Жүдо бөхийн 2025 оны эхний “Гранд слам” тэмцээн ирэх хоёрдугаар сарын 1-2-ны өдрүүдэд Франц Улсын Парис хотод эхлэх гэж байгаа билээ. Энэ удаагийн “Их дуулга” тэмцээнд дэлхийн 50 орны эрэгтэй 164, эмэгтэй 134, нийт 298 жүдочин барилдах мэдүүлэгийг одоогоор өгөөд байна. Манай улсаас эмэгтэй долоо, эрэгтэй таван тамирчин хүч үзнэ.

ЭРЭГТЭЙЧҮҮДИЙН 60 КГ-Д  Б.СҮХБАТ, Н.МЭНДСАЙХАН

       Эрэгтэйчүүдийн 60 кг-ын жинд 20 жүдочин байгаа. Манай улсаас улсын гурван удаагийн аварга ОУХМ Бямбасүрэнгийн Сүхбат, өсвөр үеийн ДАШТ-ий мөнгөн медальт Нямсүрэнгийн Мэндсайхан нар барилдана. Н.Мэндсайхан “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Францын REVOL Cedric-тэй барилдана. Хэрэв түүнийг ялж чадах юм бол “А” хэсгийн аваргын төлөө Франц, Ливан, Испанийн тамирчдын хэн ялсантай хүч сорино.

      ОУХМ Б.Сүхбат “С” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Францын Romain VALADIER PICARD-тай таарсан. Түүнийг ялж чадах юм бол “С” хэсгийн аваргын төлөө Узбекистан, Азербайжан Анголын тамирчдын хэн ялсантай барилдана.

ЭРЭГТЭЙЧҮҮДИЙН 66 КГ-Д  Г.ХЭРЛЭН, Б.НЯМРЕНЧИН, Б.НАРМАНДАХ

       Эрэгтэйчүүдийн 66 кг-ын жинд  25 жүдочин байна. Манай улсаас ОУХМ Ганболдын Хэрлэн, Бадамрагчаагийн Нямсренчин, АНЭУ-ын нэр дээр барилдаж буй ОУХМ Баянмөнхийн Нармандах  нар өрсөлдөнө.  ОУХМ Г.Хэрлэн “А” хэсгийн нэгдүгээр тойрогт Канадын Julien FRASCADORE-тэй барилдана. Хэрэв түүнийг ялж чадах юм бол хоёрдугаар тойрогт Азербайжан,  Монтенегрогийн тамирчдын хэн ялсантай барилдана. Б.Нямренчин “С” хэсгийн нэгдүгээр тойрогт  Солонгосын  KIM Channyeong-тай хүч үзнэ. Хэрэв ялж чадвал хоёрдугаар тойрогт Азербайжаны Ruslan PASHAYEV-тай барилдана. Б.Нармандах “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Гүрж болон Гуйнеа Биссау Улсын тамирчдын хэн ялсантай хүч сорин өрсөлдөнө.

ЭРЭГТЭЙЧҮҮДИЙН 81  КГ-Д  О.ШИНЭБАЯР

       Эрэгтэйчүүдийн 81 кг-ын жинд 26 жүдочин байна. Манай улсаас Оюунчимэгийн Шинэбаяр барилдана. Тэрбээр “С” хэсгийн нэгдүгээр тойрогт Гүржийн Kote KAPANADZE-тэй таарсан. Хэрэв түүнийг ялж чадах юм бол хоёрдугаар тойрогт Канадын Francois GAUTHIER DRAPEAU-тай таарна.

 ЭМЭГТЭЙЧҮҮДИЙН 48  КГ-Д  Ж.АНУДАРЬ

      Эмэгтэйчүүдийн 48 кг-ын жинд 18 жүдочин байна. Манай улсаас залуу тамирчин, шинэхэн улсын аварга, өсвөр үеийн ДАШТ-ий мөнгөн медальт Жамсрангийн Анударь барилдана. Тэрбээр “С”хэсгийн нэгдүгээр тойрогт Өмнөд Солонгосын PARK Eunlee-тэй барилдана. Хэрэв түүнийг ялж чадах юм бол хоёрдугаар тойрогт Японы KOGA Wakana-тай таарах юм.

ЭМЭГТЭЙЧҮҮДИЙН 52  КГ-Д Б.ГҮНДЭГМАА, Б.УРАНЗАЯА, Б.ХОРЛООДОЙ

     Эмэгтэйчүүдийн 52 кг-ын жинд 23 жүдочин бүртгүүлсэн байна. Манай улсаас Баянмөнхийн Уранзаяа, Болдбаатарын Гүндэгмаа нар өрсөлдөнө. Б.Гүндэгмаа “В” хэсгийн нэгдүгээр тойрогт Хонконгийн Shuk Ki TSUI-тай өрсөлдөнө. Хэрэв түүнийг ялж чадах юм бол хоёрдугаар тойрогт Испанийн Ariane TORO SOLER-той барилдана. Б.Уранзаяа “D” хэсгийн нэгдүгээр тойрогт Францын Julie WEILL DIT MOREY-тай таарсан. Түүнийг ялах юм бол хоёрдугаар тойрогт Киперийн  Sofia ASVESTA-тай өрсөлдөнө. ОУХМ Б.Хорлоодой “С” хэсгийг толгойлон нэгдүгээр тойрогт гоц мөргөн ялалт авсан байгаа. Хоёрдугаар тойрогт Сербийн Milica NIKOLIC, Францын Lea BERES нарын хэн ялсантай барилдана.

ЭМЭГТЭЙЧҮҮДИЙН 57  КГ-Д О.ОЮУНЧИМЭГ, М.ЦЭНДБАЗАР

     Эмэгтэйчүүдийн 57 кг-ын жинд 16 жүдочин барилдах мэдүүлэг өгөөд байна. Энэ жинд манай улсаас ОУХМ Оюунгэрэлийн Оюунчимэг, Машбатын Цэндбазар нар өрсөлдөнө. Манай тамирчин М.Цэндбазар “В” хэсгийн нэгдүгээр тойрогт Францын Martha FAWAZ-тай хүч үзнэ. Хэрэв түүнийг ялах юм бол хоёрдугаар тойрогт Францын Faiza MOKDAR, Испанийн Marta GARCIA MARTIN нарын хэн ялсантай таарах юм. О.Оюунчимэг “D” хэсгийн нэгдүгээр тойрогт Израилийн NELSON LEVY Timna-тай таарсан. Хэрэв түүнийг ялж чадах юм бол хоёрдугаар тойрогт Японы  Mika ADACHI, Францын Chloe  DEVICTOR нарын хэн ялсантай  “D” хэсгийн аваргын төлөө барилдах эрхтэй болох юм.

ЭМЭГТЭЙЧҮҮДИЙН 63  КГ-Д Х.МАРАЛМАА

      Эмэгтэйчүүдийн 63 кг-ын жинд 25 жүдочин барилдах мэдүүлгийг өгөөд байгаа. Манай улсаас залуу тамирчин Хүрэлчулууны Маралмаа барилдана. Тэрбээр “С” хэсгийн нэгдүгээр тойрогт Испанийн ахмад туршлагатай тамирчин Cristina CABANA PEREZ-тай барилдана. Түүнийг ялах юм бол хоёрдугаар тойрогт Хорватын Katarina  KRISTO-той таарна.

ЭМЭГТЭЙЧҮҮДИЙН 70  КГ-Д С.ЛХАГВАДУЛАМ

     Эмэгтэйчүүдийн 70 кг-ын жинд 21 жүдочин барилдах юм байна. Манай улсаас ОУХМ Саранцэцэгийн Лхагвадулам жин өгсөн өрсөлдөнө. Тэрбээр “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Италийн Irene PEDROTTI-тэй барилдана. Хэрэв түүнийг ялах юм бол “С” хэсгийн аваргын төлөө барилдах боломж гарна.