• Өнөөдөр 2024-03-29

Хөгжлийн банканд 841 тэрбум төгрөгийн өртэй 26 компани зээлээ төлнө, төлөхгүй

2022-01-21,   457

     Хөгжлийн банкнаас зээл аваад төлөөгүй байгаа чанаргүй зээлдэгчийг тус банкныхан өчигдөр олон нийтэд ил болгосон. Хөгжлийн банкнаас олгосон зээлийн 55.3 хувь нь “чанаргүй зээл” гэх ангилалд орсон байна. Тиймээс 2014-2019 онд зээл аваад гүйцэд төлөөгүй 26 компанийг Хөгжлийн банк шүүхэд өгч, нийт 841 тэрбум төгрөгийн нэхэмжлэл гаргажээ. Тиймээс зээлтэй компаниудын мэргэжилтнүүдтэй холбогдож, зээлээ төлөх эсэх талаар тодруулсан юм.

Хөгжлийн банкны чанаргүй зээлдэгчдийг “Кью Эс Си” компани тэргүүлж байна

      Хөгжлийн банкнаас ихээхэн хэмжээний мөнгө зээлээд олон жил болж байгаа “Эрэл”, “Монгол Драй Милк”, “Капитал”, “Хөтөл”, “Кью Эс Си” гэсэн компани чанаргүй зээлдэгчдийг тэргүүлж байна. Тэдний авсан зээлийн нийт дүн 530 тэрбум төгрөг болсон байна. Эдгээрээс “Кью Эс Си” компани 192 тэрбум төгрөг зээлсэн бөгөөд олон жилийн турш Хөгжлийн банктай шүүхийн шатанд маргаж, эцэст нь Дээд шүүхээс тус компанийг 192 тэрбум төгрөгийг зээлээ төлөх шийдвэр гаргасан байна.  Кью Эс Си” компани 33.4 км төмөр зам барихаар Хөгжлийн банкнаас 203.12 төгрөгийн зээл авч байжээ.

“Монгол драй милк” ХХК: Зээлээ төлж байгаа, хугацаа нь дуусах болоогүй

      “Монгол драй милк” ХХК хөдөө орон нутагт 60 ширхэг хуурай сүүний үйлдвэр барихаар 2017 онд 42.6 тэрбум төгрөгийн зээл авч байжээ. Зээлээ төлж чадахгүй хугацаа 40 сар хэтэрснээр 50.4 тэрбум төгрөгийн хуримтлал үүссэн байна. Хөгжлийн банкнаас тус компанийг 2019 онд Сүхбаатар дүүргийн иргэний хэргийн анхан шатны шүүхэд өгч, одоогоор анхан шатны шүүхэд хүлээгдэж байгаа аж. Тиймээс тус компанийн мэргэжилтэнтэй холбогдож, зээлээ төлж чадахгүй байгаа шалтгааныг тодруулахад “Манайх зээлээ төлж байгаа. Хугацаа нь дуусах болоогүй” гэсэн юм.

“Эрэл” ХХК: Манай үйл ажиллагаа 2019 онд зогссон. Зээлийн талаар мэдэхгүй

      “Эрэл” ХХК угсармал орон сууц барихаар Хөгжлийн банкнаас 2013 онд 65.5, 2014 онд 39.4 тэрбум төгрөгийн зээл авсан байна. Тус компанийн хоёр удаагийн зээл 55-91 сараар хүлээгдэж, Хан-Уул дүүргийн иргэний хэргийн анхан шатны шүүхэд шилжсэн байна. Одоогоор тус компани Хөгжлийн банканд 154.44 тэрбум төгрөгийн өртэй байгаа аж. Тиймээс тус компанийн мэргэжилтэнтэй холбогдож, зээлээ хэзээ төлөх талаар тодруулсан юм. Гэтэл “Манай компанийн барилгын үйл ажиллагаа 2019 оны өвөл зогссон. Зээлийн талаар дэлгэрэнгүй мэдээлэл өгч болохгүй” гэсэн юм.

“Төрийн орон сууцны корпораци” ТӨХХК: Зээлийн талаар мэдээлэл өгөхгүй

     “Төрийн орон сууцны корпораци” ТӨХХК “Шинэ яармаг” орон сууцны хороолол барихаар 2015 онд Хөгжлийн банкнаас 142.44 тэрбум төгрөг зээлсэн байна. Тус компанийн зээлийн хугацаа 56 сараар хэтэрч, 2020 онд Улсын дээд шүүхэд шилжсэн байна. Зээлээ хэзээ төлөх талаар тус компанийн мэргэжилтэнтэй холбогдоход” Манайх зээлийн мэдээллээ өгөхгүй. Шаардлагатай бол албан бичгээр хандах хэрэгтэй. Компанийн үйл ажиллагаа хэвийн үргэлжилж байгаа” гэсэн юм.

“Бэрэн групп” ХХК: Зээлээ төлж байгаа

     Тус компани нь Сүхбаатар дүүргийн долдугаар хорооны 720 болон 120 айлын “Ё” блок орон сууцны хороолол барихаар 2017 онд 33.2 тэрбум төгрөгийн зээл авчээ. Тус компанийн зээл төлөх хугацаа 39 сараар хэтэрч, Хан-Уул дүүргийн анхан шатны шүүхэд шилжсэн байна. Энэ талаар тус компанийн мэргэжилтэнтэй холбогдоход “Манайх зээлээ төлж, үйл ажиллагаа хэвийн үргэлжилж байгаа. Зээлийн талаарх мэдээллийг дэлгэрэнгүй өгч болохгүй гэсэн юм. 

 

 


Хөгжлийн банканд 841 тэрбум төгрөгийн өртэй 26 компани зээлээ төлнө, төлөхгүй
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188