УИХ-ын ээлжит сонгууль болоод дөнгөж зургаан сар болох гэж байна. Өөрөөр хэлбэл, 76 гишүүн УИХ-д сонгогдоод 180 хоног ч болоогүй байна гэсэн үг. Гэтэл 76 гишүүний дөрөв нь АТГ-т хэдийнэ шалгагдаад эхэлжээ.

УИХ-ын гишүүн Д.Өнөрболор

АТГ-аас УИХ-ын гишүүн Д.Өнөрболорыг Дархан цаазат Богд хан уулын Зайсангийн аманд их хэмжээний газар хууль бусаар авч эзэмшин, улмаар тансаг зэрэглэлийн орон сууц барьж, асар их ашиг олсон үндэслэлээр шалгаж эхэлсэн байдаг. Тэрбээр Зайсанд хууль бусаар газар авсан, зөвшөөрөлгүй барилга барьсан, өндөр үнээр зарсан гэх асуудлаараа шалгагдаж, УИХ-ын гишүүнээсээ чөлөөлөгдөж болзошгүй нөхцөл байдал үүсээд байгаа. Өнгөрсөн сонгуулиар Сэлэнгэ аймгаас сонгогдож, УИХ-ын гишүүн болсон Д.Өнөрболор нь “Сөүл” группын эзэн. Өмнө нь 2016 онд Барилга, хот байгуулалтын сайд болохоор яригдаж байсан улс төр, бизнест нөлөө бүхий нэгэн. Тэрбээр жилдээ 853 сая төгрөгийн орлоготой, 12 орон сууцтай, 7.5 тэрбум төгрөгийн хадгаламжтай, “Сөүл” ХХК, “Роял виндөү” ХХК, “Зэндмэнэ хурх” ХХК, “Энокси” ХХК зэрэг компанийг эзэмшдэг.

УИХ-ын гишүүн А.Адъяасүрэн

УИХ-ын гишүүн А.Адъяасүрэн нь нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам.долларын авлига өгсөн хэргээр АТГ-т шалгагдаж буй. Тодруулбал, Чингэлтэй дүүргийн III хорооны нутаг дэвсгэрт байрлах “Peace tower”-ийн 804 тоот өрөөнд АТҮТ-ийн Тээвэр зохицуулалтын хэлтсийн дарга Г.Доржпаламд 100 мянган ам.долларын авлига өгсөн нь баригдаж, баримтаар нотлогдсон учраас яллагдагчаар татагдсан гэдэг. Хэргийн мөрдөн шалгах ажиллагаа дуусч, харьяаллын дагуу Нийслэлийн прокурорын газарт хэргийг шилжүүлсэн юм. Энэ талаар Нийслэлийн прокурорын газрын ерөнхий прокурорын орлогч Ц.Насанбат “УИХ-ын гишүүн А.Адъяасүрэнд холбогдох хэрэг мөрдөн байцаалтын шатанд шалгагдаж байгаа” гэсэн мэдээллийг өгсөн. Тэрбээр өнгөрсөн сонгуульд Баянхонгор аймгаас сонгогдсон юм.

УИХ-ын гишүүн Б.Бейсен

Баян-Өлгий аймгийн Нийгмийн даатгалын хэлтсийн дарга тэргүүтэй Нэгдсэн эмнэлгийн 40 гаруй эмчийг эрх мэдэл, албан тушаалаа урвуулан ашиглаж, бусдаас авлига авч, хуурамч онош тогтоосон үндэслэлээр, тус аймгийн 514 иргэнийг дээрх хэрэгт холбогдуулан шалгаж байгаа. Энэ хэргийн гол зохион байгуулагч, гол тоглогч 2020 онд УИХ-ын сонгуульд ялалт байгуулсан, Ардчилсан намаас нэр дэвшигч Б.Бейсен гэдэг. Өөрөөр хэлбэл, тэрбээр эрүүл саруул, энх тунх иргэдийг дүлий, сохорын дүрд тоглуулж, тахир дутуугийн тэтгэмжинд хамруулдаг гэнэ. Одоогийн байдлаар мөрдөн байцаах ажиллагаа үргэлжилж байгаа бөгөөд мөрдөн байцаах ажиллагаа дууссаны дараа УЕПГ-аас УИХ-д Б.Бейсений бүрэн эрхийг түдгэлзүүлж магадгүй байгаа юм.

УИХ-ын гишүүн С.Амарсайхан

УИХ-ын гишүүн С.Амарсайханыг АТГ-аас шалгаж буй. Түүнийг нийслэлийн нийтийн тээвэрт хийж байгаа парк шинэчлэл болон сургуулийн автобустай холбоотойгоор эрх мэдэл албан тушаалаа урвуулан ашиглаж, улсад онц их хэмжээний хохирол учруулсан гэх үндэслэлээр шалгаж байгаа юм. БНХАУ-аас концессийн гэрээгээ худалдан авч буй  цахилгаан автобусны  урьдчилгаа төлбөр болох 21 тэрбум төгрөгийг нийслэлийн төсөв болон Хөгжлийн банкнаас тендер зарлахгүйгээр хийхээр төлөвлөсөн. Энэ мэт гэмт хэргийн шинжтэй байж болзошгүй үйлдэл болон иргэдээс ирсэн гомдол, хүсэлтийн дагуу УИХ-ын гишүүн С.Амарсайхан АТГ шалгаж байна. Тэрбээр өнгөрсөн дөрвөн жилийн хугацаанд Нийслэлийн Засаг дарга бөгөөд Хотын захирагчаар ажиллаж байсан билээ. Харин 2020 оны ээлжит сонгуульд Налайх дүүргээс сонгогдоод байгаа.