Г.ДОРЖЗОДОВ МАН-ААС 60 ТЭРБУМЫН СХЕМЭЭР ХЭНИЙГ "СУГАЛАХАА" АЛЬ ХЭДИЙНЭ ТООЦООЛЧИХСОН БИЗ ЭЭ

         Цагтаа Монгол Улсын Ерөнхийлөгч Х.Баттулга Г.Доржзодовт 60 тэрбумын схемийг илчилснийх нь төлөө Ардын баатар цол олгоно гэж байлаа. Гэвч өдгөө Г.Доржзодов 60 тэрбумын хэргээрээ хар нүхэнд ороход ойрхон ирээд байгааг албаны эх сурвалж хэлж байна. Тодруулбал, түүнд холбогдох хэргийг Нийслэлийн прокурорын газраас тусгаарлан шалгаж эхэлснийг “Ц.Сандуй, А.Ганбаатар нарт холбогдох “Төрийн эрх мэдлийг хууль бусаар авах хуйвалдаан зохион байгуулсан, сонгуулийг зохион байгуулалттайгаар будлиантуулж төрийн эрх мэдлийг хууль бусаар авах...” хэрэгт 2002 оны Эрүүгийн хуулийн тусгай ангийн 82 дугаар зүйлийн 82.1, 821.1 дүгээр зүйлийн 821.1 дэх хэсэгт зааснаар 2021 оны нэгдүгээр дүгээр сарын 11-ний өдөр яллах дүгнэлт үйлдсэн ба Баянгол дүүргийн шүүхэд шилжүүлэх ажиллагаа хийгдэж байна. Түүнчлэн уг хэргээс Г.Доржзодовт холбогдох хэргийг тусгаарлан шалгаж байна” хэмээн мэдээллээ. 

         Өөрөөр хэлбэл, “Төрийн албыг зарж, 60 тэрбум босгох схем боловсруулсан хүн нь шийтгэл хүлээгээгүй байтал танилцуулгыг нь сонссон НИТХ-ын дарга асан Ц.Сандуй, туслах А.Ганбаатар нарт анхан шатны шүүхээс дөрвөн жилийн хорих ял оноосон нь Эрүүгийн хуулийг зөрчсөн, асуудлыг мушгин гуйвуулж, хэт нэг талыг барьж шийдвэр” гэх гомдлын дагуу Г.Доржзодовыг шалгаж байгаа билээ. Энэ талаар албаны эх сурвалж “Г.Доржзодов энэ хэргээр ял шийтгүүлэх нь тодорхой болоод байгаа гэсэн” хэмээсэн удаатай.

       Эндээс харвал өдгөөгөөс ердөө дөрөвхөн жилийн өмнө ашигтай гэж үзсэн улстөрч бүхний өмгөөлөл, хамгаалалд багтан, сонгуулийнх нь шоуны гол эзэн болж явсан Г.Доржзодов 60 тэрбумын схем зохиосон хэргээ хүлээх цаг дөхөв бололтой. 2017 онд  гаднын орнуудад цагаачлуулах, өндөр дээд хамгаалалтад байлгах, ҮАБЗ-д ажиллуулах, тэр ч битгий хэл улсын баатар цол олгоход ч багадах хүнээр тодруулж байсан бол өдгөө түүнийг гэх хүн тун цөөрснийг эх сурвалжууд ярьж буй.

      Түүнийг энгийн нэгэн редактор, МАН-ынхны булхайг дэлгэгчээс хэрхэн Улсын баатар цолтон болох дөхсөнийг эргэн сануулбал,

 2017 оны зургадугаар сарын 20 буюу Ерөнхийлөгчийн сонгуулийн үеэр Х.Баттулга Чингэлтэйн хөдөлмөрчидтэй МҮЭСТО-д уулзах үеэрээ “Монгол Улсын төрийн албыг, сайдын суудлыг тэрбум төгрөгөөр зарсан асуудал гарсан. Монголчууд доройтож, ядарч, зүдэрч болно. Гэхдээ төрийнхөө яамны сайдын суудлыг тэрбум төгрөгөөр зарах хүртэл ядраагүй гэж би бодож явдаг. Төрийн албыг зарахаар ярьж байсан нь хоёр жилийн өмнө болсон явдал. Тэд аль хэдийн сайдын суудлыг зараад, мөнгөө босгосон, сонгуульд ялсан. Өнөөдөр энэ булхайг илчилсэн залууг салаа цагдаа баривчлах гэж очиж байна. Тэр залууг хүчин, хулгай хийсэн гэж янз янзаар доромжилж байгаа...

...Хэрвээ би Ерөнхийлөгч болбол тэр хүнийг Монгол Улсын баатар цолоор шагнана. Харин энэ олон жил биднийг доромжилж, толгой дээр гараад суучихсан, хуульчилж хулгайлж байсан 20-30 гэр бүлийнхэнд надад өгнө хэмээн ярьж явсан 10-15 жилийн ялыг нь өгнө гэж бодож байгаа" хэмээж байлаа.

         Г.Доржзодов ч өөрөө “Өдрийн сонин”-д өгсөн ярилцлагадаа,

                 “...Би 2016, 2017 оны сонгуулиудын үеэр тэдний маш хүчтэй хар пиарыг тэсч гарсан шүү дээ. Өнгөрсөн 2017 оны сонгуулиар МАН пиар төсөвтөө 10 хоногийн турш зөвхөн намайг орон даяар гутаахад зориулж, 600 гаруй сая төгрөг төсөвлөж, цацаж байсан гэж байна лээ. Төрөл бүрийн шторк, нийтлэл, теле жүжиг, сурвалжилга, ярилцлага, фото эвлүүлэг гээд утгаа алдсан. Үүнтэй зэрэгцээд тагнуул, хуулийн байгууллагыг үүр шөнийн заагаар дайчлан баривчлах бүслэлтийг хүртэл зохион байгуулж байсан шүү дээ. Юуных нь хамгаалалт. Шал худлаа л байхгүй юу. Ц.Сандуй энэ тухай ам алдана лээ”...,

               “Хэвлэл, сошиал, интернэтээр намайг маш их дайрч, гутаан, гүтгэж байна. Тэд тэгэхээс өөр юу ч хийх билээ. Нэг удаа би тэсээд гарч болсон юм дахиад нэг тогтоод үлдэх ч байлгүй. Надад хийсэн хэрэг байх биш. Хэнээс юунаас айж явах ёстой гэж. Нууц уулзалтаар Монгол Улсын Үндсэн хуулийг зөрчсөн маш ноцтой гэмт үйлдлийг зориг зүрхтэй ямар ч иргэн дэлгэх нь мэдээж шүү дээ. Жингийн нэг туухай нь илчлэгч иргэн гав ганцаараа, нөгөө туухай нь улс төрийн махны машин байгаа тохиолдолд туйлын болгоомж хэрэгтэй” гэж байсан билээ.

            Ийн бардам байсан түүнийг Монголын хууль, хяналтын байгууллагаас шалгаад жил гаруйн хугацаа өнгөрч, хэрэгсэхгүй болгох нь битгий хэл бүр тусгаарлан шалгаж эхэллээ. Энэ нь түүнийг “Өөрийнхөө ухсан нүхэнд унах” дөхөж буйг илтгэх дохио гэлтэй.

Гэхдээ тэр ийм тохиолдолд эл хэргээр ял сонсоод байгаа А.Ганбаатарын “Г.Доржзодов намын санхүүгийн схем, стратеги төлөвлөгөөг өөрөө хийсэн. Бидэнд түүнийгээ санал болгосон. Гэвч одоо тийм хэмжээний мэдлэггүй гэж ярьж байгаа юм. Мөн цацагдсан  бичлэгт Г.Доржзодов өөрөө байсан. Гэвч бичлэгээ эвлүүлэг хийж, зарим хүнийг байхгүй болгож, харин байхгүй хүнийг нэмж оруулсан байгаа юм. Энэ уулзалт “Шинэ Монгол хаад” группийн дөрвөн давхарт болсон. Уулзалтад МАН-ын дарга М.Энхболд байгаагүй. Тэр уулзалтад Нийслэлийн намын хорооны дарга Ц.Сандуй, Шадар сайд У.Хүрэлсүх, Л.Оюун-Эрдэнэ, Г.Доржзодов, Ганбаатар гэсэн хүмүүс байсан” гэх мэдэгдлийг баримт болгон, МАН-ын нөлөө бүхий улстөрчдийг хөлдөө чирэхээр зэхэж буй нь тодорхой.

             Ямартай ч улсын баатар болно гэж битүүхэн догдолж асан Г.Доржзодов “ухсан нүхэндээ” унах цаг ойртож байгаа бололтой.

Тэр уулзалтад Нийслэлийн намын хорооны дарга Ц.Сандуй, Шадар сайд У.Хүрэлсүх, Л.Оюун-Эрдэнэ, Г.Доржзодов, Ганбаатар гэсэн хүмүүс байсан” гэх мэдэгдлийг баримт болгон, МАН-ын нөлөө бүхий улстөрчдийг хөлдөө чирэхээр зэхэж буй нь тодорхой