Монгол Улсын Ерөнхий сайд Л.Оюун-Эрдэнэ ажлын байрыг дэмжих гурван хувийн хүүтэй зээл олголтын нөхцөл байдалтай танилцахаар Хаан банкны салбар дээр ажиллалаа.

Тус банкны нэг эдийн засагч өдөрт 30-40 иргэнтэй харилцаж байгаа бөгөөд үл хөдлөх барьцааны бүртгэл, өөрийн нэр дээр үл хөдлөх хөрөнгөгүй байх зэр асуудал үүсэж байгаа аж. Харин тус банкнаас өмнө авсан зээлийн төлөлтөө хугацаанд нь хийсэн, харилцагчийн зан төлөвийн скор өндөр буюу 1-3 оноотой иргэд ажлын байрыг дэмжих зээлээ шууд авах боломжтой юм байна.

Энэ үеэр Ерөнхий сайд Л.Оюун-Эрдэнэ “Аж ахуйн нэгж, байгууллагад олгох гурван хувийн хүүтэй, гурван жилийн хугацаатай зээл хүрэх эзэндээ очиж байна. Арилжааны банкууд мэдээж тодорхой хэмжээний шалгуур тавьж буй. Энэ зээлийг олгож эхлээд нэг сар орчим хугацаа өнгөрсөн байна. Энэ хугацаанд 500 гаруй иргэнд зээл олгосон байна. Өнөөдөр Монголбанкан дээр ажиллаж, энэ зээлийн давуу болон сул тал юу байв гэдгийг дахин үнэлэх уулзалт хийлээ” гэв.

Харин Сангийн сайд Б.Жавхлан “Бидний зорилго бол гурван хувийн хүүтэй, гурван жилийн хугацаатай хоёр их наяд төгрөгийн зээл гаргах юм. Зээл олгож эхэлснээс хойш 21 хоног болж байна. Өнөөдрийн байдлаар 500 гаруй аж ахуйн нэгжид 73 тэрбум төгрөгийн зээл олгоод байна. Үлдсэн хугацаанд энэ хурдаар явах юм бол гурван сарын дотор зээлүүдийг бүрэн гаргах боломжтой.

Тэгэхээр хүртээмжийн хувьд бидний тооцоолж байгаагаар бичил бизнес эрхэлдэг, ажил олгодог, ажлын байр бий болгодог 15 мянган иргэн, 4000-5000 аж ахуйн нэгжид энэ зээл олгогдоно. Ингэж чадвал эдийн засагт бодитойгоор сэргэлт бий болгож чадна гэж харж байгаа. Шалгуурын хувьд төрийн зүгээс НӨАТ төлөгч байгаарай гэдэг шаардлага тавьж буй. Ковидын үед НӨАТ төлөгч болж чадаагүй байсан ч, зээл хүсэж байгаа иргэн өмнөх өдөр нь ч хамаагүй НӨАТ төлөгчөөр бүртгүүлсэн байхад болно. Өөр нэмэлт шаардлага байхгүй.

Зээлийн чанар муу байвал зээл олгож болохгүй гэдэг зохицуулалт, хууль дүрэм хаана ч байхгүй. Энэ бол арилжааны банкууд өөрсдийн суурь эх үүсвэрээр зээл олгож байгаа учраас эрсдэлээ тооцож байгаа юм

Харилцагчийнхаа хадгаламжийн эх үүсвэрийг эрсдэлгүй байлгах шаардлагатай шүү дээ. Зээлийн ангиллын хувьд нэг удаа энгийн хөрвүүлэлт хийлээ гэхэд эцсийн шийдвэрийг банк гаргадаг. 2020 онд Сангийн яам болон Монголбанкнаас олон шийдвэр гаргасан учир шинээр муу зээл нэмэгдээгүй. Тэгэхээр банкууд 2019 оны зээлдэгчдийн мэдээллийг ярьж байна гэсэн үг. Энэ мэдээллийг хуулиараа зургаан жил хадгалдаг. Энэ хугацааг багасгах тусам банкуудын үйл ажиллагаа тогтворгүй болно. Олон улсын жишгээр зургаан жил гэдэг харин ч бага тоо. Иймд хугацааг багасгах боломжгүй” гэлээ.