээр тодорч буй нь энэ юм. Ингээд бид түүний тоглосон уран бүтээлүүд, тэр дундаа эсрэг дүрүүдийнх нь талаар бичвэр дэлгэж байна.

       Ж.Сэнгэдорж найруулагчийн “Бодлын хулгайч”кинонд гол дүр нь болох Гантулгатай хамт шоронгоос оргодог хоригдлыг үзэгч та санаж байгаа болов уу. Туслах дүр ч гэлээ гол дүрийг тодруулж, “аавынд” Гантулгад хамгийн их хань болж, түүний үгийг сонсож, оргож ээждээ очиход нь тусладаг. Овсгоо самбаатай, сүйхээтэй, басхүү сэтгэлтэй хоригдлын дүрийг чадварлаг бүтээсэн. Мөн найруулагч Г.Эрдэнэбилэгийн “Тэгри чину” кинонд тэрбээр Сайран овгийн Бордойн дүрийг бүтээсэн. Овгийн хүний зэвүүн, эр зоригтой дүр түүнийх байсан. Ингээд харахаар бүтээсэн дүрүүд нь үзэгчдэд гарцаагүй дотно гүнзгий сэтгэгдэл төрүүлдэг.
 
     Найруулагчид түүнд ихэвчлэн дарга даамал, ахлагч, овгорын дүрийг оноодог бөгөөд тэр ч өөрөө гаргууд сайн амилуулахыг нь яана. Мэдээж эсрэг дүрүүдийг нь л онцолж буй болохоос зөөлөн дулаан, тусч сайхан дүрүүд ч түүнд бий. Тэрбээр “Бодлын хулгайч”-аас эхлээд “Монгол төрийн товчоон”, “Эх орон дуудаж байна”, “Босуул”, “Made in Ulaanbaatar”, “Өвлийн тууж”, “Сайн уу амьдрал-2”, “Чингисийн хүүхдүүд”, “Хуримын даашинзтай бүсгүй” зэрэг олон сайхан киноны гол болон туслах дүрийг бүтээсэн. Сүүлд тэрбээр “Мөрч” кинонд тоглохоос гадна “Халуун бороо” кинонд аврагчийн дүрд ажилласан. Хэдийгээр кино эхлэхэд л өнгөрчихдөг ч гарцаагүй үзсэн үзэгчдийг киноны турш салшгүйгээр нэгийг бодуулж, хоёрыг тунгаалгах дүр болсон байсан. Галын дуудлагад явж байгаа хэр нь  “Тайван хүнээс цэгцтэй бодол төрдөг” гэж хэлээд дуу аялж, “Хүнд дуудлагад явах бүрдээ дуу аялдаг” гэж найздаа хэлээд төд удалгүй осолддог. Ингээд ажихаар түүний дүрүүд уярал, ухаарал дүүрэн ажээ.
 
        "Мөрч" киноны Равдангийн дүрийг нь лав үзэгчид хэзээ ч мартахгүй байх. Өнгөн дээрээ гэмгүй царайлчихаад угтаа муу муухай бүхнийг хийж, гүйцэтгэж явдаг хүний дүрийг ёстой юу ч болоогүй юм шиг гаргасан. Бүр ноёны хамгийн итгэлт хүн, Дамдин мөрчид бүхнээ ярьдаг, түүний ажилд туслагч гээд баригдахын аргагүй итгүүлж гарсан. Гэсэн ч муу үг модон улаатай гэгчээр бүх зүйл илчлэгдэж, үнэн илэрсэн хойно ч тэр хэргээ хүлээхгүй гүрийсэн. Б.Батмэнд жүжигчний дүрүүд угаас ийм зэвүүн, үзэгчдийн уур бухимдлыг төрүүлж,  цаанаа нэг хүйтэн хөндий байдаг ч энэ мэдрэмжүүдийг биднийг мэдэртэл дүрээ бүтээж байна гэдэг яах аргагүй уран бүтээлчийн чанар чансаа, авьяас чадварыг илтгэж буй. Тиймдээ ч Монголын урлагт олон сайхан дүрийг амилуулж, дүрээрээ дархлагдаж буй уран бүтээлч. Түүнд найруулагч ямар л дүр онооно. Тэр торойхгүй бүтээж, бүр нэг мартагдахгүйгээр үзэгчдийн зүрх сэтгэлд хоногштол тоглодог. Хэдийгээр Равдан одоо хэргээ хүлээн хар гэрт хоригдож буй ч  "Мөрч-2" дээр ямархан хүн болж гарч ирэхийг таашгүй.
    Эсрэг дүрийн талбайд тэр ийнхүү дүрүүдээ аваад "тулалдахад", гарцаагүй ялна уу гэхээс ялагдахгүй. Учир нь түүний дүрүүд чадварлаг, үзэгчдэд бүгдийг итгүүлж чаддаг болохоор тэр. Мэдээж эерэг дүрүүд ч бий. Гэхдээ яагаад ч юм эерэг дүрд тоглосон ч ямар нэгэн байдлаар өнөө хүн нь муу хүн болж хувирах юм шиг мэдрэгддэг. Тэгтэл үзэгчдийг дүрдээ автуулж, дүрээрээ байлдан дагуулсан байгаа юм. Нөгөө талаар эерэг дүрээс илүү эсрэг дүр нь түүнд зохиж, авьяас чадварыг нь илүүтэй шавхаж, шахаж бидэнд харуулдаг гэмээр. Түүнд уран бүтээлийн өндөр амжилт хүсье.

ТҮҮНИЙ БҮТЭЭСЭН ЭСРЭГ ДҮРҮҮД...
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.