Сургуулиа төгсөөд театрт дөрвөн жил ажилласнаас хойш өдгөө 16 жилийн дараа эргэн тайзнаа гарч, “Монгол театр”-ын анхны уран бүтээл болох “Клеопатра” жүжгийн ромын жанжин Марк Антонигийн дүрийг тун амжилттай бүтээж байна, П.Баттөр.

   2008-2012 он хүртэл дөрвөн жилийн хугацаанд театрт ажилласан гэхээр бид болон биднээс хойших үеийнхэн түүнийг тайзнаас харж байгаагүй нь мэдээж. Тиймдээ ч “Клеопатра” жүжгийн яах аргагүй сонирхол татам, хараа булаам дүр түүнийх байлаа. 

        Улсаасаа урван байж хайрласан хайрандаа үнэнч үлдэх жанжны дүрийг тэр үдэш бүр театрын тайзнаа үзүүлж, үзэгчдийн талархлыг ч ихээр хүлээж байна. Анх “Хархны өгөөш” кинонд мафийн толгойлогчийн зэвүүн эсрэг дүрээр дэлгэцийн урлагт хөл тавьж, дараа нь МҮОНРТ-ийн бүтээл “Тусгай салаа” киноны даруухан, ноомой, ном уншиж, хуулийн дүрэм цээжлэхээс өөрийг мэдэхгүй хараа муутай “хөгшин” залуу цэрэгт татагдан ирээд, өрөөлдөн алхаж, бахардах шахам гүйх Түвшингийн дүрээрээ үзэгчдийн сэтгэлд дархлагдсан. Бие муутай хариугүй эрээс хэрхэн өлчир чийрэг болон өөрчлөгдөж, ямархан гавьяаг нөхөдтэй хамт байгуулдгийг ч мэдэхгүй үзэгч гэж үгүй. Бүр байр байдал, дүрийнх нь үг бүрийг цээжээр нь мэдэж, андахгүй хэлээд өгнө байх.

     “Хархны өгөөш” киногоор төдийлөн буугаагүй тэр харин Түвшингийн дүрээрээ дэлгэцийн урлагийн хаалгыг цэлийтэл нээн орж ирсэн. Хоёр дахь дүрээсээ л найруулагчдын “хараанд орж”, “Түүнийг одоо чухам ямар дүрд оноох уу” гэсэн бодлыг үүтгэж, эсрэг болон эерэг олон сайхан дүрийг өдгөө харин бүтээж амжжээ. Марк Антонигоос өмнө тэр ямар, ямар дүр бүтээж, анх хэрхэн урлагт орсон талаар нь уншигч танд хүргэе.

 
         Харин Гүртэн кинонд монгол эр хүний шинж чанарыг харуулсан Төмөрийн дүрийг бүтээсэн. “Би өмнө нь ийм дүрд ажиллаж үзээгүй. Анхны юм бүхэн алдаа дутагдалтай байдаг. Тиймээс үзэгчид наанатай, цаанатай хүлээж аваасай хүсэж байна” гэсэн. Олон ч дүрийн ард гарсан, одоо бол ямар ч дүрийг гаргах туршлага түүнд бий шүү дээ. Гэсэн ч бүтээхээр зорьж буй дүр бүхэндээ мэрийн хичээж, өөрийгөө чамлан дарж ажиллаж байгаа нь нэг талаар сайн дүрээ гаргах, үзэгчдийн сэтгэлд дүрээрээ үлдэх гол үүдэл болдог болов уу. Эдгээр дүрийн ард тэр харин хэсэг чимээгүй болж, уран бүтээлд ороогүй. Тэгсэн энэ хавар тайз, дэлгэцийн хоёр ч дүрээр тэсрэлт хийн гараад ирлээ.

        Учир нь хоёул үзэгчийн хувьд шинэ содон, сонирхол татам байв. Үүний нэг нь эхэнд дурдсан “Клеопатра” жүжгийн Марк Антони, нөгөө нь “Фантастик” продакшны Зура III “Цэвэрлэгээ” киноны тагнуулын дарга Итгэлийн дүр. Найруулагч О.Бат-Өлзий өмнө нь түүнийг өмнө “Буруу өрөг” кинонд харсан бол энэ удаад Б.Тамир найруулагч хашир хянамгай, үг дуу цөөтэй Итгэл даргын дүрд оноосон нь түүний тогтуун тайван, нямбай зан чанарыг илүүтэй товойлгосон гэмээр. Одоо харин түүний дараагийн тэсрэлт “Батхаан” түүхэн кино гэнэ. Түүний өнөөдрийг хүртэл өөрийгөө бүтээж байгаа гол зарчим нь холыг харж, хоёрыг тунгаадагт байдаг аж. “Би таваас арван жилийн дараа жүжигчин мэргэжлийнхээ хувьд, хувь хүн талаасаа ямар хэмжээнд байх вэ” гэж өөрөөсөө асуудаг байна. Тэгээд л хариултаа олж аваад, бодож төлөвлөсөн тэр хугацаандаа өөрийгөө бүтээж амждаг алсын хараатай уран бүтээлч юм. Эсрэг дүрд тоглох дуртай ч найруулагчид төдийлөн энэ чиглэлийн дүрд оноодоггүй ч зэвүүнээс зэвүүн, бүр жихүүцэм эсрэг дүр түүнийг хүлээж байгаа нь гарцаагүй ээ.