Ерөнхий сайд, Шадар сайд, Эрүүл мэндийн сайд болон албаныхан УОК-ын үйл ажиллагаатай танилцлаа. Энэ үеэр Шадар сайд С.Амарсайхан "Өнөөдрийн байдлаар 60 мянган иргэн халдвараар өвчилж, 51 мянга нь эдгэрсэн байна. Вакцинд хамрагдах иргэдийн тоо өндөр байна. Хоёрдугаар тун 78 хувьтай байгаа. Улсын онцгой комиссын шуурхай штабт гурван ээлжээр 180 гаруй хүн ажиллаж байна. Мөн орон нутагт мэргэжлийн хүмүүс ажиллаж байгаа юм. Өнөөдрийн байдлаар нийт 2418000 иргэн шинжилгээ хийлгэсэн байна" гэв.

Эрүүл мэндийн сайд С.Энхболд "Бид 1185991 хүүхдийг вакцинжуулах бэлтгэл ажлыг хангаад явж байна. Одоогоор дэлхийд Европын холбоо болон Канад, Америк гэх мэт улсуудад 12-15 настай хүүхдүүдийг вакцинжуулалтад хамруулаад эхэлсэн байгаа. Бидний хувьд Пфайзер вакцины дараагийн татан авалтаар 12-17 насны хүүхдүүдийг дархлаажуулалтад хамруулах төлөвлөгөөг боловсруулж байна. Хэрэв бид 12-17 насны 290 мянган хүүхдэд вакцин хийвэл хүн амынхаа 68.6 хувийг дархлаажуулалтад бүрэн хамруулна гэсэн тооцоолол бий" гэлээ.

Ерөнхий сайд Л.Оюун-Эрдэнэ "Засгийн газраас дөрөв, тав, зургадугаар сарыг вакцинжуулалтын сар болгон зарласан. Долдугаар сарын 1 гэхэд бид зорьсон ажилдаа хүрэх нь. Өнөөдөр УОК-т ажиллаа. Вакцин хийлгээд 14 хоносон иргэд дархлаатай болсон байна. Санаа зовоосон хоёр дүнгэлт байна. Нэгдүгээрт,  45-65 насны иргэдэд вакцин хийлгэж өвчлөл буурсан. Одоо 5-35 насны иргэд халдвар авах нь нэмэгдэж байна. Тиймээс бид энэ бүлэгтээ халдвар хамгааллын дэглэм яаж тогтоох вэ гэдгийг судалж байгаа юм. Вакцины үйлчлэл энэ сарын 15-наас 75 хувьтай болно. Бид долдугаар сарын 1 гэхэд вакцинжуулалтаа дуусгачих төлөвлөгөөтэй байгаа.  Тиймээс халдварын тохиолдол буурах байх гэсэн тооцоололтой байна" гэлээ.