-ДЭЛХИЙН АЛДАРТНУУД БА МОНГОЛ УЛСЫН ТӨСӨВ-

          Дэлхийн өнцөг булан бүрт олон төрлийн хүн өөр өөр ажил, мэргэжлээр ажиллаж, тус бүр өөр өөрийн гэсэн цалин, орлоготой байдаг. Харин тэдний зарим нь итгэмээргүй их орлого олж, алдартай спортын тамирчид талбай дээр нэг секунд байсныхаа төлөө олон улс дахь өдрийн дундаж цалинг хэд дахин нугалж авдаг. Тэгвэл Эргэлт.мн мэдээллийн сайт дэлхийн алдартнуудын орлогыг Монгол Улсын 2022 онд төлөвлөсөн 16 их наядын орлого, 18 их наядын зарлагатай харьцуулж хүргэе.

/Бүх валютыг Монгол банкны аравдугаар сарын 31-ний ам.долларын ханшаар бодов/

-Кристиано Роналдугийн жилийн орлого Барилга, хот байгуулалтын сайдын 2022 оны төсвөөс 9.7 тэрбум төгрөгөөр илүү-

          Дэлхий дахинд хамгийн олон хөгжөөн дэмжигчтэй алдартай спорт бол хөл бөмбөг. Тэгвэл АНУ-ын “Business Insider” бизнес, эдийн засгийн сайтын мэдээлснээр 2021-2022 оны улиралд хамгийн их орлого олох тоглоор Португалийн шигшээ баг, “Манчестер Юнатед” клубын тамирчин Кристиано Роналдуг нэрлэсэн. Өдгөө 36 настай нэрт хөл бөмбөгч Кристиано Роналду 2021-2022 оны улирал зөвхөн гэрээнээсээ 70 сая ам.долларын ашиг олох бол, өөрийн брэнд, зар сурталчилгаанд дүр бүтээсэн орлого нь 55 сая гаруй ам.доллар байх юм. Улмаар нэрт хөл бөмбөгчийн 2021-2022 оны улирлын орлого нийт 125 сая ам.доллар буюу монгол мөнгөөр 356,106,250,000 төгрөг байна.

          Монгол Улсын 2022 оны төсөвт Барилга, хот байгуулалтын сайд 346.35 тэрбум төгрөг төлөвлөсөн. Үүнээс харж үзэхэд дэлхийн хамгийн алдартай, 2021-2022 оны улиралд хамгийн их орлого олж байгаа хөл бөмбөгчийн жилийн орлого Барилга, хот байгуулалтын сайдын 2022 оны багц төсвөөс 9.7 тэрбум төгрөгөөр илүү байна.

-“BTS” хамтлагийн сарын орлогоор 240 ортой найман цэцэрлэг эсвэл 960 суудалтай таван сургууль байгуулах боломжтой-

          Орчин үед хамгийн алдартай байгаа хамтлагуудын нэгт БНСУ-ын “BTS” буюу “Bangtan Boys” хамтлаг зүй ёсоор ордог. 2017 онд 133  сая ам.доллароор үнэлэгдэж байсан “BTS” хамтлаг энэ жил 128 сая ам.доллароор үнэлэгдэж байгаа. Хамтлагийн энэ жилийн нийт орлого нь 36 сая ам.доллар бөгөөд сарын орлого нь гурван сая ам.доллар буюу монгол мөнгөөр 8.5 тэрбум төгрөг.

          Боловсрол, шинжлэх ухааны сайдын 2022 онд төсөвт Баянзүрх дүүргийн II хороонд 240 ортой цэцэрлэгийн барилгыг нэг тэрбум төгрөгөөр, Сүхбаатар дүүргийн XIII хороонд 960 суудалтай сургуулийн барилгыг 1.4 тэрбум төгрөгөөр барихаар төлөвлөжээ. Үүнтэй “BTS” хамтлагийн сарын орлогыг харьцуулбал, тус хамтлагийн сарын 8.5 тэрбум төгрөгтэй тэнцэх орлогоор 240 ортой найман цэцэрлэг аль эсвэл 960 суудалтай таван сургууль байгуулах боломжтой юм байна.

-Стриймэр “Critical Role”-ийн 2021 оны орлого Уул уурхай, хүнд үйлдвэрийн сайдын 2022 оны төсвөөс 10 дахин их-

          “Critical Role” телевизийн цувралд гол дүр бүтээсэн долоон жүжигчин нийлж, “Critical Role” нэртэйгээр стрийм хийж эхэлснээс хойш “Twitch” платформын хамгийн алдартай стриймэрүүдийн нэг болсон. Тэгвэл “Critical Role” стрийм энэ жилд нийт 9,626,712 ам.долларын орлого олоод байгаа юм. Харин Монгол Улсын 2022 оны төсөвт Уул уурхай, хүнд үйлдвэрийн сайдын багц 2.5 тэрбум төгрөг байна. “Critical Role” стрийм энэ жилийн орлогын монгол төгрөгт хувааж үзвэл 27.4 тэрбум төгрөг буюу Уул уурхай, хүнд үйлдвэрийн сайдын 2022 оны төсвөөс 10 дахин их байгаа юм.

-“Squid Game” кино цацагдсан цагаас хойш олсон орлогоор нь Монгол Улсад 2300 гаруй эмнэлэг байгуулах боломжтой-

          “Netflix” продакшнаас гаргасан Солонгосын “Squid Game” триллер цуврал өнгөрсөн хоёр сарын хамгийн алдартай цуврал болсон. Тэгвэл өнгөрсөн аравдугаар сарын 17-нд “Netflix”-ээс “Squid Game” кино анх цацагдсан цагаасаа хойш 891.1 сая ам.доллар буюу 2.5 гаруй их наяд төгрөгтэй тэнцэх орлого олсноо мэдэгдсэн.

          Тэгвэл дээр дурдсан “Squid Game” киноны орлогоор Эрүүл мэндийн сайдын 2022 онд Баянзүрх дүүрэгт барихаар төсөвлөсөн 1.07 тэрбум төгрөгийн нийгмийн эрүүл мэндийн төв 2300 гаруйг байгуулах боломжтой аж.

-Дэлхийн хамгийн баян хүн Элон Маск Монгол Улсын 49 жилийн төсөвтэй тэнцэх хөрөнгөтэй-

          Өчигдөр буюу арваннэгдүгээр сарын 1-ний байдлаар дэлхийн хөрөнгөтнүүдийн жагсаалтыг тэргүүлж буй Элон Маск 311 тэрбум ам.доллар буюу монгол мөнгөөр 885.9 их наяд төгрөгийн хөрөнгөтэй. Түүний нийт хөрөнгийн тоог 2022 оны Монгол Улсын 18 их наяд зарлагын төсөвтэй харьцуулж үзвэл, дэлхийн хамгийн баян хүн Элон Маск Монгол Улсын 49 жилийн төсөвтэй тэнцэх хөрөнгөтэй юм.

          Элон Маск “Forbes” сэтгүүлээс гаргадаг дэлхийн хамгийн баян хүмүүсийн жагсаалтыг тэргүүлж, Жефф Безосыг гүйцэхдээ нэг өдрийн дотор 36 тэрбум ам.долларын ашиг олсон байдаг. Нэг өдөрт олсон Элон Маск 36 тэрбум ам.долларын орлогыг монгол мөнгө болговол 102.5 их наяд төгрөг болох бөгөөд үүнийг 2022 оны төсөвтэй харьцуулж үзвэл Монгол Улсын таван жилийн төсвийг нэг өдөрт олсон болж таарч байна.

          “Business Insider” эдийн засгийн сайтын мэдээлснээр дэлхийн хамгийн баян хүн Элон Маск 2020 оны дөрөвдүгээр сараас 2021 оны дөрөвдүгээр сар хүртэл нэг өдөрт дунджаар 383 сая ам.доллар буюу нэг их наяд гаруй төгрөгийн орлого олдог аж. Дээр дурдсан хугацаанд гарсан түүний сарын орлого нь монгол мөнгөөр 32.7 их наяд төгрөг бөгөөд энэ нь Монгол Улсын 2022 оны төсвөөс 10 гаруй их наядаар илүү байгаа юм.