Монгол банкны Мөнгөний бодлогын хороо өнөөдөр ээлжит бусаар хуралдан, бодлогын хүүг өсгөж, есөн хувь болгосон билээ. Мөнгөний бодлогын хүү өссөнөөр монголын эдийн засагт хэрхэн нөлөөлөх талаар эдийн засагч Ж.Дэлгэрсайханаас тодрууллаа.

    Тэрбээр “Валютын үнэ, имфляци нэмэгдсэн эдийн засаг тааруу байгаа энэ үед төгрөгийн ханш улам сурлах хандлагатай байгаа.  Тиймээс төгрөгийн ханш, үнэ цэнийг нь бодлогын суурь хүүгээр дамжуулж өсгөж, хамгаалж байгаа юм. Хоёрдугаарт, мөнгөний нийлүүлэлтийг бууруулснаар төгрөгийн үнийн өсөлтийг бууруулах оролдлого хийж байна гэсэн үг. Харин сөрөг тал нь банк, санхүүгийн захаар дамжиж мөнгөний үнэ өснө. Тийм учраас бодлогын хүү өссөнөөр  банк, санхүүгийн захаар дамжиж буй мөнгөний хүү өсөх магадлалтай. Тиймээс мөнгөний захаар дамжиж эдийн засгийг дэмжиж байгаа нь суларна гэсэн үг. Монголд олон сувгаар мөнгөний нийлүүлэлт явагддаг боловч банк, санхүүгийн байгууллагаар дамжиж зээл хэлбэрээр очиж буй мөнгө харьцангуй эрүүл байдаг. Түүний хэмжээ хумигдана гэсэн үг. Тиймээс Засгийн газар эдийн засгаа идэвхжүүлэх арга хэмжээ, хилийн боомтын нэвтрүүлэх чадварыг нэмэгдүүлэх алхам хийх, экспортын гарц нэмэгдүүлэх шаардлагатай. Ер нь мөнгөний бодлогын хүү өснө гэдэг сайн зүйл биш. Эдийн засаг хямарсан, нөхцөл байдал хүндэрсний дохио шүү дээ” гэв.