-ҮНДСЭН ХУУЛИЙН ӨӨРЧЛӨЛТӨӨР Х.БАТТУЛГА ЕРӨНХИЙЛӨГЧИЙН СОНГУУЛЬД ДАХИН НЭР ДЭВШИХ БОЛОМЖГҮЙ ЮУ-

       Монгол Улсын Ерөнхийлөгчийн сонгуулийн тухай хуулийг өнөөдөр УИХ-ын чуулганаар эцэслэн батална. Харин ирэх оны сонгуульд хэн хэн өрсөлдөх вэ гэдэг нь хүмүүсийн сонирхлыг ихээр татаж байна. Тухайлбал, МАН-аас Ерөнхий сайд У.Хүрэлсүх, Ардчилсан намаас одоогийн Ерөнхийлөгч Х.Баттулга нар нэр дэвших байх гэсэн хүлээлт үүсгэж буй. Тэгвэл шинэ батлагдсан хуулиар болон Үндсэн хуулийн нэмэлт өөрчлөлтөөр одоогийн Ерөнхийлөгч Х.Баттулгыг нэр дэвших боломжгүй гэх маргаан өрнөж байна. 

Өчигдрийн УИХ-ын чуулганы хуралдаан дээр УИХ-ын гишүүн Т.Доржханд “Ерөнхийлөгч Х.Баттулга дахин нэр дэвших боломжтой юу” гэдгийг тодорхой хариулж өгөөч гэж хүссэн. Үүнд, УИХ-ын гишүүн Л.Энх-Амгалан “Үндсэн хууль тайлбарлах эрхгүй” гэх шалтгаанаар асуудлаас “бултаж” байгаа харагдана лээ. Харин Сангийн сайд Ч.Хүрэлбаатар “Х.Баттулгыг Үндсэн хуулийн нэмэлт өөрчлөлтөөр дахин нэр дэвших боломжгүй” гэдгийг илэрхийлж байна. 

Тэр ч бүү хэл Ардчилсан намын нөхдүүд нь ч Ерөнхийлөгчийн сонгуульд дахин нэр дэвших боломжгүй хэмээн үзэж буй. Тухайлбал, хотын дарга асан Э.Бат-Үүл хуулийн хүрээнд Х.Баттулга нэр дэвших боломжгүй гэж үзэж байгаа юм. 

Хуучин Үндсэн хуулиар Монгол Улсын Ерөнхийлөгч хоёр удаа сонгогдож болох бөгөөд найман жил энэ албыг хаших эрхтэй байсан. Тэгвэл Үндсэн хуулийн 30 дугаар зүйлийн 2-т Монгол Улсын Ерөнхийлөгчөөр 50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг ЗУРГААН жилийн хугацаагаар ЗӨВХӨН НЭГ УДАА  сонгоно гээд өөрчлөлт оруулчихсан. Хэрвээ Х.Баттулга Ерөнхийлөгч энэ удаагийн сонгуульд дахин нэр дэвшээд ялалт байгуулбал нийтдээ АРВАН ЖИЛ төрийн тэргүүнээр ажиллах болж байгаа юм. 

Хамгийн гол нь “улирч болно” гэх үгийг хасаад ЗУРГААН жилийн хугацаагаар ЗӨВХӨН НЭГ УДАА  сонгоно гэх заалтыг 2025 оноос хэрэгжүүлэх санал явж байсан ч хэлэлцүүлгийн үед унагааж, өнгөрсөн тавдугаар сараас хүчин төгөлдөр хэрэгжиж эхэлсэн билээ. Хэрвээ Х.Баттулга Ерөнхийлөгч дахин нэр дэвших сонирхолгүй бол Үндсэн хуулийн хэрэгжилт хуулийн хүрээнд явагдана. Харин нэр дэвшинэ гээд “зүтгэвэл” асуудал үүсэж мэдэхээр болоод байгаа аж. Тэгвэл уг асуудал Үндсэн хуулийн цэц дээр очих магадлалтай байна.

-АН-ЫН ХУВИЛБАР Ц.ОЮУНГЭРЭЛ, Р.АМАРЖАРГАЛ-

       Ерөнхийлөгч Х.Баттулга биш бол Ардчилсан намаас хэн Ерөнхийлөгчийн сонгуульд нэр дэвших вэ гэдэг нь сонирхол татаж байна. Сүүлийн үед УИХ-ын гишүүн асан Ц.Оюунгэрэлийн нэр яригдах болжээ. Соёл, спорт, аялал жуулчлалын сайдаар ажиллаж байсан түүний хувьд Ардчилсан намд байж болох хувилбар. Учир нь, Ардчилсан намын топ гэгдэх зарим лидер “аавын хаалга” татаж, зарим нь намаасаа “хөөгдсөн”. Харин зарим нь өөр нам байгуулж, зарим нь ял шийтгэлээ хүлээж суугаа. Тэгэхээр Х.Баттулга биш бол Ц.Оюунгэрэл байж болох гэсэн хувилбар яригдаж байгаа аж. 

      Мөн АН-ын Ерөнхийлөгчид нэр дэвшүүлж болох бас нэг хувилбар нь Ерөнхий сайд асан Р.Амаржаргал. УИХ-ын гишүүнээсээ чөлөөлөгдөх хүсэлтээ өгч байсан түүнийг “эр зориг”-той хэмээн олон нийт үнэлдэг. Түүний хүсэлтийг УИХ-ын гишүүд хүлээж аваагүй нь ч өөрт нь том оноо болсон байдаг. Гэтэл өөрийн хүсэлтээр байтугай “хөөгөөд” ч явдаггүй гишүүн Парламентын танхимд олон бий. Тиймээс Р.Амаржаргалыг Ерөнхийлөгчийн сонгуульд нэр дэвшүүлэх сонирхол Ардчилсан намынханд байж болох юм.