Хүний амьдрал, уран бүтээл гэдэг “Ойн гүнд юу байгаа бол” гэх хүсэл шиг ямагт сонирхол татаж байдаг зүйл. Гэхдээ хүн бүрийн намтар, уран бүтээл тийм хүсэл төрүүлэхгүй. Өөрт таалагдаж, сонирхож, онцгой гойд мэдрэмж төрүүлж чадсан нэгний мэдэгдэхгүй юм бүхэн шинэ ертөнцийн хаалгыг өмнө минь нээж, тийм нэг үүдээр эмээнгүй мөртлөө догдлон ордог сон.  Ширээн дээр минь цоо шинээрээ “зочлоод” буй Колумбын алдарт зохиолч Габриэль Гарсиа Маркесийн намтар ном надад яг тийм хүслийг төрүүлж, нээхийн өмнө би дээрх өгүүлбэрийг бодож амжсан юм. Зарим хүн элдэв зүйл бодолгүй, ямар нэгэн мэдрэмжид уягдалгүйгээр эхний өгүүлбэрээс нь шууд автаад л уншдаг байх. Миний хувьд оршил, өмнөтгөл, “Хэний тухай унших гэж байгаа билээ” гэж бодох нь бий. Маркес гарцаагүй амьдрал болоод уран бүтээлчийнхээ хувьд бидний мэдэхийг хүсдэг зохиолч мөн билээ. Түүний  “Зуун жилийн ганцаардал” роман тэргүүтэй шилдэг бүтээлүүд нь энэ хүслийг оргилон бадрааж, өрдөж, суут зохиолч түүнийг бидэнд ойртуулж өгсөн. Хэдийнэ орчуулагдан, түгээгдээд эхэлсэн энэ ой шиг намтрын гүн рүү түүний олон уншигч энэ цаг үед алхан орж байгаа гэдэгт итгэж байна. Юуны урьд Маркесийг 17 жил судалж, түүнтэй уйгагүй ярилцаж, ийм нэгэн эгэлгүй суут зохиолчийн араас тууштай нэхэж, “Намтар”-ыг бичсэн зохиогчид, энэ лут бүтээлийг монголчуудын гар дээр тавьж буй  Н.Пүрэвдагва орчуулагчид талархснаа хэлээд номоо нээж байна. Бэсрэг энэ тэмдэглэлээрээ Маркес судлаач төдийгүй тус номын зохиолчийг, Маркесын намтрыг товчхон сийрүүлье.

            “Намтар” номын зохиогч Жеральд Мартин “Маркесын намтар судлал дээр би арван долоон жил ажиллаж байна. Эхлээд миний уулзаж, асууж ярилцсан бүх хүн “Чи наад хүнтэйгээ уулзаж чадахгүй дээ, уулздаг юм гэхэд тэр чамд туслахгүй” гэж хэлсэн. Юутай ч нэлээд хэдэн сар өнгөрсний дараа би номынхоо баатартай танилцсан юм. Миний сэдсэн хэргийг сонсоод баяр хөөр болсон гэж хэлж чадахгүй, “Миний намтраар яах  гэсэн юм бэ, үхсэн хүний л намтрыг бичдэг шүү дээ” гэсэн боловч надтай, нөхөрсөг, аятайхан, тэвчээртэй харилцсан. Маркес надад өгөөмөр, бүр түүнээс ч илүү гэмээр сэтгэлээр хандсан юм даа”  гэжээ. Түүний энэ өгөөмөөр бөгөөд хүнлэг зөөлөн араншин өөрийнх нь намтрыг судлах гэсэн нэгэнд том урам өгч, амьдралынхаа арав гаруй жилийг зөвхөн энэ л судалгаандаа зориулахад түлхжээ. Сонин юм шүү, өөрөө бид намтар, уран бүтээлтэй байтлаа нэгнийхээ амьдрал, хийж байгаа зүйлийг судлахын төлөө амьдарч байна гэдэг. Гэхдээ суут хүний, Латин Америкийн бүх цаг үеийн зохиолчдоос Өмнөд Америкт хамгийн нэр хүндтэй, хамгийн их уншигддаг түүнийг, бичиг үсэггүй, хог шороондоо дарагдсан, усан хангамжгүй жижиг хотод төрсөн колумб эрийн тухай, хагас цагийн ярилцлагаа 50 мянган доллараар өгдөг, мөн дэлхийн ямар ч сонинд хүссэнээ хэвлүүлээд хэдэн мянган ам.доллар авдаг түүний тухай судлахаас аргагүй. Суут байсных нь төлөө, богино цаг хугацаанд даацтай олон сайхан бүтээл бичиж, дэлхий нийтээрээ шагшин магтаж буй зохиолчийнх нь төлөө судлах учиртай гэмээр. Үүгээрээ Жеральд Мартин гэгч өөрөө ч азтай, сонин хувь тохиолтой нэгэн юм.

                Габриэль Гарсиа Маркесын намтар ном гурван бүлэг, тус бүр найман хэсэгтэй бөгөөд эхний хэсэгт, түүний төрсөн тухай, эх орон, өлгий нутаг Колумбийнх нь талаар найман дэд хэсэгт хуваан өгүүлжээ.  Хоёр дахь бүлэгт, “Хилийн чанадад: Европ, өмнөд Америкт”, гурав дахь нь “Нэр алдар, улс төр” гэсэн хэсэг байна. Орчуулагч Н.Пүрэвдагва “Гарсиа  Маркесын намтар бидний тогтсон төсөөллөөр тун амархан. Өмнөд Америкийн  ус, намаг болсон Эквадорын бүсийн халуун орон Колумбын балар нэгэн тосгонд төрж, өвөө, эмээ дээрээ өссөн. Боготагийн их сургуулийн хуулийн ангид элсээд III курсээс сургуулиа хаясан, орон нутгийн сонин, сэтгүүлд ажиллаж байсан зохиолч л гэхэд бараг болно. Гэтэл бичиж, туурвисан ном нь нэг удаадаа 2-5 сая хувиар хэвлэгддэг болсны учрыг энэ номоос уншаарай...”гэжээ. Үнэхээр ч ямархан амьдрал туулж гэмээнэ тэр их амжилтад хүрсэн тухай нь мэдэхийн их хүсэл энэ номыг эхлүүлж буй хэн бүхэнд бий биз ээ. Уншигч миний хувьд лав Маркесын амьдрал, уран бүтээлийн гүн рүү нэвтрэх эрх гэж энэ номыг тодотгомоор байна. Маркес энэ номыг гарах хүртэл бидэнтэй зөвхөн бүтээлээрээ л ойрхон байсан бол өнөөдөр намтар, уран бүтээл, хүнээрээ ч ойртлоо.