Өмнөд Африкт анх илэрсэн коронавирусийн шинэ төрлийн хувилбар B.1.1.529 буюу Омикрон дэгдэж, олон улсад тархсантай холбоотойгоор дэлхийн эдийн засагт өөрчлөлт гарсан. Үүний нэгэн тод жишээ нь газрын тос.

          Шинэ төрлийн Омикрон хувилбар дэгдсэнтэй холбоотойгоор зарим улс Өмнөд Африкаас ирэх, тус улс руу явах нислэгтээ хориг тавьж байх үеэр газрын тосны үнэ 10 хувиар унасан. Цар тахлын үеийн эдийн засаг эргэн хэвийн хэмжээндээ шилжих үеэр Омикрон хувилбар дэгдсэн нь “дарин дээр давс” гэгчээр эдийн засгийн хөөрөгдөл үүсгэж байгаа талаар зарим олон улсын шинжээч байр сууриа илэрхийлж байлаа.

-Омикрон хувилбар дэгдсэний дараа 10 хувиар унасан газрын тос хэвийн хэмжээндээ хүрэх гэж байна-

          Омикрон хувилбар дэгдсэнийг дэлхий дахинд зарласан шөнө буюу өнгөрсөн долоо хоногийн баасан гарагт АНУ-д газрын тосны фьючерс үнэ 11 хувиар унаж, нэг баррель нь 70 ам.доллар болсон. Мөн тухайн үед дэлхийн газрын тосны жишиг Брент төрлийн газрын тосны үнэ мөн адил буурч, нэг баррель 73 ам.доллар руу унасан юм.

          Газрын тосны үнэ Dow индекст 1000 гаруй нэгж буюу 2.8 хувиар, S&P 500 болон Nasdaq индекст хоёр хувиар буурсан үзүүлэлт гарсан байна. Харин Азийн зах зээлийг тэргүүлэгч Хонконгийн Hang Seng индекст 2.7 хувиар, Японы Nikkei индекст 2.5 хувиар, FTSE100, Францын CAC40 болон Германы DAX зэрэг индекст 3-4 хувиар унасан аж.

          Тэгвэл хэдхэн цагийн дотор үнэ нь 10 хувиар унасан газрын тос олон улсын зах зээлд эргэн хэвийн хэмжээндээ шилжихээр бага зэрэг өссөн үзүүлэлттэй үнэ нь дээшилж байгаа юм.

-Хөрөнгийн зах зээл унаж, валютын ханш сулрав-

          Их Британийн FTSE 100 хувьцааны индекс, Германы DAX, Францын САС 40 индекс мөн л Омикрон хувилбар дэгдэж, олон улсад түгшүүр зарласантай холбоотойгоор тус 1.5 орчим хувиар буурсан.

          Европын Stoxx 600 индекс 1.5 хувиар буурч, сүүлийн долоо хоногийн хамгийн доод хэмжээндээ хүрчээ. Харин Японы Nikkei индекс 1.6 хувиар буурахад түүхий нефтийн үнэ гурав орчим хувиар унаж, Австрали долларын ханш сүүлийн нэг жилийн доод түвшиндээ очсон байна.

          Энэ талаар Австралийн Хамтын нөхөрлөлийн банкны валютын стратегич Жо Капурсо “Зах зээл иргэдийн хүлээж байсан шиг л хариу үйлдэл үзүүллээ” гэж тайлбарлажээ.

          “Ковид-19” цар тахлын шинэ төрлийн Омикрон хувилбар дэгдэж эхэлснээс хойш, энэ даваа гарагт хөрөнгийн зах зээл бага зэрэг өссөн ч, өнгөрсөн долоо хоногийн түвшнээсээ харьцангуй муу байгаа юм.

-Алтны үнэ буурч байна-

          Коронавирусийн шинэ төрлийн хувилбар дэгдэж эхэлтэй холбоотойгоор АНУ-ын Холбооны нөөцийн банкны тэргүүн Жерон Пауэлл “Бондын худалдан авалтаа тооцоолсон хугацаанаасаа эрт зогсоох ёстой” талаар мэдэгдэл хийсэн байдаг.

          Үүний дараагаар АНУ-ын Засгийн газрын бондын өгөөж өсөж, ам.долларын ханш гарсан аж. Нью-Йоркийн биржид алтны спот үнэ 0.1 хувиар буурч, унц нь 1774 ам.долларт хэлбэлзэж байгаа бол Bloomberg Dollar Spot Index-т 0.3 хувиар буурсан байна

          Харин бондын худалдан авалтаа тооцоолсон хугацаанаас эрт зогсоох эсэхийг Холбооны нөөцийн банкны Нээлттэй зах зээлийн хорооны хурлаар эцэслэн шийдэх юм.