Дуучин Баярцэнгэлийн “Хайр эзэнтэй” дууг хэвлүүхэн дуулж байгаа хүүгийн бичлэг цахим сүлжээнд нийтлэгдсэн цагаасаа хүмүүсийн хайрыг татаж, эерэг хандалт аваад байгаа билээ. Тус хүүг О.Есүхэй гэдэг. Төв аймгийн Сэргэлэн сумын ерөнхий боловсролын сургуулийн дөрөвдүгээр ангийн сурагч. Цэцэрлэгт байхаасаа дуулж эхэлсэн түүний авьяасыг хоёрдугаар ангид байхад А.Андрей багш нь олж харан түүнийг шавиа болгон бэлдэж эхэлсэн байна. О.Есүхэй багшийнхаа үгнээс огт зөрөлгүй хичээж, сайн дуучин болохын төлөө хичээж байгаа гэнэ. Ирээдүйд Төв цэнгэлдэхийн тайзан дээрээс сонсогчидтойгоо уулзах гэгээхэн мөрөөдөлтэй О.Есүхэй  “Ээжээ, би анх удаа ярилцлага өгч байгаа тиймээ” гэсээр сандал дээрээ суусан юм. Камер хараад жаахан сандарсан хүү “Анх удаа болохоор л би жаахан сандраад байгаа шүү. Тайзан дээр гарахдаа хэзээ ч сандарч үзээгүй. Багш маань ард хөгжим тоглож эсвэл хамтдаа дуулдаг болохоор бүүр сандардаггүй юм. Одоо багш байхгүй болохоор л жаахан сандраад байна” гээд учраа тайлбарласнаар бидний яриа эхэлсэн билээ.

-Чамд хичээлийн шинэ жилийн мэнд хүргэе. Гурван сар уулзаагүй найзуудтайгаа уулзах ямар байна?

            -Баярлалаа, ангийнхантайгаа уулзах, сургууль дээрээ очих гоё байлаа. Манай ангийн зарим хүүхэд надаас өндөр болчихсон байна лээ. Зуны амралтаар багш нараа их санасан.

-Чиний дуучин П.Баярцэнгэлийн “Хайр эзэнтэй” дууг дуулж байгаа бичлэг цахим сүлжээнд хандалт өндөртэй байгаа шүү дээ. Бичлэгээ үзсэн үү, ямар санагдсан бэ?

            -Миний дуулж байгаа бичлэг цахим сүлжээнд од болж байгааг харсан. Хүмүүс магтсан байсан учраас гоё санагдсан шүү. Би Соёлын төвийнхөө тайзан дээр л дуулдаг байхгүй юу. Бичлэгээ үзчихээд “Дараа өөр илүү том тайзан дээр гарч дуулах юм байна даа” гэж бодогдсон.

-Дуртай дуучин бий юү?

            -Би дуучин П.Баярцэнгэл ахын дуунуудад дуртай. Чихэнд сонсголонтой байдаг юм. Тэр дундаас “Хайр эзэнтэй” дуу эмэгтэй хүнийг хүндэлж, хайрлаж, хамгаалах хэрэгтэй гэсэн утгатай учраас бүүр их дуртай.

-О.Есүхэй ирээдүйд ямар тайзан дээр гарч дуулмаар байгаа юм бэ?

            -Би төв цэнгэлдэх хүрээлэнгийн тайзан дээр гарч дуулдаг дуучин болмоор байгаа. Тэр тайзан дээрээс эмээдээ дуулж байгаагаа харуулмаар байна. Манай эмээ намайг дандаа дэмждэг, дуулж байгааг минь сонсох дуртай. Намайг тайзан дээр гарахаар хүмүүст “Миний хүүгийн бичлэгийг хийгээрэй, би үзнэ шүү” гэж захидаг.

-Түрүүн тайзан дээр гарахдаа сандардаггүй гэсэн. Ерөөсөө сандарч үзээгүй юу?

            -Огт сандардаггүй ээ. Намайг тайзан дээр байхад хүмүүс дэмжиж, алга ташиж, баяр хүргэдэг учраас үнэхээр сайхан байдаг юм. Сандрахгүйгээр илүү хичээж дуулахыг хичээдэг.

-О.Есүхэй дүүтэй юу?

            -Би доороо хоёр дүүтэй. Хоёр дүүгээ эрхлүүлэх дуртай. Манай бага дүү дандаа намайг хайрладаг. 

-Чиний хувьд хамгийн онцгой дурсамж үлдээсэн тайз бий юү?

            -Манай Сэргэлэн сумын Соёлын төв өргөөгийн тайз л хамгийн гоё нь. Би тэр тайзан дээр олон удаа гарсан. Намайг нэгдүгээр ангид байхад Соёлын төв өргөө баригдаж бид гоё тайзтай, бэлтгэл хийх өрөөтэй болсон.

-А.Андрей багшийнхаа талаар ярихгүй юу?

            -Намайг сургуулийнхаа урлагийн үзлэгээр дуулж байхад багш олж хараад шавиа болгож авсан. Би хоёр байнга хамт байж бэлтгэлээ хийдэг. Соёлын төв өргөөний зааланд бэлддэг юм. Тэнд бэлтгэлээ хийгээд суух хамгийн гоё. Багш бэлтгэлийн үеэр хатуу байдаг ч бусад цагт намайг их эрхлүүлдэг. Намайг “Миний хүү” гэж дууддаг нь их таалагддаг юм. Багш гитар, би бөмбөр тоглодог. Багштай тайзан дээр гарах хамгийн гоё. Бүүр сандрахаа больчихдог.

-Бөмбөр тоглодог гэсэн. Яагаад бөмбөр тоглож сурахаар шийдсэн юм бэ?

            -Би долоон настайгаасаа бөмбөр тоглож байгаа. Учир нь, би рок дуучин болохыг хүсдэг. Бөмбөр тоглохдоо хоёр цохиураа сайн барьж сурах хэрэгтэй.

-Чи яагаад рок дуучин болохоор шийдсэн юм?

            -Эрч хүч нь ундарсан хүн байдаг болохоор рок дуучин болохыг хүссэн. Толгойгоо хөдөлгөөд хөгжим тоглох үнэхээр гоё байдаг юм. Толгой өвдөхгүй харин ч эрч хүч нэмэгддэг. Багш минь урт үстэй рок дуучин байсан юм билээ. Даралт нь ихсээд байгаа болохоор үсээ тайрчихсан гэсэн. Би багш шигээ үсээ урт ургуулна аа.

Тайзан дээр гарах, дуулах талаар ярихдаа нүдэнд нь оч гялалздаг ийм нэг хөөрхөн хүүтэй ярилцсан юм. Зорьсон зорилготой, түүндээ хүрэхийн тулд хичээж байгаа О.Есүхэй хүүгийн ирээдүй нь хамгийн гэрэлтэй, дардан байх болтугай.