Монголын төрийн алба тэтгэвэрийн хүнээр төрийн тусгай чиг үүргийн байгууллага удирдуулах хүртлээ хүний нөөц, чадварлаг боловсон хүчин, удирдлагын дутагдалд орсон уу. Тодруулбал, Нийслэлийн цагдаагийн газраас тэтгэвэртээ суусан гэх хурандаа Д.Ядамдорж өдгөө Шүүхийн шинжилгээний үндэсний хүрээлэнгийн захирлаар ажиллаж байна.
Хурандаа Д.Ядамдорж 1964 онд төрсөн. Өдгөө 57 настай. 1987 оноос Өвөрхангай аймгийн Цагдаагийн хэлтэст төлөөлөгч, 1996 оноос Булган аймгийн Цагдаагийн хэлтэст дэд дарга, 1998 оноос Сэлэнгэ аймгийн Мандал сум дахь Цагдаагийн хэлтсийн дарга, 2000 оноос Дорнод аймгийн Цагдаагийн газрын дарга, 2006 онд Нийгмийн хэв журам хамгаалах газрын дарга, 2006 оноос Замын цагдаагийн газрын дарга, 2008 оноос Баянзүрх дүүргийн Цагдаагийн хэлтсийн дарга, 2012 оноос Шүүхийн шийдвэр гүйцэтгэх ерөнхий газрын дарга, даргын зөвлөх, 2014 оноос Хууль сахиулахын их сургуулийн Албаны зохион байгуулалт, санхүү, хангамж эрхэлсэн дэд захирал, 2017 оноос Цагдаагийн ерөнхий газрын дэд дарга бөгөөд Нийслэлийн цагдаагийн газрын даргаар ажиллаж байсан. Улмаар 2020 оны есдүгээр сараас Шүүхийн шинжилгээний үндэсний хүрээлэнгийн захирлаар ажиллаж эхэлсэн. Товчхондоо цагдаагийн байгууллагад 34 жил байж болох бүхий л өндөр албан тушаалд суусан нэгэн. Гэтэл цэрэг, цагдаагийн алба хаагчид 25 жил ажиллаад тэтгэвэр тогтоолгодог хуультай гэхээр тэрбээр есөн жил илүү ажиллаж, түүгээр ч зогсохгүй тусгай мэдлэг, ур чадвар шаарддаг Шүүхийн шинжилгээний үндэсний хүрээлэнгийн захирлаар ажиллаж байгаа юм.
Түүнчлэн, түүнийг хэдхэн хоногийн өмнө Монгол Улсын Ерөнхийлөгчийн зарлигаар “Сүхбаатар” одонгоор шагнахдаа “Цагдаагийн ахмад ажилтан” гэж тодорхойлсон. Өөрөөр хэлбэл, Цагдаагийн байгууллагаас тэтгэвэртээ гарсан гэдгийг нь хэлээд өгч байгаа юм. Гэтэл тэрбээр Шүүх шинжилгээний үндэсний хүрээлэнгийн захирал буюу Төрийн тусгай албан хаагчаар ажиллаж буй нь Төрийн албаны тухай хуулинд харшилж байна. Тухайлбал, төрийн албаны тухай хуулинд төрийн тусгай албан хаагчийн насны дээд хязгаар нь 65 гэж заасан байдаг боловч тэтгэврийн насанд хүрмэгцээ өөрөө хүсэлт гаргасны үндсэн дээр 65 нас хүртлээ ажиллах боломжтой байдаг. Хэрвээ хүсэлт гаргаагүй бол тэтгэврийн насанд хүрээд төрийн албанаас бүр мөсөн чөлөөлөгдөнө гэсэн үг.
Гэтэл хурандаа Д.Ядамдоржийн хувьд Нийслэлийн цагдаагийн газрын удирдлагаар ажиллаж байх үедээ тэтгэвэрээ тогтоолгосон буюу төрийн тусгай албан хаагчийн насны дээд хязгаар хүртэл ажиллах эрхгүй болж таарч байна.
Нөгөөтээгүүр, шүүхийн шинжилгээний хүрээлэн нь эрүү, иргэн, захиргааны болон бусад хэрэг, маргааныг шалган шийдвэрлэх явцад нотлох баримт илрүүлэх, бэхжүүлэх, ул мөр эд мөрийн баримтад үзлэг, шинжилгээг хэрэг бүртгэгч, прокурор, мөрдөгч, шүүхийн тогтоол,шүүгчийн захирамж, төрийн эрх бүхий байгууллагын хүсэлтийг үндэслэн хийж, дүгнэлт гаргах үндсэн чиг үүргийг гүйцэтгэдэг байгууллага. Гэтэл энэ чухал үүрэгтэй байгууллагыг шинжилгээ, кримналистикаас хол, шүүхийн шинжилгээний тухай ойлголт, мэдлэг, туршлагагүй, насаараа цагдаагийн байгууллагад дарга хийсэн хүнээр удирдуулах нь зүйд нийцэхгүй юм.
Ингээд харвал, Хууль зүй, дотоод хэргийн сайд Х.Нямбаатар ямар зШүүхийн шинжилгээний үндэсний хүрээлэнгийн захирлаар Д.Ядамдоржийг томилохдоо төрийн албаны хууль тогтоомжуудыг зөрчсөн байж болзошгүй байна. Уг нь цогцосны задлан, хэргийн газрын үзлэг, шинжилгээгээр мэргэшсэн, тусгай чиг үүргээ ухамсарладаг, ажлын туршлагатай, байгууллага удирдах чадвартай хүнээр Шүүхийн шинжилгээний үндэсний хүрээлэнг удирдуулсан бол чиг үүрэгт нь ч, ажлын зохион байгуулалт, гүйцэтгэл, нэр хүндэд нь ч хал палгүй байх байлаа.
Ер нь дан ганц хурандаа Д.Ядамдорж ч бус төрийн албанд “тэтгэвэртээ суусан” хүмүүсийг өндөр албан тушаалд улираан, дэвшүүлэх томилдог, даргын суудлаар бусдыг “шагнадаг” гажуудсан жишиг тогтчихсон байна. Ялангуяа хууль зүйн салбарт залуу, ур чадвартай, мэргэжлийн боловсрон хүчнүүд дээшлэх, дэвших боломжийг нь “тэтгэвэрийн” дарга нар нь хааж, боосоор байгааг Х.Нямбаатар сайд анхааралдаа авах цаг болжээ.
Цагдаагийн байгууллагад 34 жил “дарга” хийсэн хурандаа Д.Ядамдорж ШШҮХ-г толгойлох нь зүйд нийцэх үү |
|