Баянгол дүүргийн 22 дугаар хорооны дугаар тоотод зургаан хүн угаартаж, нас барсан харамсалтай хэрэг гараад байгаа. Талийгаач О гэх эмэгтэй гурван хүүхэдтэйгээ, мөн хамтран амьдрагч, хамаатны өсвөр насны охинтой хамт угаартсан талаар ар гэрээс нь мэдээлэл хийгээд буй.

            Энэ талаар талийгаач О-ийн хүү О.Одбаяр мэдээлэл өгөхдөө “Цэргийн албанд татагдаад явсан хойгуур ээж, хөөрхөн дүү нар минь угаартаад амиа алдчихлаа. Надад маш хэцүү байна. Би цаашид яаж амьдрах юм бэ” хэмээн мэдээлэл өгөөд байгаа юм.

Цэргийн албанаас ирсэн хүүг мэдээлэл хийсний дараа цахим сүлжээнд ээжийг нь архичин, хүүг нь хулгайн хэрэгт холбогдож байсан гэх мэдээлэл цацагдаад байна.

Бид энэ хэргийн талаар тухайн өдөр дуудлага өгсөн Б.Отгонхүүтэй холбогдож, тодрууллаа. Тэрбээр “Намайг очиход хаалга нь цоожтой, чимээ аниргүй байсан. Тэгээд би цагдаагийн байгууллагад дуудлага өгсөн. Мөн цонхыг нь хагалж, гэр рүү нь орох зөвшөөрөл авсан. Нэг нь ч болтугай амьд байж магадгүй гэж бодоод цонхыг нь хагалж орсон. Гэтэл бүгд нас барсан байсан. Тэгээд цагдаа, эмнэлэг ирээд аваад явсан. Би дүүтэйгээ өмнөх өдөр нь уулзсан. Гэтэл маргааш нь ийм харамсалтай зүйл болчихлоо. Цэргээс ирсэн хүү О.Одбаярт нь маш хэцүү байгаа. Би одоогоор уулзаагүй байна. Мэдээлэл өгч байхыг нь харсан. Буруу, зөрүү мэдээлэл өгөх вий гэсэндээ манай дүү татсан юм байна лээ. Гэтэл үүнийг хүмүүс буруугаар ойлгоод байна. Дээрээс нь, миний талийгаач дүүг архичин, хүүг нь хулгайч гэж зарлаж байна. Миний дүү архичин байгаагүй. Ажил төрөл хийгээд, хүүхдийнхээ төлөө хичээж л явсан эмэгтэй. Бидэнд хэцүү байхад сошиалаар худал, үнэн нь мэдэгдэхгүй мэдээлэл тарааж байгаад харамсаж байна. Ийм худал мэдээлэл тараасан хүмүүсийг олж хариуцлага хүлээлгэх ёстой” гэлээ.