Засгийн газраас хөл хорионы үеийн дэмжлэг хэмээн тараасан иргэн бүрийн 300 мянган төгрөг хэдийнээ дуусаж, харин 300 мянгаас үүдэлтэй үнийн өсөлт л хэвээр үлджээ. ШӨХТГ-аас өргөн хэрэглээний бараа бүтээгдэхүүнийхээ үнийг өсгөсөн зах, худалдааны төв, дэлгүүрүүдэд тогтмол хяналт шалгалт хийж, торгож байгаа гэх боловч бодит байдал дээр үнийн өсөлт иргэдийн толгойны өвчин болсоор байна.

        Бид нийслэлийн иргэдийн 65 хувь нь оршин суудаг гэр хороололд, тэр дундаа алслагдсан гэр хороололд өргөн хэрэглээний бараа бүтээгдэхүүний үнэ ямар байгааг сурвалжиллаа. Ингэхдээ Сонгинохайрхан дүүргийн XXXIII хороо буюу хотын хамгийн баруун зах гэгдэх Тахилтад байрлалтай “Сүндэрлэх” хүнсний дэлгүүрийг сонгон авсан юм.

Бид орой ажил тарах үед буюу 19:00 цагийн орчимд тус дэлгүүрээр орсон юм. “Сүндэрлэх” хүнсний дэлгүүр Тахилт орчимдоо л хүнсний зах гэмээр үйлчлүүлэгч олонтой байх ажээ. Хөл хорионы энэ үед эндхийн иргэд хотын төв рүү явж бөөний зах, худалдааны төв орох боломжгүй учраас “Сүндэрлэх” хүнсний дэлгүүрээс л бүх хэрэгцээт бүтээгдэхүүнээ авч буй нь энэ. Тус дэлгүүрээр үйлчлүүлж буй иргэдийг хэсэг ажиглавал ихэвчлэн уутны ёроолд нэг жижиг бөөрөнхий мах, хэдэн ширхэг ногоо, хэрчсэн гурил, талх аваад гарч одох аж. Өөрөөр хэлбэл, иргэдийн 300 мянган төгрөг хэдийнээ дуусаж, хоногийн хоолоо өдөр өдөрт нь  залгуулж эхэлсэн нь төвөггүй ойлгогдоно.

      “Сүндэрлэх” дэлгүүрт өрөөстэй байх хүнсний өргөн хэрэглээний бүтээгдэхүүнүүдийн үнийг сонирхвол цагаан будаа килограмм нь 3100, “Улаанбаатар” гурил 2000,  сахар  нэг килограмм нь 2000, ургамлын тос 6000-7000, өндөг ширхэг нь 480 төгрөгөөр тус тус худалдаалагдаж байна. Харин айл өрхүүдийн гол хэрэглээ махны үнийг сонирхвол хонины мах нэг килограмм нь 12 мянга, үхрийн мах 14 мянга төгрөгөөр худалдаалагдаж байна. Иргэд мах, гурил, будаа, ургамлын тос л худалдан авахаас бус чихэр, жимс, ундаа, цайны боов огт сонирхох ч үгүй, ерөөс хажуугаар нь огт хараагүй юм шиг өнгөрөх аж. Эндээс үзвэл иргэд ажилгүй, орлогогүй болсон хөл хорионы энэ өдрүүдэд чихэр, жимс, ундаа сэлт тансаг хэрэглээнд тооцогдох болж, иргэд нэг ундааны оронд нэг килограмм гурил авахыг илүүд үзэх болжээ.

Бид тус дэлгүүрээс гарч, хүнсээ цуглуулаад араас гарч ирж буй иргэдээс хүнсний бараа бүтээгдэхүүний үнийн талаар тодруулсан юм. Ингэхэд иргэд хүнсний барааны үнэ килограмм тутамдаа, ширхэг тутамдаа хөл  хорионы өмнөхөөс багадаа л 100-400 төгрөгийн нэмэгдчихээд байгааг бухимдангуй хэлж байлаа.

Тодруулбал,

      Иргэн Т: Юмны үнэ өдөр ирэх бүр л тодорхой хэмжээгээр нэмэгдэж байна. Би хөгшинтэйгөө хоёулаа амьдардаг болохоор гурил, мах л ихэвчлэн авдаг. Ногоо нэг их хэрэглээд байдаггүй юм. Махны үнэ их өссөн байна. Хаа хөл Тахилтын бид чинь “Хүчит шонхор” зах орж чадахгүй юм. Уг нь тийшээ очиж авбал арай хямд байх болов уу л гэж. Тэгээд гэрийн ойролцоо дэлгүүрээс авахаар үнэ нь дийлдэхгүй юм аа. Махнаас эхлээд юм бүхний үнэ өсчихөөр Засгийн газраас өгсөн 300 мянган төгрөг нэг мэдэхэд л дуусчихсан. Хөгшин бид чинь хувцас хунар элээж хороож, өөр элдэв зүйл авч тансаглана гэх биш. Гэхэд л мөнгө дуусчихаад байна. Барааны үнэ өсөөд байхаар арга ч үгүй юм уу даа.

Манайх энэ дэлгүүрт өр тавьж, хоолныхоо юмнуудыг авдаг болохоор “та нар яагаад үнээ нэмээд байгаа юм” гэж хэлж чаддаггүй юм

      Иргэн С: Манай энэ хавийн хүнсний дэлгүүрүүд үнээ их өсгөдөг. Бусад газруудад ч ялгаагүй л байдаг байх, мэдэхгүй юм. Иргэдийн байнга худалдаж авдаг мах, гурил, талх, сүү өдөр ирэх тусам л 100, 200 төгрөгөөр нэмэгдээд байна. Яагаад юм бүү мэд. Манайх энэ дэлгүүрт өр тавьж, хоолныхоо юмнуудыг авдаг болохоор “та нар яагаад үнээ нэмээд байгаа юм” гэж хэлж чаддаггүй юм. Энэ хөл хориогоор хамгийн их нэмэгдсэн нь өндөг, будаа, гурил байна. Өндөг 500 төгрөгөөр олдохгүй байна. Гурил, будаа л гэхэд килограмм нь 200-300 төгрөгөөр нэмэгдчихсэн. Иргэдэд олгосон 300 мянган төгрөгөөр дэлгүүрт тавьсан өрөө дараад үлдсэнээр нь хэдэн өдрийн хүнсээ бэлдсэн. Одоо ирэх 14 хоногт энэ дэлгүүрээсээ л хүнсээ зээлнэ дээ гэж бодож байна.

    Хотын захын дүүрэг, хороололд үнийн өсөлт хэрхэн өдөр өдрөөр иргэдийн халаасыг тэмтэрч, үнийн өсөлтөд нэрвэгдсэн айл өрхүүдийн амьдрал хэрхэн уруудаж буйг ганцхан дэлгүүрээс дүрслэхэд л ийм байна. ШӨХТГ, Үндэсний статистикийн хороо зэрэг өргөн хэрэглээний бараа бүтээгдэхүүний үнийг төрд уламжилж, хянаж, хариуцлага хүлээлгэдэг байгууллагууд нь “Бараа бүтээгдэхүүний үнэ тогтвортой байна, үнээ өсгөсөн лангуудыг торголоо, зөрчлийг арилгууллаа” гэх албан мэдээ гаргаж, иргэд ямар ч үнийн дарамтгүй амьдарч буй харуулдаг. Гэтэл бодит байдал дээр үнийн өсөлт гэх чимээгүй аюул өдөр өдрөөр иргэдийн халаасыг сэгсэрч, үлдсэн хэдэн бор төгрөгийг нь авч одсоор л байна.