Хотын дарга Х.Нямбаатар 32 мянган зуух худалдаж авахаар 28.2 тэрбум төгрөгийн тендер зарлаад байгаа. Худалдаж авсан 32 мянган зуухаа гэр хорооллын дахин төлөвлөлтөд ороогүй, эсгий гэрт амьдардаг айлуудад зээлээр олгоно гэдгээ мэдэгдсэн. Ингэснээр Улаанбаатарын утааг 2-3 дахин бууруулна гэх амлалтыг ч өгөөд буй.

      Ноцтой нь, Хотын дарга Х.Нямбаатар тендерээсээ урьтаад, тухайн 32 мянган зуухаа хэнээс авахаа аль эрт тохирчихсон байж болзошгүй байна. Өөрөөр бол, хэрвээ шууд гэрээгээр худалдаад авчихвал хууль зөрчинө, нөгөө талаас хэл ам дагуулах учраас ёс төдий тендер зарласан байж болзошгүй гэсэн үг. Илүү ноцтой нь, тухайн 32 мянган зуухны “шахаа”-ны лобби-г Байгаль орчны сайд С.Одонтуяа хийж байж болзошгүй маш ноцтой сэжүүр байна.

Нэгдүгээрт, Хотын дарга Х.Нямбаатарын орлогч А.Амартүвшинд өнгөрсөн долоо хоногт хэвлэлд ярилцлага өгөхдөө “Зуух тараана гэхээр 10 гаруй жилийн өмнө тарааж байсан Өлзий, Дөл зуухтай адилтгаж ойлгож болохгүй. Тухайн үед сайжруулсан түлш байгаагүй, түүхий нүүрсээ түлдэг байсан. Одоо бид сайжруулсан шахмал түлштэй. Дээрээс нь 10 гаруй жил өнгөрсөн учраас зуухны технологи ч илүү хөгжсөн. Шинээр солих зуухны хувьд оюуны өмчөөр баталгаажсан, давхар шаталттай гэдгээрээ давуу талтай. Тиймээс утааг 2-3 дахин бууруулна гэж тооцоолж байгаа” гэж ярьсан. Анзаарвал, Хотын орлогч А.Амартүвшин “Оюуны өмчөөр баталгаажсан, давхар шаталттай зуух байгаа” гээд ам алдчихаж байгаа биз. Гэтэл 32 мянган зуухны тендерийн шалгаруулалтыг энэ сарын 24-нд явуулна. Одоогоор тус тендерт оролцох компаниуд өөрсдийн зуухныхаа танилцуулгыг ч явуулж амжаагүй байгаа гэсэн үг. Гэтэл А.Амартүвшин “Оюуны өмчөөр баталгаажсан, давхар шаталттай зуух байгаа” гээд аль хэдийнэ тодруулчихсан аятай яриад явж байгаа нь эхний сэжүүр.  

Хоёрдугаарт,  Байгаль орны сайд С.Одонтуяа өнгөрсөн долоо хоногт хэвлэлд ярилцлага өгөхдөө “Улаанбаатарын утааг бууруулахын тулд бидэнд ойрын хугацаанд үр дүнгээ өгөх шийдэл хэрэгтэй. Монгол инженерийн зохион бүтээсэн давхар шаталттай зуухыг судалж үзсэн. Маш үр дүнтэй, ерөөсөө утаа гаргадаггүй, олон жил туршигдсан зуух байна лээ. Би өөрөө тэр зууханд нь гал түлж үзээд, яндангаар нь утаа гарч байгаа эсэхийг нарийн шалгасан. Тэгээд би улсын төсвийн хөрөнгөөр хэдэн зуух авч Баянгол дүүргийнхээ айлуудад саяхан тараасан. Давхар шаталттай зуухтай болсон айлуудаа дроноор хянаж үзэхэд үнэхээр утаа гаргахгүй байгаа байхгүй юу. Тэр айлууд маань ч бүгдээрээ маш ам сайтай байгаа. Үнэхээр маш сайн халдаг, гол нь угаартах эрсдэлгүй гэдгээ давуу талтай. Одоо аймгуудад 10-15 зуухыг туршилтаар тарааж байна. Монголчууд бид бүгд орон сууцанд ортлоо, бүгд газ хэрэглэдэг болтлоо хаа ч билээ. Тэгэхээр утаагүй зуух хэрэглэх нь зөв” гэж ярьсан. Анзаарвал, Байгаль орчны сайд С.Одонтуяа хувийн компанийнхаа буюу өөрийнхөө зуухыг ярьж байгаа мэт тэнгэрт тултал магтаж, “Маш сайн, бүр маш сайн зуух” гэж өгүүлбэр бүрийнхээ төгсгөлд өргөмжилж байгаа биз.  

Гуравдугаарт, Хотын орлогч А.Амартүвшин, Байгаль орчины сайд С.Одонтуяа хоёр хэвлэлээр “Оюуны өмчөөр баталгаажсан, давхар шаталттай сайн зуух байгаа” гэж ам уралдан магтаж байхтай яг зэрэгцээд сонин, сайт, сошиал сүлжээнд “Эко ресурс” ХХК-ийн “Нүүдэлчин” гэх зуухны сурталчилгаа “бөмбөгдөж” эхэлсэн. Ингэхдээ Хотын орлогч А.Амартүвшин, Байгаль орчны сайд С.Одонтуяа хоёрын магтаж ярьсантай яг адилхан буюу “Монгол инженерийн ур ухаанаар бүтсэн утаагүй зуух”, “Утаанаас салах хамгийн хурдан шийдэл бол Нүүдэлчин зуух”, “Нүүдэлчин зуух огт утаа гаргахгүй”, “Иргэд угаартах аюулгүй амар тайван амьдрахын төлөө Нүүдэлчин зуухыг сонгож байна”, “Давхар шаталттай учраас жилд 360 мянган төгрөг хэмнэнэ”, “Улаанбаатарыг утаанаас салгахад гуравхан өдөр хангалттай”, “Тавантолгой түлш” ХХК-ийн сайжруулсан түлшинд зориулсан зуух”, “Утаанаас салмаар байгаа бол зуухаа соль” гэх мэтээр сурталчилгаанууд маш олон давтамжтайгаар явж эхэлсэн.

Нэгтэж харвал, Хотын орлогч А.Амартүвшин, Байгаль орчны сайд С.Одонтуяа хоёр “Эко ресурс” ХХК-ийн “Нүүдэлчин” зуухыг магтаж яриад байсан нь ийнхүү ойлгомжтой болгож байгаа юм.

Тэгвэл “Нүүдэлчин” нэртэй зуухыг зах зээлд гаргаж эхлээд буй “Эко ресурс” ХХК-ийг Цэрэндоржийн Мөнхбаатар, Паламын Баярцог гэх хоёр хүн эзэмшдэг, эцсийн өмчлөгчөөр нь ч хоёулаа бүртгэлтэй байдаг. Ингэхдээ Цэрэндоржийн Мөнхбаатар нь өөрийгөө “Нүүдэлчин” зуухыг зохион бүтээсэн, инженер гэж танилцуулж буй. Тэгвэл Паламын Баярцог нь хэн бэ гэдэг асуулт гарч ирнэ.

     Ноцтой нь, Паламын Баярцогт нь Батбаярын Алтантариа, Цэнгэмаагийн Амраа хоёртой “Веллком” ХХК-ийг хамтран эзэмшдэг. Тэгвэл Батбаярын  Алтантариа нь Байгаль орчны сайд С.Одонтуяагийн хүү Ө.Үнэнбүрэнгийн эхнэр буюу бэр нь. Харин Ц.Амраа гэгч нь Байгаль орчны сайд С.Одонтуяагийн нөхөр Г.Өлзийбүрэнг 2012-2016 онд Ашигт малтмал, газрын тосны газрын дарга байх үед дэд даргаар нь ажиллаж байсан цэрэг нь. Байгаль орчны сайд С.Одонтуяагийн нөхөр Г.Өлзийбүрэн, түүний цэрэг Ц.Амраа хоёр 2016 онд Ашигт малтмал, газрын тосны газрын дарга, дэд даргын ажлаа өгцгөөснийхөө дараахан буюу 2017 онд П.Баярцогтой хамтран “Веллком” ХХК-ийг байгуулсан. Ингэхдээ Г.Өлзийбүрэн нь өөрийнхөө өмнөөс бэр Б.Алтантариагаа бүртгүүлсэн. Улмаар тэд Ашигт малтмал, газрын тосны газрын удирдаж байсан эрх мэдэл, нөлөөгөө ашиглан “Веллком” ХХК-аараа ОХУ-аас шатахуун импортолж, уул уурхайн компаниудад нийлүүлж эхэлсэн байдаг. Өөрөөр бол, “Веллком” ХХК нь жирийн цүнхний компани төдий биш, шатахууны мөнгө эргэлддэг том компани.

Эндээс харвал, “Нүүдэлчин” зуухыг зэх заалд гаргаж буй “Эко ресурс” ХХК-ийг эзэмшигч П.Баярцог гэгч нь Байгаль орчны сайд С.Одонтуяатай нөхөр, бэрээр нь дамжсан нэгдмэл ашиг сонирхолтой этгээд гэдэг нь тодорхой харагдаж байгаа юм. Дээрээс нь, Байгаль орчны сайд С.Одонтуяа хэвлэлд ярилцлага өгөхдөө “Эко ресурс” ХХК-ийн “Нүүдэлчин” зуухыг тэнгэрт тултал магтаж, өөрөө ч “Нүүдэлчин” зуухыг тойрогтоо тарааснаа хүлээн зөвшөөрсөн ч “Эко ресурс” ХХК-д үйлчилж буйх нь бас нэг баталгаа.

     Тэгэхээр Байгаль орчны сайд С.Одонтуяа, Хотын дарга Х.Нямбаатартай хуйвалдаж, гэр бүлийнхээ бизнесийн хамтрагч П.Баярцогийн “Эко ресурс” ХХК-ийн 32 мянган “Нүүдэлчин” зуухыг нийслэлд тарааж, 28.2 тэрбум төгрөгөөс хувь хүртэх лобби явуулж байж болзошгүй байна.