ОХУ-ын Якутын бүс нутгийн Сибирийн ойд түймэр гарч, утаа нь Монгол Улсад орж ирснээс хойш долоо хоногийн хугацаа өнгөрлөө. Энэ хугацаанд Улаанбаатар хотын агаарын чанарын индекс хүний биед бага зэргийн хортой, хүний биед хортой, эрсдэлтэй түвшинд орж, өөрчлөгдөж байсан. Үүнтэй холбоотойгоор холбогдох байгууллагаас шаардлагагүй тохиолдолд бага насны хүүхдээ авч, гарахгүй байхыг анхааруулж байгаа. Бага насны хүүхэд насанд хүрсэн хүнээс илүү хурдан давтамжтай амьсгалах, дархлааны тогтолцоо нь бүрэн хөгжөөгүй учир агаарын бохирдолд илүү өртдөг аж. Иймд уншигч та бүхэнд агаарын бохирдлоос хэрхэн өөрийгөө болон гэр бүлээ хамгаалах тухай зөвлөгөө хүргэж байна.

Агаарын бохирдлоос хэрхэн сэргийлэх вэ:

• Амны хаалт тогтмол хэрэглэх
• Тогтмол хөдөлгөөн хийх /алхах, гүйх/
• Авто замтай ойрхон явахаас зайлсхийх
• Сүү, цагаан идээ гэх мэт илчлэг сайтай хүнс хэрэглэх
• Гэрээ тогтмол агааржуулах /агаар шүүгч хэрэглэх/
•  Агаарын бохирдлын тухай ойлголттой болох, агаарын чанарыг тогтмол хэмжих /агаар бохирдолтой үед гадагш гарахаас зайлсхийх/
• Өрөө тасалгаандаа тогтмол чийгтэй цэвэрлэгээ хийх
• Шаардлагагүй үед гэрэл, цахилгаан хэрэгслээ унтрааж хэвших зэрэг арга хэмжээг авч, агаарын бохирдлоос урьдчилан сэргийлнэ.

Агаарын бохирдлын хорт бодисууд нь уушгиар дамжин цусанд нэвтэрч, улмаар эд эрхтэнд тархдаг. Ингэснээр хорт бодисууд хүчилтөрөгчийн хэмжээг бууруулж, амьсгалын зам болон уушгины хэвийн ажиллагааг алдагдуулдаг байна.