УИХ-ын гишүүн С.Одонтуяагийн суулт цагаа олсонгүй. Тэр суулт хийж, тэмцэх байсан бол аль эрт эхлүүлэх ёстой байсан юм. Солонгосоос ирэх хүсэлтэй олон хүн оны өмнөөс суулт, өлсгөлөн зарлаж байхад С.Одонтуяа гишүүн юу хийж байсан юм бэ.

Чуулганы хуралдаан дээр энэ талаар цухас яриад өнгөрснөөс өөрөөр  ажил хэрэг болгож чадаагүй. Хэрвээ тухайн үед энэ акциа дорвитойхон хийсэн бол түүнд оноо авах том боломж байв. Магад албан тушаалтнуудад “нөлөөлж” арай эрт онгоц нисгээд иргэдээ авчихсан бол зарим нэг нь амьд ч байх байсан юм бил үү. Гэтэл Улсын Онцгой комисс Солонгос улсаас иргэдээ татаж авахаар хоёр удаагийн нислэг төлөвлөсний дараа “Бид эх орондоо ирмээр байна” суулт зарлаж байгаа нь түүнийг “Гадаадад гацсан монголчууд”-аар “шоу хийж байна” хэмээн хардахад хүргэж байгаа юм.

“Өнгөрсөн нэг жилийн хугацаанд УОК-ын ажлыг хөндлөнгөөс харж байсан” тухайгаа тэрбээр хэлж байна лээ. Тэднийг харсаар суутал гадаадад гацсан олон хүн нас барж, зарим нь орох оронгүй, хоол ундгүй, мөнгөгүй болсон хүн ч бий. Хэдэн сарын өмнөөс Монгол руу буцах нислэгийн тасалбараа захиалчихаад байж байтал нэг л өдөр манай улс шийдвэр гаргаад хилээ хаачихсан. Бүх төлөвлөсөн нислэг цуцлагдаж, тэнд байгаа хүмүүсийг хэцүү байдалд оруулсан нь нууц биш. Ямар ч улс хилээ хаасан өөрийнхөө иргэдэд нээлттэй байна. Гэвч манай улс өнгөрсөн намраас хойш гадаадад гацсан монголчуудаа эх орон руу нь оруулсангүй.

Гэтэл УИХ-ын гишүүн С.Одонтуяа, тэр дундаа Ардчисан намын бүлгийнхэн сөрөг хүчний үүргээ гүйцэтгээд тухайн үед энэ асуудлаар дорвитойхон арга хэмжээ авах нь битгий хэл ганц үг ганхийгээгүй. Тэгсэн хэрнээ хэзээ хойно энэ асуудлыг сөхөж аваад ганцаараа суулт хийж байгаа нь ямар ч үр дүнгүй “шоу” болж харагдаж байгаа юм.

Уг нь С.Одонтуяа гишүүн хоёр ч удаа УИХ-д сонгогдсон, Ардчилсан намдаа нэр нөлөө бүхий улстөрч. Энэ удаагийн парламентад УИХ-ын дэд даргаар ажиллаж байгаа.  Албан тушаал, нэр хүндээ бодвол Ардчилсан намын бүлгийн гишүүдээ аль эрт уриалаад гадаадад гацсан монголчуудаа эх оронд нь ирүүлэхээр тэмцэж болохоор л байсан. Тэгвэл арай нэр хүндтэй, үр дүнтэй болох байлаа. Гэтэл олны дундаас онцгойрон сугарч, Ордонд суулт нэртэй попрол хийж байгаа нь энэ асуудлаар далимдуулж нэр хүнд олох гэсэн башир арга байхыг үгүйсгэхгүй.

Түүний суулт хэд хоногоор үргэлжлэх, ямар шаардлага тавьж байгаа нь тодорхой бус. Уг суултаа УИХ-ын гишүүдээр дэмжүүлж гарын үсэг зуруулаад байгаа бололтой. Мөн Үндэсний Аюулгүй байдлын зөвлөлд хандан шаардлага хүргүүлсэн аж. Харин УОК-оос “Дотооддоо халдвар алдсан учраас гаднаас ирсэн монголчуудыг тусгаарлах байр сав байхгүй” гэх шалтгаанаар иргэдээ татаж авахгүй байсан.

Гэтэл УИХ-ын нэр бүхий гишүүн иргэдийнхээ урдуур дараалал дайрч, каргоны онгоцоор Монголдоо ирсэн гэх асуудлаас болж, УОК-ынхон олон нийтийн шүүмжлэлд өртөөд байгаа. Тэд бантсандаа Солонгост гацсан иргэдээ авахаар онгоц явуулсан. Энэ бол Их хурлын гишүүдийн тэмцээд хийж байгаа ажил ч биш, УОК-ынхоны иргэдээ бодоод гаргасан шийдвэр ч биш. Иргэд, олон нийтийн эх орондоо ирэх гэсэн, үр хүүхэд, ижий, аав, найз нөхдөө гэртээ ирүүлэх гэсэн хүмүүсийн тэмцэл байсан. Гэтэл зарим улстөрч “хуруу нэмэхгүй байж, хошуу нэмэрлэж” суулт нэртэй “жүжиг” тавихаа болих хэрэгтэй.