Ардчилсан намын арслантай тамга Л.Гантөмөрөөс О.Цогтгэрэлийн гарт шилжих нь нэгэнт тодорхой болсон. Хамтарсан Засгийн газар унаж, Ардчилсан намыг О.Цогтгэрэл удирдах таамаг аль эрт явж байлаа. Хэвлэлийнхнээс зөрсөнгүй. Монголын улс төр зурсан зургийн дагуу л явж байна.

         Одоо Улсын дээд шүүхээр Ардчилсан намын ээлжит бус хурлаар хэлэлцсэн намын шинэ дүрэм болон УИХ-ын гишүүн О.Цогтгэрэлийг даргаар батламжилснаар бүрэн эрх нь хэрэгжиж эхэлнэ.

       Ийн намын даргыг Дээд шүүхээс батламжлахтай зэрэгцээд нам доторх эрх мэдлийн бялуу хуваалт хэрхэн өрнөх вэ гэдэг нь анхаарлын төвд байна. АН-ын дарга асан Л.Гантөмөр 2024 оны сонгуулиар намаа нэгтгэж барьсан ганц шалтгаан нь фракцуудад эрх мэдлийн бялуу хуваалтыг энэ тэнцүү хийсэнд байгаа юм. Сонгуулиас өмнө тарж бутарсан Ардчилсан намыг 25 дэд даргатай болгож, хамтарсан Засгийн газарт багтахдаа ч фракцын төлөөллүүдийг энэ тэнцүү засагт багтаасан. Жагсаалт тойргийн хуваалтыг ч хэрэндээ хийсэн нь АН-д Л.Гантөмөр сайн нэртэй үлдэх нэг шалтгааныг бүрдүүлсэн билээ. Цаашлаад намын удирдах албан тушаалд энэ фракц давуу эрхтэй гэхгүйгээр энэ тэнцүү хувиарлалт хийснээр тарж байсан Ардчилсан нам эвээ олсон гэж болно.

        Харин УИХ-ын гишүүн О.Цогтгэрэл АН-ын даргад ногоон гэрлээр дэмжигдсэн нь МАН-ын “захилгатай” гэгдэж байгаа. Хэдийгээр МАН-тай нэг хөгжилд орсон байлаа ч фракцын зодооноо давж гаргахгүй бол АН-ыг ахиад хоёр тамгатай болгож мэднэ. Тиймээс О.Цогтгэрэл Л.Гантөмөрийн арга барилаар явж, нам доторх эрх мэдлээ энэ тэнцүү хийхээр бэлдэж эхэлсэн гэнэ.

АН-ЫН ГЕНСЕКЭЭР Н.ГАНИБАЛЫГ УЛИРААХ ТОХИРОО Л.ГАНТӨМӨРТЭЙ ХИЙЖЭЭ

        Ардчилсан намын дарга Л.Гантөмөр хамтарсан Засгийн газраас гаргасныхаа дараа сонгуулиар ялагдал хүлээсэн хариуцлагаа хүлээж, намын даргын суудлаа хүлээлгэж өгнө гэж байлаа. Дүрмээрээ намын Ерөнхий нарийн бичгийн дарга болон нийслэлийн Ардчилсан намын дарга нар ч хариуцлага хүлээж албан тушаалаа хүлээлгэж өгөх ёстой. Харин О.Цогтгэрэл Л.Гантөмөр нар ойлголцолд хүрч АН-ын генсекээр Н.Ганибалыг улираахаар тохиролцсон гэнэ. Өөрөөр хэлбэл, Н.Ганибалын хувьд УИХ-ын сонгуулийн дараагаас Ерөнхий нарийн бичгийн даргын орлон гүйцэтгэгчээр томилогдож, өнгөрсөн хоёрдугаар сард албажуулсан. Тиймээс хариуцлага хүлээх шаардлагагүй хэмээн үзэж намын генсекээр улираах тохироонд хүрсэн байна. Мөн УИХ-ын гишүүн Ц.Туваан АН-ын даргад нэр дэвших асуудал яригдаж, намын генсекээ улираах тохироонд хүрснээр нэрээ татсан гэх яриа ч гарч байлаа.  Ардчилсан намын Ерөнхий нарийн бичгийн дарга Н.Ганибалын хувьд Нэг монгол фракцыг төлөөлдөг. Үндсэндээ намын даргад сонгогдсон О.Цогтгэрэлтэй нэг фракцад харъяалагддаг гэсэн үг.

НИЙСЛЭЛИЙН АН-ЫН ДАРГА Ч.ЛОДОЙСАМБУУ ЯРИГДАЖ БАЙНА

        Ардчилсан намын даргад нэр дэвшинэ гэдгээ албан ёсоор зарлаж амжсан Ч.Лодойсамбуу намын дүрмээрээ даргад горилох боломжгүй болсон. Мэдээж эхэндээ олны анхаарал татах ажлуудаа тэр сурсан дадснаар атлаа гэнэт бууж өгсөн нь анхаарал татаж байна. Өөрөөр хэлбэл, тэрбээр “АН-ын даргын сунгаанд би нэрээ дэвшүүлнэ. Гэхдээ Их хурлаараа намын дүрмээ шинэчилж батлъя. Дараа нь даргаа сонгоё” гэж мэдээлэл хүртэл хийж байлаа.  Ийн дүрмээ шинэчилнэ гэх санаачлага гаргаж, сенсаци тарьсан хэрнээ гэнэт л “Дүрмийн дагуу дэвших эрхгүй болчихлоо” гэж нэрээ татсан нь итгэл үнэмшилгүй байгаа илт. 

        Харин УИХ-ын гишүүн Ч.Лодойсамбуу нэрээ татсны цаана дүрэм гэхээс илүү том эрх ашиг байсанд учир байжээ. Өөрөөр хэлбэл, О.Цогтгэрэл  намынхаа хамгийн отгон фракц болох Янзага фракцынханд нийслэлийн АН-ын даргын суудлыг санал болгосон байна. Тиймээс О.Алтангэрэл, Ч.Лодойсамбуу, Ш.Бямбасүрэн, Ө.Шижир тэргүүтэй АН-ын залуус дүрмээ шинэчлэхийг шаардаж байсан шаардлагаа олны анхаарлаас холдуулж, намжсаан байна. Ингээд УИХ-ын гишүүн Ч.Лодойсамбууг нийслэлийн Ардчилсан намын даргад томилуулах асуудлыг ярьжээ. Харин одоогоор Нийслэлийн АН-ыг Т.Батцогт удирдаж байгаа юм.

АРДЧИЛСАН НАМЫН БҮЛГИЙН ДАРГАД УИХ-ЫН ГИШҮҮН Б.ЖАРГАЛАН, С.ЭРДЭНЭБОЛД НАРЫН НЭРС ЯРИГДАЖ БАЙНА

         Ардчилсан намын даргаар сонгогдсон О.Цогтгэрэлийн хувьд хоёр парламентад УИХ дахь Ардчилсан намын бүлгээ удирдаж, бүлгийн даргаа хийж байсан. Улсын дээд шүүх О.Цогтгэрлийг намын даргаар батламжлахыг хүлээж байгаа. Тиймээс одоо албан тушаалаа хүлээлгэж өгөх нь тодорхой болсон. Харин дараагийн бүлгийн дарга хэн байх вэ гэдэг томилгоог Саарал орныхон чих тавин хүлээж байна.

    Тэгвэл УИХ дахь Ардчилсан намын даргад УИХ-ын гишүүн Б.Жаргалан С.Эрдэнэболд нарын нэрс яригдаж байна. Аль аль нь Нэг Монгол фракцыг төлөөлдөг.