"Хайр гэж усны ундарга, модны үндэс шиг ёроолд нь байдаг юм байна" гэж хэлэхдээ Туул хайрын мөн чанарыг сая нэг ойлгоно. Гэхдээ тэр энэ бүхний учрыг олох гэж амьдралынхаа арав гаруй жилийг, нэмээд хайртай хүнээ өөрөөсөө хормын төдийд түлхэхдээ бүрмөсөн холдуулчихсан цаг хугацааг зарцуулсан гэхээр даанч харамсалтай.

         “Хүмүүс нэгнээ, нэгэндээ өгсөн хайр сэтгэлээ зүгээр хайрлачихаж болдоггүй хэрэг үү. Ямар ч хэрүүл маргаан, үл ойлголцол, хардалт сэрдэлт, илүү, дутуу шунал, хүсэлгүйгээр үгийн сайхныг хэлж, хамаг сэтгэлээ дэлгэн ойлголцоод, итгэлээ бэхлээд ямар ч зовлонгүйгээр нэгнээ хайрлаж яагаад чухам болдоггүй юм бол” гэж Төрийн шагналт, Соёлын гавьяат зүтгэлтэн Дармын Батбаярын “Хайрыг хайрла” жүжгийн зохиолыг нь уншихдаа ч, Төрийн соёрхолт, Урлагийн гавьяат зүтгэлтэн Н.Наранбаатар найруулагчийн найруулгаар тайзны бүтээл болсныг нь үзэхэд ч бодогдож байлаа. 

       Тэдэн шиг гэр бүл олон бий. Тэгээд салж буй. Санаад, очмоор байв ч хатуу үгс, хайхрамжгүй зандаа хүлэгдээд шаналан зовж буй. Үнэхээр хайртай л бол хүлээсээ тайлаад оройтоогүй дээрээ очих хэрэгтэй, бүхнээ ярьж зүгээр л нэгнээ ямар ч хүсэлгүйгээр хайрлах хэрэгтэй шиг. Үзэгч миний хувьд сэтгэл хөндүүр байна аа, үнэндээ. Хайртай ч болохгүй байна гээд салсан хэчнээн гэр бүл энэ хотод байгаа бол гэж бодохоор гунигтай байна. Тэдний тэр их хайр зөвхөн зүрх сэтгэлд нь л оргилон ундарч, гадагшилж чадахгүй тэрүүхэндээ ширгээд үгүй болдог байх гэж бодохоор, хүмүүсийн хайр тийм хязгаарлагдмал баригдмал байсаар дуусдаг гэхээр түүн шиг эмгэнэл энэ ертөнц дээр байхгүй шиг санагдана.

       Н.Наранбаатар найруулагч тус жүжгийг энэ цагийн залуусын араншин, байр байдалтай сүлж тавьснаараа, дуутай, бүжигтэй баялаг өргөн үзүүлжээ. Мөн нэмж Яргуй, Мөнхөө хоёрын дүрийг оруулж ирсэн нь дүрийн харилцааг илүү өрнүүлж өгсөн байна. Өнөөдөр цахим орчинд олон дагагчтай, хөдлөөд л лайв, стори хийдэг Яргуй шиг хүн олон бий. Ямар ч хариуцлага хүлээж, үүрэхгүйгээр ганцаараа эрх чөлөөтэй, гаднаас нь харахад юунд ч хөнгөн амар юм шиг мөртлөө угтаа ганцаарддаг Мөнхөө нар ч бий. Тэдний дүрээс бид өнөөдрийн өөрсдийгөө тольдон харж болохоор байв. Хайрыг түгээсэн, хайрын мөн чанарыг тайзнаас үзэгчдэд сануулж, хэлж буй жүжгийн баг хамт олонд баяр хүргэе. Хайрыг хагалж, эвдэж, бутлахгүйгээр эвлүүлж, өрж, босгон байгуулж, хайрлаж сурах хэрэгтэй гэдгийг тод үзүүллээ.